ဆၧပိၩ့ထၪ့ကီၪ့စံၫ အၪ့န့ဆီၪ့ထံၫခးစီၩ့မၩ့အထီနီၪ အီၪလၧဖျိၩ့ဆၨၩခးဒီၪ့ ၥၫ့ခၫၥံၪလဖၪဒဲ လံၬလဲကိၪ့ၥ့ၪၥံၪ အီၪထၬဝဲၩ့ဖျိၩ့ၡိၬလံၬလဲအလံၩ (လိုက်ထူ့လီပေစာ)နီၪ ကျ့ၭစၨၩမၩဖျီၪ့ထၪ့ထဲၩ့ဝ့ၫန့နီၪလီၫႉဖျိၩ့လံၬလဲနီၪ ခိၪလၩဘွၩပၧၩ့ဆၧအထီ ပဒိၪၥံၪဖ့ၪလၫ့ထၬအ့ၪအခွး ၥီၪ့ထၪ့ဝ့ၫန့လၧ ပဒိၪဆၧမၩလိၪလး ဆၧအီၪကီၪ့ဆရၫၥံၪ ဖိၬလိၬထၪ့ ဖျိၩ့ၡိဒဲဖျိၩ့ၡၩ့ လံၬလဲနံၫမံၩ့ဒဲ ဖျိၩ့ဆၨၩခးဒီၪ့ၥၫ့ခၫလဖၪ ဖျိၩ့ၡိလံၬလဲ မွဲဖျိၩ့လံၬလဲအီၪထၪ့ဝ့ၫ (၃) မံၩ့နီၪလီၫႉ ၦဖျိၩ့လံၬလဲအီၪဝ့ၫအမံၩ့မံၩ့နီၪ မွဲဆၧယံၩဆၧၡီၩ့ အဂဲးကလၩ့ဆါနီၪလီၫႉ လၧခဲၫ့ ၥရၫၥၫထိၫ ဖ့ၪကိၪ့ထဲၩ့လၧ ၦဖျိၩ့ဆၨၩအဂးလံၬလဲ (၃) မံၩ့ လၧအမွဲဝ့ၫ ဖျိၩ့ၡိမုထၪ့လံၬလဲႇ ဖျိၩ့ၡိမုနုၬလံၬလဲဒဲ ဖျိၩ့ၡၩလံၬလဲၥံၪနီၪ ဆၧပိၩ့ထၪ့ကီၪ့စံၪပဒိၪ ထိးဆၧၫ့နီၪလီၫႉ လၧခဲၫ့ ၁၉၇၄နံၪ့ အလးခဲၫ့နီၪ လၧဆၧမၩလိၪလးလဖၪ ၥီၪ့ဘၪဖျိၩ့လံၬနးဆံၭဖိၪလၧၩ့အ့ၬနီၪလီၫႉ ထံၫထၪကျိၩ့ထၧၫ့ဒီၪ့ယၫ မွဲယဲၩ့ထၪ့ဝ့ၫဒၪလၧ ဖျိၩ့လံၬလဲနီၪလီၫႉ ပကစံၭလၧ ၦဖျိၩ့လံၬလဲ လၩ့ထ့ၬလၬလၧ ဆၧခံၭကျၩအဆၧၫ့အထီကဒုၩနီၪလီၫႉ
ထီး လၧခဲၫ့ ခးပယၩ့နီၪ ခီၫ့ၡၩအနိၪ့ႇ ဆၧကိၪ့ဘၪကိၪ့ၥ့ၪအနိၪ့ ဂဲၫထဲၩ့လၩ့ဆ့ၭလၩ့ယွၩထၪ့ဝ့ၫဒၪ အနိၪ့ကိၭနိၪ့ဒ့ၭနီၪလီၫႉၦခမျၧးၥံၪလဖၪနးဆ့ ထီၩ့လၩ့လၧ ဆၧၡၪ့ဆၧနၭဖၧၩ့နီၪလီၫႉ ထီၩ့လၧ နံၪ့ ၁၉၈၈အခၫ ခမျၧးပိၩထၪ့ ဒံၫမီၩဂရ့ၫစံၫ ဆၧဘိၪ့လၫ့ဘဲၩလၫ့ (လူထုအုံကြွမှု ဒီမိုကရေစီအရေးအခင်းကြီး) ဂဲၫဖုၬလၫ့ဒီၭနီၪလီၫႉ အထီနီၪ ဆၧဖိၬလိၬထၪ့ထံၫခး အီၪဂၧၩ့လၩ့ၥၭ (နိုင်ငံတော် ငြိမ်ဝပ်ပိပြားမှု