လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ပကဘၪအၪ့က့ၩဘၩဆိၪဖၪန့ ၦလၧဂဲးဆီၪ့ဘၭဆီၪ့လအီၪဘၪၥံၪ အဂဲးအကၠီၩ့နီၪလီၫႉ အနဲၩအဎီၩ့ ၦလၧဂဲးဆီၪ့ဘၪဆီၪ့ လအီၪဘၪၥံၪကဒီၪ့နီၪ ဘၪထံၭဘၪဆၫၥ့ၪ ဘုၪဘုၪယီၫယီၫနီၪလီၫႉ ၦလၧဂဲးဆီၪ့ဘၭဆီၪ့ လအီၪဘၪလနၩ့နၩ့နီၪ ဘၪထိးအီၪက့ၪပဲၩ့ၥၭနီၪလီၫႉ လၩ့ဆၫ့ဒၪဆၧ ဆၧလၧ ၦဂဲးဆီၪ့ဘၭဆီၪ့ လအီၪဘၪၥံၪကဒီၪ့နီၪ မၩဆၧၥ့ၪနးမံၩ့အ့ၬႇ ပၥိၩ့ၥ့ၪနးမံၩ့အ့ၬႇ ၦကိၭဂၩအၥၭခံဖၧၩ့ ၥၭစၧၩ့အီၪနီၪလီၫႉ
အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ၦလၧဂဲးဆီၪ့ဘၭဆီၪ့ လအီၪဘၪၥံၪယီၩ မၩဆၧၥ့ၪႇ မၩဆၧန့ဘဲၫၥိၭ ၦၡၩအဂ့ၩႇ မၩဆၧၥ့ၪဘဲၫၥိၭ ၦၡၩအဂ့ၩ အီၪအၪမၬဒ့ၭနီၪလီၫႉ ပကယိလၧ အထီဘဲၫယီၩစွါဘဲၫ အဝ့ၫၥံၪအဂး အခွးအယါ အီၪအမံၩ့မံၩ့နီၪလီၫႉ ၦၡၩကမၩဆၧၩ့အဝ့ၫၥံၪအဂး အဖုၫအီၪအမံၩ့မံၩ့နီၪလီၫႉ အရ့ၩဎိၩထုၬနီၪ လၧၡၩခံးဂး ဒဲ ဆၧဘိၪ့ဆၧဘၩဖၧၩ့ ပကဘၪထိးဆၧၫ့ အဝံၫၥံၪနီၪလီၫႉ ၦလၧဂဲးဆီၪ့ဘၭဆီၪ့အီၪကဒီၪ့နီၪ ကဘၪအၪ့လဲၩ့ထၪ့ထဲၩ့အၥၭခံဖၧၩ့နီၪလီၫႉ ဘၪမနီလဲၪစွါဘဲၫႇ ပကဲၪၦၡၩၥံၪယီၩ ပစီၪဆံၭအဝ့ၫၥံၪႇ ပအီၪက့ၪပဲၩ့အဝ့ၫၥံၪ အခံၫ့ယံၬ အၪမၬဒ့ၭအကၠီၩ့နီၪလီၫႉ
အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ပအီၪၥၭမၧၫ့ အနဲၩအဎီၩ့ယီၩ ပကဒၪဘၪ ၦဂဲးဆီၪ့ဘၭဆီၪ့လအီၪဘၪၥံၪ ကအီၪ အၪမၬဒ့ၭနီၪလီၫႉ လါနၫ့ ပကဘၪမၩဆၧၩ့အဝ့ၫၥံၪႇ ပကဘၪ ဖ့ၪအ့ၪအဝ့ၫၥံၪအလးႇ ပကဘၪကိၭဖံၭၥိၭ အဝ့ၫၥံၪႇ ပကဘၪအၪ့က့ၩဘၩဆိၪဖၪန့ အဝ့ၫၥံၪအဂး လိၪဝ့ၫဒၪအကၠီၩ့ ၥၫ့ဎွၩဖရၫ့စ့ၭ အဆၧၥီၫ့ဆၧၥၫ့အီၪ ဝ့ၫဒၪ ဘဲၫယီၩၥိၭအဂဲး ယရၩလၩ့န့အ့ၪဘၪနၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭ ထီးအလူၬ မွဲနၥံၪလၧၫဎွ့ၩဝ့ၫဒၪလၧ ကဆါဎြံၬအဆၧအဲၪဆၧကွံၩ လါဆံၭႉ