ပကဲၪၦၡၩမၬနီၪ လၧပမိမၩလဖၪအဂး ကဘျၩ့လမွဲဘၪကဘျၩ့ ပဘၪဆၪ့လၩ့ၥၭ လၧၦၡၩအဖၫ့လၬဘဲၫနီၪ ကအီၪယံၩယါကိၭဂၩဒ့ၭလီၫႉ ပဂးအ့ၪလိၪတၡါနီၪ ကြၨၭပဘၪ ဆၪ့လၩ့ၥၭအလးစွါဘဲၫ မွဲပကဘၪဆၪ့လၩ့ၥၭလီၫႉ

လါနၫ့ဂ့ၩနီၪ ၦလၧလမိဖ့ၪလၫ့ဘၪပၧၩလဖၪအအီၪ အ့ၪမွဲပကထိးဆၪ့လၩ့ဘၧၩ့ၥၭ စွါဘဲၫ ပလူပဎွ့ၩမွဲကလၩ့နီၪလီၫႉ ၦလၧလမိမၩထံၩမၩၥိၭဘၪပၧၩလဖၪနီၪ ပဘၪမၩထံၩမၩ ၥိၭထဲၩ့မလိၪဧၪအ့ၬႉ ဆၧအယီၩနီၪ ပကဘၪအီၪက့ၪထၪ့ထီၫပၥၭ မွဲယမိလီၩဘနီၪအ့ၬနဲၪႉ ယမိလီၩနီၪ ပကဘၪအီၪက့ၪလူဎွ့ၩဒိၪလၩ့ပၥၭအဂးခီၫႉ

ၦၡၩကနၩ့နၩ့မုၪ ပဘုၩရုၫဘုၩဆူၫအဝ့ၫၥံၪ လူၬဂဲးလူၬဘၭလါနၪ့ ဒၪထၪ့ပလူပဎွ့ၩ နးဆိၭအ့ၬႉ ဆၧနီၪအကၠီၩ့ ဆၧအလးကိၭလးဒ့ၭအဖၫ့ခိၪ မၩလၩ့နၥံၪအနံၪ့လဂ့ၩႉ ပကဲၪၦၡၩ ကိၭဂၩဒ့ၭနီၪ ပလူပဎွ့ၩအီၪကၠၭကိၭဂၩႉ ဆၧနီၪအကၠီၩ့ အီၪက့ၪဖိၫလိၫလၩ့နၥံၪအၥၭ အ့ၪၥ့ၪ ဘီၪနဲၪႉ ၦလၧအီၪက့ၪထးခွံၬပၧၩကဂၩနီၪ ဖျါခွံၬဝံၬႉ ၦလၧလမိခိၭနၪဘၪ ပဆၧချဲၩ့ကဂၩနီၪ ကျ့ၭစၨၭၥီၪ့ၥၫ့လဂ့ၩႉ ၦလၧဒၪပၧၩလန့ဘၪလဖၪဘဲၫဒၪပၧၩကန့ထၪ့အဂး ကျ့ၭစၨၭထၪ့ဘၪ လဂ့ၩႉ ကျ့ၭစၨၭထၪ့ဘဲၫနကအိၭလၧ ၦၡၩထီးလူၬလဂ့ၩႉ အီၪဒၪဆၧကပွံၩဂီၩ့နၥၭ ဒဲ နၥၭက ၡၪ့ဂီၩ့လီၫႉ ကယဲဆၧနးမံၩ့နီၪ ကျ့ၭစၨၭမၩဒၪနၧၩကဂၩ အ့ၪနမၩလန့လၧၩ့ဘၪ အ့ၪနမၩလၥ့ၪ လၧၩ့ဘၪကကၠၪမၬ အၪ့န့ထၪ့ၦဂူၫဂၩအဆၧမၩဆၧၩ့လါဆံၭႉ ဘၪန့လဲၪနီၪဘိၭ ဂၪ့ခိၪချိၫ့ဖၧၩ့ ဆၧန့အပျီၩဘနီၪ အီၪနးမံၩ့အ့ၬႉ ကမံၩ့လမွဲဘၪကမံၩ့နီၪ နၥံၪကဘၪဖ့ၪဆၧၫ့ထဲၩ့လီၫႉ အ့ၪကဲၪၥ့ၪနီၪဘိၭ ကျ့ၭစၨၭထၪ့ ထၧၩ့နၥံၪဘၪလီၩ့အၪ့န့ ဆၧမၩဆၧၩ့လၧၦဂူၫဂၩအအီၪ လဂ့ၩႉ အနီၪစွါဘဲၫ ပဘၪယိၦၡၩအမ့ၬလိၪနးဂၩလၧၩ့အ့ၬ. ပဘၪထိးဆၪ့လၩ့ပၥၭ လၧၦၡၩ အအီၪ မလိၪလၧၩ့ဧၪအ့ၬႉ ဆၧနီၪအကၠီၩ့ ဆၧအလး ကနၩ့နၩ့အဖၫ့ခိၪ အီၪမၩဆၧၫ့ဆၧၫ့လီၫႉ