တည်ဆောက်ရေး) ခရၧၫ့ ၥုၭခိၪစီၩမီၫ့ဒဲ အခရၧၫ့ၥံၪ အၪ့န့ဆီၪ့ဒီၭ ထံၫခးအစီၩ့မၩ့ဒီၭနီၪလီၫႉ ၥုၭခိၪစီၩ့မီၫအခရၧၫ့ယီၩ ပၧၩ့ထၪ့ခးပယၩ့ဖိၬဘိၭအနံၪ့ (၂၀) ဘျဲၪအခၫ ဖျိၩ့ဆၨၩကဆၨၩလီၫလကၭဘၪ ထၧၫ့ဖုဝဲဆၨၩဆၬဖိၪၥံၪထီးလူၬ အလံၬလဲ လၩ့ဘူၭကလၩ့မါ ဆုးလၩ့ဘၧၩ့လၧ ဆၧခံၭကျၩနီၪလီၫႉ
လၧခဲၫ့ ထံၫခးအဆၧအၪ့လဲၩ့ထၪ့အၥၭအကၠီၩ့ နံၪ့ ၂၀၁၁ နံၪ့နီၪ ကြံ့ခိုင်ရေးပါတီ ခၩ့ခိၪဒိၪ အူၩၥံၩ့စံၫ့ ပဒိၪဂဲၫကဲၪထၪ့ နီၪလီၫႉ နံၪ့ ၂၀၁၃–၁၄ ဆၧၥီၪ့လိၪလံၬနံၪ့နီၪ တၩ့ဖၨၪဆၧမၩလိၪလးလဖၪ စၭထၪ့ၥီၪ့လိၪဘၪ ဖျိၩ့လံၬနီၪလီၫႉ အထီဘဲၫယီၩ အီၪလၧထံၫထၪကျိၩ့ခးဒီၪ့ဒဲ တခိၩ့ခးဒီၪ့ၥံၪ ပဒိၪအဆၧမၩလိၪလးလဖၪ ၥီၪ့ဝ့ၫဖျိၩ့လံၬနံၫမံၩ့မွဲဝ့ၫ ဖျိၩ့ၡိလံၬလဲဒဲ ဖျိၩ့ၡၩ့လံၬလဲဂီၩ့ လၧဖျိၩ့ဆၨၩခးဒီၪ့နီၪ ၥီၪ့ဖျိၩ့လံၬ နံၫမံၩ့ ၥၧၫ့မံၩ့အကၠီၩ့ ပၥ့ၪယၫဘၪနီၪလီၫႉ ထီးနီၪ အ့ၪမွဲ ပဒိၪအဆၧမၩလိၪလးလဖၪ ပၥီၪ့လိၪထဲၩ့ပဖျိၩ့လံၬန့ဂ့ၩဂ့ၩဘၪဘၪယူၭစွါဘဲၫ ပနဲၩ့တၡါ အထီလၧယၫ ၦဖျိၩ့လံၬလဲနီၪ အၥၭကဂဲၫမၧၫ့ထၪ့ထဲၩ့ နးဘျၩ့ဒီၭနီၪလီၫႉ အ့ၪပကအၪ့ဎါထဲၩ့ထံၪထံၪနီၪ ခးပယၩ့ဆၧပျီၩ့ဖျ့ၭန့ဂီၩ့ စၭထၪ့လၧ ၁၉၅၈နံၪ့ ထၧၫ့ထီၩ့စိၩ ၂၀၁၂နံၪ့ (၅၄) နံၪ့အဖၧၩ့ လၧဆၧမၩလိၪလးဖၧၩ့ ပၥီၪ့လိၪဘၪဖျိၩ့လံၬအ့ၬနီၪလီၫႉ
အထီဘဲၫယီၩနီၪ ထီၩ့ဒံၭလၧ ပလံၬလဲလလၩ့မါဘၪအဂး ဆၧဖီၪ့ဂုးခၧၫ့ထၬအဆၫ့ဒံၭလီၫတၭ မွဲလထီၩ့ဒံၭဘၪလၧ ဖျိၩ့ဆၨၩဖိၪၥံၪၥ့ၪဖျိၩ့လံၬဂ့ၩဂ့ၩဘၪဘၪဒံၭအ့ၬနီၪလီၫႉ ပၥီၪ့လိၪထဲၩ့ပလံၬလဲန့နီၪ မွဲလလၧၫ့ဎွ့ၩဒံၭဘၪဒဲ ပကဘၪမၩလိၪထီးပၥ့ၪနီၪလီၫႉ