လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪ မွဲဝ့ၫဒၪ ဆၧမုၬဆၧလၩ ကဘၪအီၪလၧ ကဆါဎြံၬအဂဲး အကၠီၩ့နီၪလီၫႉ ပအီၪၥၭမၧၫ့လၧ ကဆါဎြံၬစွါဘဲၫ ပကန့ထၪ့ဘၪဆၧမုၬဆၧလၩ ကိၭကၠၪနီၪလီၫႉ ပဘၪဒၪဆၧၫ့ယၫ ဆၧကၪဆၧဂဲၩဒၪဆၧ ပၥၭခံဖၧၩ့ ဆၧၡူၪဆၧဘၩ အီၪအခံၫ့ ပကဒၪဘၪနီၪလီၫႉ ဆၧအယီၩနီၪ ပအီၪၥၭမၧၫ့လၧ ကဆါဎြံၬအကၠီၩ့နီၪလီၫႉ
အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဆၧလၧဆၧမုၬဆၧလၩနီၪ မွဲဝ့ၫဒၪ ၥၭမုဆံၫ့ဎံၪ အၥၪအဖီၫနီၪလီၫႉ ဆၧလၧပကဲၪၦၡၩနီၪ ဆၧမုၬဆၧလၩ ကအီၪကိၭကၠၪ ကန့ဧၪႇ ပအီၪၥၭမၧၫ့ဂၪ့ခိၪဖၧၩ့ယီၩ ဆၧအီၪဂုးခၧၫ့အီၪနးမံၩ့အ့ၬႇ ပကစံၭဆၧၫ့ထဲၩ့ ကိၭဂၩမွဲလါနၫ့ႇ အ့ၪပအီၪၥၭမၧၫ့န့လၧ ကဆါဎြံၬနီၪ ပမၩဆၧအယီၩ ကန့ကိၭကၠၪနီၪလီၫႉ အနီၪစွါဘဲၫႇ ပအီၪၥၭမၧၫ့ ဂၪ့ခိၪဖၧၩ့ယီၩ ဆၧအီၪထီးအလူၬနီၪ ဘၪမနီၪလဲၪ ဘၪလၩ့မၬခွံၬဖျဲၪဖျဲၪနီၪ ပကဘၪအၪ့ဎၬဆီၫ့မီၪ့ကၠၧၫ့ကၠၧၫ့နီၪလီၫႉ
အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဆၧအဲၪဆၧကွံၩႇ ဆၧဖံၭၥိၭလိၬၥၭႇ ဆၧအီၪဆီၪ့အီၪချဲၫ့ ဒဲ ဆၧဂဲးဘၭၥံၪနီၪ လၩ့မၬခွံၬဒၪပၧၩနီၪလီၫႉ ဘၪမနီၪလဲၪ ဆၧအယီၩၥံၪဘၪလၩ့မၬခွံၬဖျဲၪဖျဲၪ ပကလီၩဘၪကိၭဂၩနီၪလီၫႉ ဆၧအယီၩၥံၪ အ့ၪလၩ့မၬခွံၬ လအီၪဘၪ စွါဘဲၫ ပအီၪၥၭမၧၫ့ဖၧၩ့ ဘျဲၩထၪ့ၥၭကအီၪႇ အ့ၪလမွဲဘၪ ဆၧလၧၫ့ဆၧဎွ့ၩအီၪအ့ၬ ပၥၭခံဖၧၩ့ ကကဲၪထၪ့ဘဲၫယီၩၥိၭနီၪလီၫႉ နၥံၪကဘၪထီးန့ထၬ အရ့ၩဎိၩထုၬ ဆၧကမံၩ့နီၪ နၥံၪလီၩဎွါ ဆၧအဲၪဆၧကွံၩအခံၫ့ႇ ဆၧမုၬဆၧလၩ့အခံၫ့ႇ ဆၧၡူၬဆၧမုၬအခံၫ့ႇ နၥံၪအၥၭအခံဖၧၩ့ ဆၧၡူၪဆၧဘၩ လန့ဘၪနီၪလီၫႉ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ နၥံၪအၥၭခံဖၧၩ့ ဆၧမုၬဆၧလၩ ကအီၪအဂးနီၪ နၥံၪကဘၪအီၪလၧ ကဆါဎြံၬကၠၧၫ့ကၠၧၫ့ လိၪဝ့ၫဒၪအကၠီၩ့ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့အီၪ ဝ့ၫဒၪ ဘဲၫယီၩၥိၭအဂဲး ယရၩလၩ့န့အ့ၪဘၪနၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭ ထီးအလူၬ မွဲနၥံၪလၧၫဎွ့ၩဝ့ၫဒၪလၧ ကဆါဎြံၬအဆၧအဲၪဆၧကွံၩ လါဆံၭႉ