ပဂံၪ့ဒီၪ့အဂးနီၪ ပကဘၪအီၪကံၪထၬ အဂုထုၬလီၫႉ ပဖိၪၥံၪနီၪ ပအီၪကံၪဖ့ၪဆိၫ အဝ့ၫၥံၪ အဂုထုၬစွါဘဲၫ အဝ့ၫၥံၪကန့ဘၪ ဆၧမုၬဆၧလၩဒဲဆၧလၫ့ဆၧဎွ့ၩအၪမၬနီၪလီၫႉ 2004 နံၪ့ဒၪအိၩ လၧ Thailand အထံၪအခးဖၧၩ့ ဆရၪမူၪ အမူၪနၩ့ ၥီၪ့လိၪလံၬကဂၩနီၪ ဖုၫလၩ့လၧ တၨၭဖၫ့လၬနီၪလီၫႉ ဖိၪၥၪမုၪနီၪ ဎံၪလၩဂီၩ့ ဆၧကိၪ့ဘၪကိၪ့ၥံၪလၫ့ဎွၩနၬမၬလ့ၬႉ လါနၫ့ဖိၪၥၪမုၪနီၪ ဘၪနီၪလဲၪ ဘၪဖုၫလၩ့လၧတၨၭဖၫ့လၬနီၪ ၦၡၩလဖၪ ကမိၥံၪယၪကၠၭဝ့ၫႉအနီၪအခၪ ၦၡၩၥံၪ အၪ့စိၭအၪ့စၪ့ဆၧဂီၩ့ အၪ့ဎၬထဲၩ့ဝ့ၫအခၪ ဖိၪၥၪမုၪအမိအဖါနီၪ အီၪဎုၬကၠၧၫ့ကၠၧၫ့လၩ့အ့ၬ လၩ့ဖၭယယူၭႇ  လကၭဒံၭဘၪ အမိအဖါနီၪ လၧအဝ့ၫ အဆံၭဆံၭဒံၭဒၪအိၩ ခွံၭၡိၭထၬအဝ့ၫႇ ဖိၪၥၪမုၪယီၩန့ဘၪ အမိအဖါ အဆၧအဲၪအ့ၬႇ ဘၪအီၪယဲၩ့လၧ မိဖါအခံၪ့ အမိအဖါ ဖ့ၪဂဲးဖ့ၪဘၭအဝ့ၫအ့ၬ ဆၧနီၪအကၠီၩ့ အၥၭလၩ့ဂီၩ့ အၥၭဆၪဆၧအကၠီၩ့ မၩၥံၫလၫ့အၥၭနီၪလီၫႉ ၦလၧလန့ဘၪမိဖါအဆၧအဲၪဘူၭဘူၭထံၭထံၭ လဖၪနီၪ လၧအဝ့ၫၥံၪ အၥၭဖၧၩ့ အၥၭလၩ့ဆံၭၥံၪႇ အၥၭဆၪထးဆၧၥံၪႇ အဝ့ၫ အနးခီၫ့နးၥၭယီၩဆီၫ့မီၪ့ဝ့ၫအခီၫပယီၫအီၪလၩ့အ့ၬႉ ဖိၪၥၪလၧ လန့ဘၪမိဖါအဆၧအဲၪ လၫ့လၫ့ဎွ့ၩဎွ့ၩဘၪလဖၪဒဲ ဘၪအီၪယဲၩလၧ မိဖါၥံၪလဖၪနီၪ လၩ့ယၫ့ၥၭနၬမၬလီၫႉ ဆၧနီၪအကၠီၩ့ မိဖါၥံၪဧ့ ပဖိၪၥံၪအဂး ပကဘၪဖ့ၪလၫအခံၪ့လၫ့လၫ့ဎွ့ၩဎွ့ၩဂီၩ့ ပကဘၪဖ့ၪဂဲးဖ့ၪဘၭအဝ့ၫၥံၪလီၫႉ