စခးချံၪ့လဂၩ ဖိၪၥၪမုၪလၩ့မါဒၪလၧ အမ့ၬယၫအခၫ အဝ့ၫအီၪထးလၧဆၧလၩ့ဆၫ့အဖၧၩ့ လခဲၫကနံၩ မုမ့ၬလထၪ့ဒံၭဘၪ အခံၫ့နီၪ အၪ့န့ထၪ့ ၦမုၪနၩ့ဖိၪဖ့ၪလၪ့ထၬ ၥံၪ့ဝံနီၪဂီၩ့ လ့ၩလၧ ၦမုၪနၩ့ဖိၪအီၪအလးတဝၫ့နီၪလီၫႉ အီၪယံၬကဆိဖိၪလီၫ အဝ့ၫလ့ၩထီၩ့ လၧ ၡိၬကျၩနီၪလါနၫ့ဂ့ၩ မွဲဒၪတဝၫ့နးတဝၫ့ဘိၭ ဆၧၫ့နၩ့အီၪပွံၭလၧၥံၪ့ခၪ့ထံၭလၧ ဆၧၥုၪ့ဎၧၫ့ၥၭဎၧၫ့အဖၧၩ့နီၪလီၫႉ
အထီနီၪ စခးချံၪ့လဂၩ နၧၫ့ဘၪဆၧအစီၩ့မုၬမုၬကဒုၩနီၪ အဝ့ၫအၥၭချံၪ့လၩ့ လယံၬလမီဘၪအထီ ဖိၪၥၪမုၪယီၩ ဂဲၫဖိးလၪ့လၧ အဝ့ၫအမ့ၬယၫဂီၩ့ နံမွံၪစိၩ စခးချံၪ့နီၪလီၫႉ ဝဲခွၫ နဂဲၫထီၩ့ယံၬယူၭဧၪႉ ဂဲၫ ပကထဲၩ့လၧဂံၪ့အိၩႉ ဖုမုၪၥံၪအဂံၪ့နီၪ အီၪခလဲၪ စခးချံၪ့အၪ့စၪ့ဘဲၫယီၩၥိၭအခၫ ၦမုၪနီၪဆၧၫ့နၩ့လၧၥံၪ့ခၪ့ထံၭနီၪကထုၪ့ဎး ၦမုၪနီၪလၩ့မါဂီၩ့ အဝ့ၫနါဂၧၫ့ၦၡၩၥံၪချဲၩ့အလူနီၪလီၫႉ အီၪယံၬကဆိ ၦမုၪနီၪ ဂဲၫဖုၬလၪ့ဂီၩ့ စံၭဝ့ၫ ဝဲခွၫ ပဂဲးလဖၪ ယလီၩအ့ၪဖါဖါဂီၩ့ယူၭ အဝ့ၫအၥၭဘၪလၩ့ဎိၭပၧၩႉ မွဲဧၪ ဆၧမုၬထဲယၥၭနီၪ ဖုမုၪဧ့ႉ ကထုၪ့ဎး အဖါဖါၥၭဘီၩ့ စံၭစိၩ ဖိၪမုၪနပမွံၩနီၪ ကိၭထၪ့လၧဂံၪ့ဖၧၩ့ယီၩဘီၪႉ ဖိၪမုၪနးဆ့ အခံၪ့ဘၪယူၭ ဖါဖါဘၪလီၩဆၧ အီၪနးမံၩ့အ့ၬ ဖိၪမုၪအၥၭလုထီးအလူၬႉ
ဝဲခွၫ ဖါအံၩ ကိၭပၧၩယူၭ ပကထဲၩ့ထၪ့လၧဂံၪ့ဖၧၩ့နဲၪႉ ထၪ့ထီၩ့လၧဂံၪ့ဖၧၩ့အခၫ ၦမုၪနၩ့ဖိၪအမိဖါဒဲတဝၫ့ခိၪနါလဖၪ အီၪခိၭထၬ အဝ့ၫၥံၪလၧဂံၪ့ဖၧၩ့ဂီၩ့ ဒူၭအီၪဎုၬဝ့ၫဒၪနီၪလီၫႉ စၭထၪ့လၧမုနံၩနီၪ တဝၫ့ဖိၪလဖၪလီၩကၠၭ စခးချံၪ့လၩ့မါနီၪလီၫႉ လါနၫ့ စခးချံၪ့လဂၩ အီၪကၠၧၫ့ကၠၧၫ့လၧ အမၫၥၭဘီၩ့ ထီးအၥံၫအၡါနီၪလီၫႉ