ထၧၫ့ဖုဝဲမုၪခွၫၥံၪဧ့ႇ ယမိအၪ့စၪ့ဘၪနၥံၪ ဒီၩ့ဝိၩၥံၪနီၪ မအၪ့န့ထၬ ခိၪလၩ ဖျိၩ့ တရူၭဒဲ ခိၪလၩဘွၩၥံၪအမံၩ့ဧၪႉ အၪ့န့ထၬဝ့ၫအ့ၬႉ ဆၧအယီၩ ၦဖျိၩ့ဆၨၩဖိၪၥံၪ ထၧၫ့ကၠၭအၥၭဧၪႉ အၪဒၪဆၧ ၦဖျိၩ့ၥံၪယီၩ ပအၪ့န့ထၬ ဒီၩ့ဝိၩအမံၩ့ႉ ၦဖျိၩ့အမံၩ့ဘနီၪ အီၪဖိၬနီၪအ့ၬႉ လါနၫ့ၦဖျိၩ့ဆၨၩဖိၪၥံၪယီၩ မွဲၦလၧအအီၪက့ၪဒိၪ ဆၧဘိၪ့ဆၧဘၩဒဲ ဆၨၩဆၬလီၫႉ မွဲၦၡၩအဆၨၩၥံၪနီၪ လဂ့ၩဘၪမွဲအ့ၬႉ ပဂဲၫကဲၪထၪ့ ဆၨၩကဆၨၩ ပကဘၪအဲၪ ပဆၨၩ ပကဘၪအီၪက့ၪဒိၪနီၪ မွဲပမူၩဒၩလီၫႉ
ပခးပယၩ့ယီၩ ခီၫလၧဖျိၩ့ဖျိၩ့အိၩ ဆၧအီၪထၬဝဲၩကမံၩ့နီၪ မန့လဲၪစွါဘဲၫ အ့ၪမွဲၦအမံၩ့လမွဲဘၪ ဒီၩ့ဝိၩနီၪ ကဲၪပဒိၪ အပမၩဆၧဖိၪန့အ့ၬႉ မၩဘၪဝ့ၫအ့ၬႉ ပအၪ့ဎၬယိ ထံၪထံၪနီၪ ၦလၧလမွဲဘၪဒီၩ့ဝိၩအဆၨၩနီၪ အလးအကျဲၩန့အ့ၬႉ အနီၭဘိၭ ပခးယီၩ ဒီၩ့ဝိၩအခးလဲၪ ခးပယၩ့လဲၪႉ ဆၨၩဆၬဖၭဒိၪ ၈ ဆၨၩ အီၪစူၭကီၪ့ဎိၭလၩ့ ခးပယၩ့ခးစၧၩ့ကီၪ့ မွဲအ့ၬဧၪႉ
အနီၭဘိၭ မုဆၫကနံၩယီၩ ပကဲၪထၧၫ့ဖုဝဲဖျိၩ့ဆၨၩဖိၪလဖၪ ပကြၨၭကိၭထဲၩ့ပမံၩ့လၧ ဖျိၩ့ခီၫဧၪႉ ဆၧအယီၩနီၪ ကမွဲဝ့ၫ ပမူၩဒၩကိၭဂၩလီၫႉ ပကဲၪဖျိၩ့ဘုၭဒၭၥံၪနးဆ့ ဘဲၫလုၫလါအီၪအၥိၭ ဆၧမၩလၩမၩဖၩ့ၡီၩ့ထၪ့ ဆၧဖ့ၪလၫ့ဖိၪၥၪအမံၩ့ (ကင်ပွန်းတပ်) အဘိၪ့အခၫ ပဖ့ၪလၫ့အ့ၪလၧ ၦဖျိၩ့အမံၩ့န့မွဲအ့ၬဧၪႉ စံၭမၬချၭ – မောင်မျိုးချစ် အလးနီၪ စအဲၪဆၨၩႉ အ့ၪမွဲပထၧၫ့ဖုဝဲဖျိၩ့ဆၨၩမွဲဝ့ၫ န့ခၠၩႇ ကဲၭၥလံၬဆၧဘိၪ့ဆၧဘၩဖိၪၥံၪနးဆ့ ဖိၪၥၪဆံၭၥံၪဒိၭန့ ဆၧၥူၪဝၭဆံၫ့ဎံၪအထီနီၪ ဘၪဖ့ၪလၫ့ဝ့ၫပဆံၫ့ဎံၪအမံၩ့ႉ ဒီၩ့ဝိၩအမံၩ့ ဖျိၩ့အမံၩ့အၪ့န့ဝ့ၫန့အ့ၬႉ ဂၠိၩဇဲၭ မၫရံၩယၩ ၥံၪနီၪ မွဲပဆံၫ့ဎံၪအမံၩ့လီၫႉ ၦၡၩၥ့ၪထၬအၪလၧ ဎရံၬဖိၪအမံၩ့လီၫႉ ပကဲၪဖျိၩ့ဆၨၩဖိၪလဂၩ ပဆံၫ့ဎံၪအမံၩ့ယီၩ ပကိၭထဲးဎုၬလၧ ၦဖျိၩ့အမံၩ့ မွဲဝ့ၫ စံၭမၬချၭ – ဂၠိၩဇဲၭအဲၪခးမွဲဂ့ၩ မၫရံၩယၩအဲၪဎံၫ မွဲဂ့ၩ ပကိၭထဲးဎုၬပယီၩစွါဘဲၫ ကမငါအၪမၬနီၪလီၫႉ
ဆၨၩဂူၫဂၩၥံၪ မွဲဝ့ၫ ကခၠ့ၫ ၥံၪ ခၠ့ၩၥံၪနးဆ့ အဝ့ၫၥံၪအမံၩ့လၧ ဒီၩ့ဝိၩခီၫ အီၪဖိၬနီၭအ့ၬနီၪလီၫႉ မွဲဆၧဘဲၫနီၪ ပကဲၪဖျိၩ့ဖိၪၥံၪနးဆ့ ဆၧယီၩ ကြၨၭပအၪ့န့ အဒီၩ့အထ့ၬဂီၩ့ ၦလၧအမံၩ့လၧဖျိၩ့ခီၫလအီၪဒံၭဘၪနီၪ ပကကိၭထၪ့ထဲၩ့ပမံၩ့လၧ ဖျိၩ့ခီၫဂီၩ့ ၥၭဘၪၥံၪလၧအထီလၧယၫ ကကဲၪထၪ့မိဖါလဖၪၥံၪဧ့ ကျ့ၭစၨၭကိၭထဲၩ့နၥံၪအဖိၪအမံၩ့လၧ ဖျိၩ့ခီၫအကၠီၩ့ ယမိဖ့ၪကိၪ့ဖ့ၪတဲၩ့ဘၪနၥံၪ လၧ ဆၧအဲၪကွံၩဎိၩဒိၪအဖၧၩ့နီၪလီၫႉ ယၧၩနီၪမွဲ နးဆၩ့ဎံၫဘွၩလီၫႉ ဆၧခိးဆၧတၩႉ