လၧဖျိၩ့ဖျိၩ့အိၩ တဝၫ့ကတဝၫ့နီၪ ၦၥၭၡါဖံၫဖူၫထၧၫ့မၫဝၩအီၪဝ့ၫ နံၫဂၩနီၪလီၫႉ အဝ့ၫၥံၪနီၪ ဎံၪလၩဝ့ၫနၭဒ့ၭ အဖိၪမုၪ အီၪဝ့ၫ (၇) ဂၩစွါဘဲၫႉ ဖိၪမုၪနွ့ၫဂၩယီၩ ခိၭနၪမိဖါအဆၧချဲၩ့ႇ အၥုၪ့ဂ့ၩၥၭဘွၩအီၪအကၠီၩ့တၭ လၧဂံၪ့နဲၩ့ထံၭ ပဝ့ၫၥံၪလဖၪ ကိၭကၠၭအဝ့ၫၥံၪလၧ ၦနွ့ၫမုၪနီၪလီၫႉ  လၧၦနွ့ၫမုၪယီၩအဖၧၩ့ အဖုမုၪအဆံၭထုၬ နးဒၪဘၨၩနီၪ အၥၭအဂ့ၩထုၬ ဎံၪလၩ့ဝ့ၫအနၭထုၬစွါဘဲၫႉ အဝဲမုၪၥံၪလဖၪနးဆ့ အဲၪအဝ့ၫအၪမၬတၭ အမိအဖါနီၪဘိၭ ဘၪလီၩ့လိၫလၧၩ့အ့ၬဘီၪနဲၪႉ

အနီၪတၭ ၦနွ့ၫမုၪအထၧၫ့ဖုဝဲၥံၪနီၪ အီၪလၧမိဖါအလၩဒူၩဖၫ့လၬ ဆၧခိဆၧဝီၩအီၪနးမံၩ့အ့ၬ ဂဲၫထဲၩ့အီၪကၠၭမုၬမုၬလၩလၩ ထီးနးဒၪဘၨၩ ဂဲၫမုၪနၩ့လၫ့ကကၠၪနီၪလီၫႉ အနီၪတၭ ကနံၩနီၪ အဝ့ၫၥံၪအမိမိၥံၫဒၪနီၪလီၫႉ နးဒၪဘၨၩဝ့ၫ ကနံၩကနံၩ အၥၭမုၬအ့ၬဂၪ့ အဝဲမုၪၥံၪဘၪလီၩ့မၩမုၬအဝ့ၫအၥၭဘနီၪႇ အဆိၪထုၬ လၩကဘံၪ့နံၫဘံၪ့နီၪ အဝ့ၫၥံၪအဖါဖါနီၪ အၥၭမုၬ ဧၪအ့ၬ လါနၫ့ လယံၬလမီဘၪအထီ အဝ့ၫအၥၭဂဲၫဎွံၪထၪ့ဂီၩ့ အဝ့ၫၥံၪအဖါဖါၥၭဘီၩ့နီၪ အမံၩ့စဲၪ့ထၪ့လၧ ကထၪ့အီၪဎုၬထဲၩ့ လၧအဝ့ၫၥံၪအဂံၪ့နဲၩ့ထံၭ ၦမုၪမဲၪကဂၩနီၪလီၫႉ ၦနွ့ၫမုၪၥံၪနီၪ နါဂၧၫ့ဆၧပရၧၫ့နီၪအခၫ ထိးဆၧၫ့ဝ့ၫန့အ့ၬ အၥၭဘၪထံၭကၠၭဂီၩ့ လၧခဲၫ့ထုၬ အၪ့စၪ့အဖါဖါၥၭဘီၩ့နီၪလီၫႉ ကထံၪဎး အဖါစံၭဆၧၫ့ထဲၩ့ ဆၧပရၧၫ့နီၪ မွဲတၡါလကၭဘၪ ရွံမုနံၩအဂ့ၩအဘၪဂီၩ့ ကထၪ့အီၪဎုၬလီၫအကၠီၩ့ ၥ့ၪယၫဘၪဝ့ၫလီၫႉ

ယဖိၪမုၪၥံၪလဖၪ အမိမိၥၭဘီၩ့လအီၪလၧၩ့ဘၪအလးခဲၫ့ လၧၦခမျၧးအကျၩ အမ့ၬအနၪကဆံၭ ဖါအံၩအၪ့ဎါဘၪဘဲၫယီၩၥိၭတၭ ဘဲၫဖိၪမုၪၥံၪ အမ့ၬအနၪလဆံၭဘၪအဂး ယဖိၪမုၪၥံၪအမိမိအလး အ့ၪယအီၪဎုၬထဲၩ့စွါဘဲၫ ကမငါအကၠီၩ့ လီၩၥ့ၪယၫအ့ၪအဖိၪမုၪၥံၪအ့ၬဂီၩ့ ကထၪ့အီၪဎုၬအဂး ဘၪတဲၩ့ဝဲၩ့ဝ့ၫ လၧဂံၪ့နဲၩ့အိၩ ၦမုၪမဲၪ နးမုၪချဲၩ့ အကၠီၩ့ လီၩအ့ၪအဖိၪမုၪၥံၪနီၪလီၫႉ လါနၫ့ ၦနွ့ၫမုၪၥံၪနီၪ အဖါဖါကထၪ့အီၪဎုၬလၧ နးမုၪချဲၩ့နီၪ မွဲလဘၪဘၪအၥၭနးဆံၭလီၫႉ ဘၪနီၪလဲၪစွါဘဲၫ နးမုၪချဲၩ့နီၪ မွဲအၥုၪ့ဂ့ၩၥၭဘွၩလအီၪဘၪအကၠီၩ့လီၫႉ ဖိၪမုၪၥံၪလဖၪ စံၭအဖါဖါၥၭဘီၩ့ အ့ၪနမိထၪ့အီၪဎုၬထဲၩ့နီၪ ထၪ့အီၪဎုၬလၧ ၦမုၪအဂူၫဂၩလဂၩဂၩ လမွဲဘၪနးမုၪချဲၩ့ဂီၩလီၫ လါနၫ့ဂ့ၩ မွဲလန့ဘၪလီၫႉ ၦနွ့ၫမုၪအဖါဖါနီၪ ကထၪ့အီၪဎုၬအဂး ဎိၭဒီၪထၬဝ့ၫဂီၩ့လူၬယူၭအကၠီၩ့ လၧခဲၫ့ထုၬ အဝ့ၫၥံၪအဖါဖါၥၭဘီၩ့နီၪ ထၪ့အီၪဎုၬလၧ နးမုၪချဲၩ့နီၪလီၫႉ