ၦမုၪနၩ့ဖိၪဎံၪလၩနီၪ ထဲၩ့ကိၭန့စခးချံၪ့လၧ အတဝၫ့အခၫ အီၪယံၬကဆိ ထဲၩ့ထီၩ့လၧၡိၬကျၩ ၦမုၪနၩ့နီၪ အိၭခၬၥံၪ့ထဲၩ့ ကထဲၩ့ဂီၩ့ ခွံၬလၩ့ဝ့ၫလၧ စခးချံၪ့အမ့ၬယၫကထုၪ့ဎး ကဲၪထၪ့ မုၬၡူၪဎံၫလၩဝ့ၫ တဝၫ့ကတဝၫ့နီၪလီၫႉ ၦမုၪနၩ့ဖိၪယီၩ လီၩနဲၪအ့ၪ စခးချံၪ့အဝ့ၫအတဝၫ့အဎံၫအလၩဂီၩ့ မုမ့ၬဂဲၫလၩ့ဖုၪအခၫ စခးချံၪ့ကဘၪထဲၩ့ဒံၭဘိၭ ခဲၫ့ကံၭဝ့ၫဆၧကခံၭချုၭန့တၭ အၪ့မၧၫ့ဝ့ၫထဲၩ့ နီၪလီၫႉ ဘဲၫစခးချံၪ့ ကထဲၩ့ထီၩ့ဖျဲၪဖျဲၪအဂးဆ့ ဖ့ၪလၫ့အ့ၪဝ့ၫ ၥံၪ့အဝံကကုၭနီၪလီၫႉ ၥံၪ့ဝံအစီၩ့အမၩ့အကၠီၩ့ စခးချံၪ့အီၪကဆိ ထဲၩ့ထီၩ့ဂံၪ့လီၫႉ စခးချံၪ့လဂၩ ထဲၩ့ထီၩ့လၧဂံၪ့ လါနၫ့ မံၫန့အ့ၬ အဝ့ၫဒၪဖျးစိၩဒၪ ၦမုၪနၩ့ဎံၫလၩအမ့ၬဖိၪနီၪလီၫႉ

            ဆၧဖၩ့လၫ့အခၫ စခးချံၪ့လဂၩ ဂၭထုၪ့လၫ့လဂီၩ့နၭခူၭဂီၩ့ လ့ၩလၧအဎုၭဖၧၩ့လီၫႉ အဝ့ၫလ့ၩထီၩ့လၧ အဎုၭဖၧၩ့အခၫ နၧၫ့ကၠၪဘၪဆၧကမံၩ့တၭ အၥၭချံၪ့လၩ့ဝ့ၫလီၫစွါဘဲၫႉ အီၪယံၬကဆိ ၦမုၪနၩ့ဖိၪနီၪ ဂဲၫဖျါလၩ့ ထၬအခိၪဂီၩ့ န့ဘၪစိၩစခးချံၪ့လီၫႉ အနီၪတၭ စခးချံၪ့ဝ့ၫ လၧဆၧမုၬလၩၥၭဎွံၪအဖၧၩ့ လ့ၩလၩ့ဘူၭ လၧၦမုၪနီၪဂီၩ့ ကလ့ၩဖီၪ့ဝ့ၫအစူၪတၭ ၦမုၪနၩ့ဖိၪနီၪ စံၭ ထုၪ့နၥၭခလူၭ ဝဲခွၫဧ့ႇ မၩဘၪထဲဖုမုၪလဂ့ၩ အီၩႉႉႉမုနၩအိၩ နမံၫန့အ့ၬ နဒၪဒၪဖုမုၪအမ့ၬမွဲအ့ၬဧၪႉ ဖုမုၪၥ့ၪယၫအကၠီၩ့နီၪ ဘဲၫဝဲခွၫအဆၧအဲၪမ့ၪ လလၩ့ဖံၭအဂး ဖုမုၪဂဲၫနဲၪဖျီၪအၥၭလီၫႉ အခံၫ့နီၪန့နၭအ့ၬႉ အီၪက့ၪထၭနၥၭချံၪ့ချံၪ့ႉ ကနံၩ နကအီၪဘၪလၧ ဖုမုၪအနဲၩ့ထံၭလီၫႉ

            စခးချံၪ့စံၭဆၧၫ့ထဲၩ့ ဖုမုၪလီၩနီၪ မွဲ မုနၩအိၩယမံၫန့နးကၠၪအ့ၬႉ ဖုမုၪၥ့ၪယၫအကၠီၩ့နီၪ ဂဲၫလၧ ဝဲခွၫအီၪႉ ဝဲခွၫယီၩ နၧၩ့အၥၭအ့ၬ ဖုမုၪကလီၩနၧၩ ကဘၪခိၭနၪဖုမုၪအဆၧချဲၩ့အီႉ ကဲႉႉလီၩနးထုၪ့ ဖုမုၪ မနီၫလဲၪႉ လၧဖုမုၪၥံၪအတဝၫ့နီၪ ၦလၧအဂ့ၩန့ဖုမုၪအီၪ အၪမၬဒံၭလီၫႉ ကထုၪ့ဎး စခးချံၪ့စံၭဆၧၫ့ထဲၩ့ အနီၪ ဘၪမနီၫလဲၪႉ ဘၪမနီၫလဲၪစွါဘဲၫ နဆၧအဲၪလၧဂုးခၧၫ့ဘၪနီၪ နအီၪကၠၧၫ့ကၠၧၫ့လၧ ယၧၩန့အ့ၬ ယလီၩဆိၪထၬနၧၩႉ ဘဲၫယီၩအခံၫ့အီၪလၧၩ့အ့ၬ ယကဘၪထဲၩ့လီၫ အ့ၪဆၧကၠုၪ့နၥၭဂဲၫဂၭလၧ တဝၫ့ စံၭဝ့ၫဘယီၩဂီၩ့ ၦမုၪနၩ့ဖိၪယီၩ လၩ့မါဝ့ၫဒၪလီၫႉ လၧဆၧလၩ့ဆၫ့အဖၧၩ့ စခးချံၪ့လီၩ့ကိၭထးလၧအလးခဲၫ့ ၦၡါဖိၪယီၩ ကဂဲၫကဲၪထၪ့ဘဲၫၥ့ၪလဲၪနီၪ လၧခဲၫ့မုနွ့ၫမၬ ယကဆုးလီၩဖ့ၪနဲၪထဲၩ့ဘၪနၥံၪနဲၪႉ