နလၩ့ထံၩဖါန့ လါနၫ့ဂ့ၩ နလဂဲထုၪ့ထဲၩ့ဘၪနီၪန့အ့ၬ နလးခဲၫ့ ၦအဘၪဒိၭနဲၩနၧၩ နဂံၪ့ဒီၪ့ဖိၪၥံၪအီၪဒံၭႉ ဆၧနီၪအကၠီၩ့ ဆုးလ့ၩလၧအမ့ၬယၫလါဆံၭႉ နဒၪလၧဆၧကၪအခံၫ့ အ့ၪၦၡၩမၩဆၧၩ့နၧၩလအီၪဘၪအခၫ ၥၭဂၭဂီၩ့လဂ့ၩႉ အဝ့ၫၥံၪနီၪ ကမၩဆၧၩ့နၧၩအဂး ဂဲၫ အီၪဖျဲၪထၪ့မွဲအ့ၬႉ
ဆၧအယီၩနၪၥ့ၪထၬလါဆံၭႉ နဆၧကၪဆၧဂဲၩလဖၪနီၪ မၩပျၩ့ထၪ့ဒၪနၧၩမွဲအ့ၪန့ႉ နလၩ့ဆ့ၭလၩ့ယွါအခံၫ့ ၦအမၩဆၧၩ့နၧၩလဖၪနီၪ ၥၭနၪ့ဘၪလဂ့ၩႉ ၦအနံဝဲၫ့နၧၩလဖၪနီၪဆ့ မၩထံၩမၭၥိၭနးဆိၭလဂ့ၩႉ ၦအနံဝဲၫ့နၧၩ ၦအအီၪကီၪနၧၩ ကအီၪနီၪလီၫႉ တခၩၦၡၩကလီၩ နၧၩနးမံၩ့ ၥၭအုၭလဂ့ၩႉ အ့ၪမွဲနကလီၩ့ၥၭအုၭနီၪ နဆၧၥၭမၧၫ့ဖၧၩ့ ဆၧမုၬဆၧၡူၪမွဲကအီၪ အ့ၬႉ
နဘၪမၩဆၧအီၪလဖၪနီၪမၩႉ ဘဲၫကထီၩ့လၧနဖီၫတၧၩ့အဂးနီၪ ကျ့ၭစၨၩလ့ၩမၩ တီၩတီၩလီၫႉ မွဲလၧနၧၩအကၠီၩ့ အ့ၪၦဂူၫဂၩလဘၪထံၭဘၪနဲၪ့ဘၪနီၪန့ယူၭႉ နဆၧၥၭမၧၫ့ အဖၧၩ့ ထၧၩ့နလမိမၩလၧၩ့ဘၪဆၧနးမံၩ့ နၥၭလၩ့ယွါမွဲကအီၪဆ့ႉ လါနၫ့နဘၪၥၭခိအ့ၬႉ ဘဲၫနၧၩအၥိၭ ၦၡၩကိဂၩဒ့ၭနီၪ ကဲၪယံၩယါဘနီၪဆ့လီၫႉ နၪ့စဲၪ့ထၪ့ခွံၬ နၥုၪ့လၩ့ဆါၥၭလၩ့ဆါလဖၪနီၪဂီၩ့ ဆုးလ့ၩထၪ့စိၩလၧအမ့ၬယၫ နၧၩယီၩနမွဲၦအၥုၪ့ဆီၪ့ ၥၭဆီၪ့ကဂၩလီၫႉ ဆၧမၩနၧၩ့ခၫ့ဖျီၫ့ကနၩ့နၩ့နီၪ မၩခွါယိပဆၧအွံၪၥၭဆၧၩ့ ဒဲ ပဆၧၥၭ ဆၧၩ့လဖၪဂီၩ့မၬ ဂဲၫထီၩ့စိၩလၧပအီၪနီၪလီၫႉ
လၧခဲၫ့ထုၬ ယမိလီၩဘၪနီၪဘိၭ လီၩ့ဎွါယိထၪ့ လီၩ့ဎွါဖီထၪ့ ဆၧဂၩ့မၧၫ့လၧ အဖ့ၪ လၫ့ပၧၩၥုၪ့ၥၭဂဲးဘၭလဖၪႇ လံၬလၧအဖ့ၪလၫ့ပၧၩ ဆၧၥုၪ့ဆီၪ့ၥၭဆီၪ့လဖၪနီၪလါဆံၭႉ ဂီၩ့နီၪ ယိလၩ့နဆၧဆီၪ့ဆၧချဲၫ့ႇ မံၫအခံၫ့တီၩတီၩႉ အၪ့အခံၫ့တီၩတီၩ ဒဲ မုကိနံၩနီၪ ခၫ့ဂၬခွံၬဒၪလၧ ဆၧမုၬလၭၥၭဎွံၪလါဆံၭနဲၪႉ