ချံၫ့မုၬခီၫ့ဆၧအီၪကီၪ့ ထံၫနွဲတဝၫ့ သံယောဟန်ၥရိၬ ထၪ့ဘၭ၂၅နံၪ့ဒဲ ၥၫ့ခိၪဒိၪ ဟင်နရီအိုင်ခလိန် ကဲၪထၪ့ၥၫ့ခၫ ထၪ့ဘၭ၃၆နံၪ့ယူၩဘလံၫ မံဆၩဆၧလုထၪ့နီၪ ၦၡၩမၩလၩမၩဖၩ့ဝ့ၫဒၪလၧ ၂၀၂၅နံၪ့ လၩမၫၡါ၁၁ၥၫ့ လၧချံၫ့မုၬခီၫ့ဆၧအီၪကီၪ့ ထံၫနွဲတဝၫ့နီၪလီၫႉ
လၧမံဆၩဆၧလုထၪ့ဖၧၩ့နီၪ ၥၫ့ခိၪဒိၪလီၩလၩ့လၭလၩ့ဝ့ၫဒၪ “မိဖါၥံၪလဖၪနီၪ ကဘၪဖ့ၪလၫ့ထးအ့ၪဖိၪဒံၪၥံၪ ဆၧဆူနဲၩဆၧန့ၥၫအဂဲးႇ မိဖါၥံၪယီၩ ဖ့ၪလၫ့ထးအ့ၪ ဖိၪဒံၪၥံၪ ဆံၬလး(၁၀)ဧ့ကၧၫ န့မၬကန့ႇ ဖ့ၪလၫ့ထးအ့ၪ ဖိၪဒံၪၥံၪ ထီၫဆၧန့ၥၫ ကဘၭတွၭ န့မၬကန့ လါနၫ့ ၦကဲၪမိဖါကိၭဂၩ ဖ့ၪလၫ့ထးအ့ၪ အဖိၪအဒံၪန့နီၪ မွဲလၧဆၧဆူနဲၩဆၧန့ၥၫလီၫ“ အဂဲး ၥၫ့ခိၪဒိၪ ဟင်နရီအိုင်ခလိန်ယီၩ ဆၫ့ထွ့ၫဘၪ မိဖါၥံၪ ဘဲၫကဖ့ၪလၫ့အ့ၪ ဖိၪဒံၪၥံၪ ဆၧဆူနဲၩ ဆၧန့ၥၫအဂးနီၪလီၫႉ
ထံၫနွဲတဝၫ့ သံယောဟန်ၥရိၬယီၩ ဘၪဆၧဆိၪဂ့ၩဆိၪဘွၩဝဲထၪ့ဝ့ၫဒၪလၧ ၂၀၀၀နံၪ့ ၥၫ့ခိၪဒိၪခၠၩစဘိၫ အစူၪဖၧၩ့အိၩနီၪလီၫႉ ၦလၧအမၩဘိၪ့ ၥရိၬယီၩနီၪ မွဲလၧ ဦးမောင်မောင်ခင် ဒဲ ဒေါ်အာနားခူး လဖၪနီၪလီၫႉ
ဒိၩ့ပၥံၫ့ဆၧအီၪကီၪ့ၥၫ့ခိၪဒိၪဟင်နရီအိုင်ခလိန်ယီၩ လၧအဖီၩ့ခွံၬ၁၉၈၉နံၪ့ လၩမၫၡါ၁၁ၥၫ့အခံၫ့ ကဲၪထၪ့ဘၪဘိၪ့ခိၪၥၫ့ခၫလၧ ၥၫ့ခိၪဒိၪဂျွန်ဂေးဗြဲလ်အစူၪ ဖၧၩ့နီၪလီၫႉ လၧအဝ့ၫကၠၧၫ့ကၠၧၫ့ မော်လမြိုင်ဆၧအီၪကီၪ့ ၥၫ့ခိၪဒိၪMaurice ညွန့်ဝေ ဒဲ ၥၫ့ခၫဒိၪဖာသာရ်အေမာနွဲ အဝ့ၫၥံၪအၥိၭ၃ဂၩယီၩ ကဲၪထၪ့ဘၪဘိၪ့ခိၪ ၥၫ့ခၫကၠၧၫ့ကၠၧၫ့နီၪလီၫႉ အထီနီၪဒၪအိၩ လၧဒိၩ့ပၥံၫ့ဆၧအီၪကီၪ့ဖၧၩ့ ၥၫ့မုၥၫ့ခၫထီး လူၬ အီၪဒၪ အဂၩ၃၀ဘျဲၪဒံၭလီၫအဂဲး ပန့ဘၪဆၧပရၧၫ့ ဘဲၫယီၩအၥိၭနီၪလီၫႉ
စအဲၪၡီၩ့ႇ နးအဲၪဖီၫဘွၩ