လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မံၩ့ဎိၩၥၪဖျီၪ မုခွၫလၧအအီၪအနိၪ့ အဆၧရၩလၩ့ဖၧၩ့ မုကနံၩယီၩ ယအဲၪဒိၭ ရၩလၩ့န့အ့ၪဘၪနၥံၪနီၪ မွဲဝ့ၫဒၪ ၦဆံၫ့ဎံၪ Virginia Centurione Bracelli အဂဲးအကၠီၩ့နီၪလီၫႉ ၦဆံၫ့ဎံၪ Virginia ယီၩအီၪဖျဲၪလၧနံၪ့ (၁၅၈၇) နံၪ့ လၧခး Italy နီၪလီၫႉ အဝ့ၫယီၩ ဘၪဂဲၫထဲၩ့ဎိၩထၪ့လၧ ကၠဲၬလုၬကၠဲၬထၫအီၪ မိဖါၥံၪအကၠီၩ့နီၪ အဝ့ၫယီၩအီၪလၧကၠဲၬလူၬကၠဲၬထၫ အၪမၬဒ့ၭနီၪလီၫႉ လါနၫ့ အဝ့ၫ အဘူၭထံးၥံၪနီၪ ဒိၭထၪ့ၡါအဝ့ၫ ခီၫလၧအဝ့ၫအၥၭအီၪ (၁၅) နံၪ့နီၪဂီၩ့ အဖိၪမုၪ န့ထၪ့နံၫဂၩနီၪလီၫႉ လါနၫ့ႇ အဝ့ၫၥံၪထၪ့ၡါ လၩ့မၬယံၬ (၅) နံၪ့နီၪ အၦခွၫၥံၫဖီၩ့ခွံၬဝ့ၫဒၪနီၪလီၫႉ
ဆၧနီၪအကၠီၩ့ႇ အဝ့ၫယီၩဘၪအီၪထးလၧ အဖိၪမုၪနံၫဂၩနီၪလီၫႉ ခီၫလၧ အၦခွၫၥံၫဖီၩ့ခွံၬဒၪအိၩ အဝ့ၫယီၩဘၪယိဂ့ၩယိဘၪ အဖိၪမုၪနံၫဂၩႇ မၩဆၧဘၩဆိၪဖၪႇ မၩၡၩခံးဂးအဆၧမၩကိၭနံၩနီၪလီၫႉ အဖိၪမုၪနံၫဂၩ ဎိၩထၪ့အခံၫ့နီၪ အဝ့ၫယီၩ လ့ၩယိၦလၧ ဘၪထိးဆၧဆၫၥံၪႇ ၦၥၭၡါၥံၪႇ ၦလၧဘၪထိးအီၪက့ၪပဲၩခွံၬ ၥၭၥံၪနီၪလီၫႉ နံၪ့ (၁၆၂၅) နံၪ့နီၪ ၦလၧ ကအီၪဒူၩၥၭအဂး အလးနီၪ စၭၥုၪ့ထၪ့ဝ့ၫလၧ အဂံၪ့နီၪလီၫႉ လၧခဲၫ့နီၪႇ အၪ့လ့ၩ့ကၠီး ကဖျိၪ့ဂီၩ့ ၦမုၪၥံၪအဂးဒဲ ၦလၧအီၪလဆီၪ့ဘၪၥံၪအဂး ယိဂ့ၩယိဘၪဝ့ၫ လကၭဒ့ၭဘၪႇ အဝ့ၫၥံၪ အဆၧဆူၩနဲၩကဎိၩထၪ့အဂး ၥီၪ့အ့ၪဝ့ၫနီၪလီၫႉ လကၭဒ့ၭဘၪႇ အဝ့ၫယီၩ ၥုၪ့ထၪ့ၥရိၭနီၪလီၫႉ
အဝ့ၫယီၩ ၥံၫဖီၩ့ခွံၬလၧ ခး Ginoar နီၪလီၫႉ နံၪ့ (၂၀၀၄) နံၪ့ လၩမ့ၫ (၁၈) ၥၫ့နီၪ ၥၫ့ဎွၪ John Paul II ရွံထၪ့အဝ့ၫ ၦဆံၫ့ဎံၪနီၪလီၫႉ အဲၪကွံၩဘၪ ထၧၫ့ဖုဝဲထံၩၥိၭ ထီးအလူၬၥံၪဧ့ႇ ဘဲၫၥိၭ နၥံၪကထီးန့ထၬ ၦဆံၫ့ဎံၪ Virginia Centurione Bracelli အဂဲးအကၠီၩ့ ကန့အဂး ယရၩလၩ့န့အ့ၪဘၪနၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ အဲၪကွံၩဘၪ ထၧၫ့ဖုဝဲ ထံၩၥိၭထီးအလူၬႇ မွဲနၥံၪလၧၫ့ဎွ့ၩဝ့ၫဒၪလၧ ကဆါယွၩ အဆၧအဲၪဆၧကွံၩလါဆံၭႉ