ၥံၪ့ကျိၭဘၪလူၬပျီၩ့ခွံၬဝ့ၫဒၪ အဂဲးအဖးလဖၪနီၪမွဲ ၥံၪ့ကျိၭၥံၪနီၪ အၪ့လဲၩ့ထၪ့ထဲၩ့ဝ့ၫလၧ ဆၧၥုၪ့ဆၧဖါဖံၬအလးႇ ၥိၩ့ထၪ့ ၥံၪ့မု ၥွၪထီးအၪ့လၨၪဒဲ ထူၭထၪ့ၥံၪ့လၧ ခီၫ့ၡၩအဂးလဖၪ ပၫဝ့ၫနီၪလီၫႉ လကၭဒံၭဘၪ ၡၩအဝံဆၧနၭဂဲၫထီၪ့ထၪ့ႇ ထံၫခးဂူၫဂၩၥံၪ ဆၧထူၭထၪ့ၥံၪ့ကျိၭအဖၫ့ခိၪ လိၫဝ့ၫဒၪဂဲၫအၪထၪ့နီၪလီၫႉ လၧထံၫခးဖၧၩ့ ထံၫခးဂူၫဂၩ ဆၧအၪ့ဎွ့ၩအၪ့ဆၪဆၧအဂး ခးပယၩ့ယီၩ ဆၧဖိၪဆၧဎါအီၪလၧၡိၬကျၩလဖၪ ဘၪၥံၫဂီၩ့ ၥံၫစၪအၪနၭထၪ့နီၪလီၫႉ လကၭဒံၭဘၪ ဆၧခုၪ့ၥၭထုအကၠီၩ့ ကဲၪထၪ့ နဲၩ့ဎီၩ့ၥလိၪၥလံၬထၪ့ႇ ဘံၩထံၫဆ့ၭယွၩ လၩ့အၪ့လဲၩ့ထၪ့အၥၭ ဒဲ ဖီၪ့ယၪနၭလၨၪအကၠီၩ့ ကဲၪထၪ့ဆၧလၩ့အၪ့ယိၫနီၪ ဘံၩ ႇ ထံၫကၠီၪ့ႇ ကွံၩ ႇ နီၫ့ ဖၧၩ့ ယၪၥံၪလဖၪ ဘၪၥံၫဂီၩ့ၥံၫစၪအၪမၬနီၪလီၫႉ အ့ၪပယိထဲၩ့ထံၪထံၪဆၭဆၭနီၪ ခီၫ့ၡၩအနိၫ့ဂဲၫထၪ့ထီၪ့အၥိၭ ခးပယၩ့နဲၩ့ဎီၩ့ အခၪ့ထံၭခၪ့ဎီၩ့လဖၪအဖၫ့ခိၪ ဘၪထံၭဆၫနီၪလီၫႉ

ပဂၪ့ခိၪနဲၩ့ဎီၩ့ယီၩ ကဆုးဖီၪ့ဂုးထၬအဂး မပၧၩလဲၪ အမူၩဒၩအီၪလဲၪ ဆၧအၪ့စၪ့ယီၩ ပကဘၪစံၭဆၧၫ့စွါဘဲၫ မွဲပကဲၪၦၡၩၥံၪ ပမူၩဒၩအီၪဝ့ၫကိၭဂၩဒ့ၭလီၫႉ ၦခမျၧးၥံၪလဖၪ မနီၫလဲၪအဂး ကြၨၭပဖီၪ့ဂုးထၬ နဲၩ့ဎီၩ့လဲၪစွါဘဲၫ ခးပယၩ့ဖိၪၥံၪ အဆၧလ့ၩထၪ့ထီၪ့ႇ နဲၩ့ဎီၩ့ႇ ခီၫ့ၡၩအဆၧလ့ၩထၪ့လ့ၩထီၪ့ထီးအလူၬနီၪ ခးပယၩ့ အခၪ့ထံၭခၪ့ဎၧၩ့လဖၪ အီၪဂုးခၧၫ့ဝ့ၫလၧ ပၥ့ၪယၫမူၩဒၩအဖၧၩ့နီၪလီၫႉ ဂၪ့ခိၪထၧၫ့ဘံၪ့ယၫ ၦခမျၧးလဖၪ ဂၪ့ခိၪချိၫ့ ကဆုးအီၪဂုးခၧၫ့လဆိၩၡၩအဂး ကြၨၭပဖီၪ့ဂုးခၧၫ့ထၬနဲၩ့ဎီၩ့အခၪ့ထံၭခၪ့ဎၧၩ့လဖၪနီၪ ဒံၩ့ၥိၩ့ထၪ့ဝ့ၫနီၪလီၫႉ မွဲဆၧဘဲၫနီၪ ဂၪ့ခိၪချိၫ့ ၡၩအဆၧဝံဆၧနၭ ဂဲၫအၪ့ထၪ့အဖၧၩ့ ခီၫ့ၡၩအနိၫ့လ့ၩထၪ့လ့ၩထီၫ့အကၠီၩ့ ဂၭဂီၩ့ဂၭစၪလူၬပျီၩ့ခွံၬထၪ့အၪ့မၬတၭ ဘဲၫယီၩ အဆၧၫ့အထီ ထီၩ့လၧ ပဆုးဖီၪ့ဂုးခၧၫ့လမိလၧၩ့ဘၪအထီယူၭနီၪလီၫႉ

ဂၪ့ခိၪထၧၫ့ဘံၪ့ယၫ ဆၧၥိၩ့ထၪ့ဆၧဒဲ ဆၧထူၭထၪ့ဆၧလဖၪ လအၪ့လဲၩ့ဘၪအၥၭဂီၩ့ ကဆုးလ့ၩဒၪဘယီၩစွါဘဲၫ နံၪ့ ၂၀၅၀ထၪ့ဘၭခိၭနီၪ အၪ့ဎၬထယၬထၬဝ့ၫ ဂၪ့ခိၪၡၩအဆၧဝံဆၧနၭ အခွး ၉၆၀၀နီၪ ဆၧၥိၩ့ထၪ့ဆၧဘဲၫယီၩၥိၭနီၪ ကမၩလၧၫ့ဎွ့ၩဝ့ၫကန့အဂး မွဲဂၪ့ခိၪကဒုၩ့လီၫ လလၧၫ့ဘၪလၧ ကလိၫဝ့ၫ ဂၪ့ခိၪ ၃ ဒုၩ့နီၪလီၫႉ မုဆၫကနံၩယီၩ ပဘၪဒၪဎီၩ့ဆၧယၫ ၥံၪ့ကျိၭလူၬပျီၩ့ခွံၬႇ ဆၧဖိၪဆၧဎါလၧအီၪၡိၬကျၩလဖၪ အီၪအလးအကျဲၩ့န့လၧၩ့အ့ၬႇ အၪ့ဎွ့ၩအၪ့ဆၪဝ့ၫလၧ ၥနိၫလအီၪဘၪအဖၧၩ့ ၦၡၩၥံၪအဆၧဖီၪ့ထၪ့ဖံၭထၪ့အကၠီၩ့ နဲၩ့ဎီၩ့ ဘၪဂၭဂီၩ့ဂၭစၪထၪ့ယူၭနီၪလီၫႉ ဆၧလ့ၩထၪ့လ့ၩထီၪ့ဝ့ၫဒၪ ဆၧၫ့ထီဘဲၫယီၩ ဘဲၫစဲၭအနိၫ့ၥံၪဒိၪထၪ့ထီၪ့အၥိၭ ဂၪ့ခိၪလံၩအထုၪ့ဒဲ ထံၫအထုၪ့ၥံၪဆ့ ့  ဂဲၫၥလိၪၥလံၬထၪ့ယူၭနီၪလီၫႉ စဲၭဒူၭအဆံၭလဖၪ အစုၪ့အီၪဝ့ၫဒၪ ထံၫလဖၪနီၪ ခွံၬၡိၬကၠၭဝ့ၫလၧ ထံၫမိဎွါဖၧၩ့ယီၫယီၫအကၠီၩ့ ယၪဒဲ ဆၧဖိၪဆၧဎါလၧအီၪထံၫကျၩလၪဖ ဘၪၥံၫဂီၩ့ၥံၫစၪဂီၩ့ ထံၫလၧပအီၪၥလိၪၥလံၬထၪ့နီၪ ဘၪထံၭဆၫ နဲၩ့ဎီၩ့အဖၫ့ခိၪ ဖၭဒိၪနီၪလီၫႉ ကထံၪဎး လၧစဲၭဒူၭလဖၪ ခွံၬၡိၬအဆၧဘံၪၥိၭၥံၪနီၪအကၠီၩ့ ဆၧအၥၭမၧၫ့ၥံၪလၧအအီၪအနဲၩ့အဎီၩ့လဖၪ ကကဲၪထၪ့ ဆၧဆီၪ့ဆၧချဲၫ့ဒဲ အဆၧၥၭမၧၫ့ အဖၧၩ့ဆၧလၩ့အၪ့ယိၫအၪမၬနီၪလီၫႉ