လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မံၩ့ဎိၩၥၪဖျီၪ မုခွၫလၧအအီၪအနိၪ့ အဆၧရၩလၩ့ဖၧၩ့ မုကနံၩယီၩ ယအဲၪဒိၭ ရၩလၩ့န့အ့ၪဘၪနၥံၪနီၪ မွဲဝ့ၫဒၪ ၦဆံၫ့ဎံၪ John Berchmans SJ အဂဲးအကၠီၩ့နီၪလီၫႉ ၦဆံၫ့ဎံၪ John Berchmans SJ ယီၩ အီၪဖျဲၪလၧ နံၪ့ (၁၅၉၉) နံၪ့ လၧဝံးဆံၭခိၭကဝံး နီၪလီၫႉ အဝ့ၫၥံၪအဂံၪ့ဒီၪ့နီၪ ၡၪ့အၪမၬဒ့ၭနီၪလီၫႉ ဆၧနီၪအကၠီၩ့ႇ အဝ့ၫၥံၪယီၩ ဘၪမၩ ၦဆၭခၪ့ဖံၭအဆၧမၩနီၪလီၫႉ အဝ့ၫယီၩ ခီၫလၧဖိၪၥၪ အခံၫ့ဒၪအိၩ လ့ၩဘၩကၠဲၬကိၭနံၩနီၪလီၫႉ အဝ့ၫယီၩလဂီၩ (၅) နၫရံၫအခံၫ့စွါဘဲၫ လ့ၩထီၩ့လၧၥရိၭဖၧၩ့နီၪလီၫႉ
လကၭဒ့ၭဘၪႇ အဝ့ၫယီၩ ဆၧယူၭယၪ့အီၪလၧ ကိၪဘိၪ့ဆံၫ့ဎံၪ အၪမၬဒ့ၭအကၠီၩ့ အထံၩအၥိၭၥံၪ အဲၪဒိၭန့ဘၪအဝ့ၫနီၪလီၫႉ အဝ့ၫအၥၭအီၪ (၉) နံၪ့နီၪ အမိမိ ဘၪစၭထၪ့ထိး ဆၧဆၫနၧၩ့ထၧၫ့နီၪလီၫႉ အဝ့ၫအီၪဂဲၫထဲၩ့လၧ ကၠီးစွါဘဲၫ ဘၪယိအမိမိနီၪလီၫႉ အဝ့ၫယီၩ အၥၭလုအီၪ ကကဲၪၥၫ့ခၫအကၠီၩ့နီၪ ဘၪလ့ၩအီၪလၧ ၥၫ့ခၫအီၪ (၃) နံၪ့ မၩလိၪလံၬအနံၪ့ယံၬထၪ့ဂီၩ့ ကဲၪထၪ့ Jesuit ၥၫ့ခၫကပၩနီၪလီၫႉ အဝ့ၫယီၩ ဆၧၥ့ၪယၫနၪၥ့ၪႇ ဆၧကိၪ့ၥ့ၪကိၪ့ဘၪအီၪအၪမၬဒ့ၭအကၠီၩ့နီၪ ဆၧဘိၪ့ဆၧဘၩဂူၫဂၩ အ့ၪလီၩကဆါဎြံၬအကၠီၩ့ လဂ့ၩဘၪစွါဘဲၫ အဝ့ၫယီၩ ချဲၩ့ဆၧၫ့လီၩထဲၩ့ဆၧနၧၩ ကိၭကၠၪနီၪလီၫႉ
လယံၬလမီးဘၪႇ အဝ့ၫယီၩ ဘၪထိးဆၧဆၫနီၪလီၫႉ အဝ့ၫကၥံၫထီနီၪ အမ့ၬၥၫနီၪယိထုၪ ထုၪ့စူၪယၫဂီၩ့ ၥံၫဖီၩ့ခွံၬဝ့ၫဒၪနီၪလီၫႉ ၦဆံၫ့ဎံၪ John Berchmans ယီၩ ၥၭဘၪၥံၪ ဒဲ ၦလၧ အဲၪနးမၫရံၫယၩၥံၪအဂး ပဒၩ့ထၬအ့ၪဝ့ၫ မွဲဝ့ၫဒၪ ၦဆံၫ့ဎံၪကပၩနီၪလီၫႉ အဲၪကွံၩဘၪ ထၧၫ့ဖုဝဲထံၩၥိၭ ထီးအလူၬၥံၪဧ့ႇ ဘဲၫၥိၭနၥံၪကထီးန့ထၬ ၦဆံၫ့ဎံၪ John Berchmans အဂဲးအကၠီၩ့ ကန့အဂး ယရၩလၩ့န့အ့ၪဘၪနၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ အဲၪကွံၩဘၪ ထၧၫ့ဖုဝဲ ထံၩၥိၭထီးအလူၬႇ မွဲနၥံၪလၧၫ့ဎွ့ၩဝ့ၫဒၪလၧ ကဆါယွၩ အဆၧအဲၪဆၧကွံၩလါဆံၭႉ