အမေရိကန်ခးဒိၪအိၫဘၩမၩအမၫ မံၫၡဲၫအိၫဘၩမၩနီၪ စံၭယံၩယါဝ့ၫဒၪ ဆၧချဲၩ့အီၪ ကမီၪ့ႉ ၦၡၩအမုၪၥံၪ အ့ၪမွဲနၥံၪဘၪထိးအီၪက့ၪထးခွံၬၥၭစွါဘဲၫ လၧဆၧၥုၪ့ဎွံၪၥၭယီၫဖၧၩ့ ဂဲထုၪ့ဒဲၩနၥံၪအစူၪအဂဲး အဝ့ၫယီၩ လီၩယံၩယါဝ့ၫဘဲၫနီၪႉ
အနီၪအခၫ ပကအၪ့ဎၬထၪ့ဘဲၫယီၩဘီၪနဲၪ ဆၧပဘၪထိးခွံၬၡိၬထးပၥၭယူၭဘိၭ ပက ဘၪဆၧမုၬပၥၭဒံၭဧၫႉ အ့ၪပကအၪ့ဎၬထံၪထံၪဆၭဆၭစွါဘဲၫ အဝ့ၫလီၩနီၪမွဲအၡါမၪႉ ၦၡၩ လအဲၪလၧၩ့ဘၪပၧၩအကၠီၩ့ အဲၪဘိၩ့ပၧၩ ၦၡၩလအဲၪလၧၩ့ဘၪပၧၩအကၠီၩ့ န့ထဲၩ့လခဲၫ့ကဂၩႉ အနီၪဘိၭ အဝ့ၫယီၩအဲၪပၧၩလၧၩ့အ့ၬအကၠီၩ့ အ့ၪပဘၪ ထိးခွံၬၡိၬထးပၥၭအခၫ ပကဘၪ ဆၧမုၬပၥၭဂ့ၩဘၪစဲၪ့ႉ အၪ့ဎၬယိဘီၪနဲၪ စံၭမၬချၭ အဝ့ၫယီၩ ခွံၬၡိၬခီၫခွံၬၡိၬ ထးပၧၩန့ဧၪအ့ၬ အဲၪဘိၩ့ပၧၩဒံၭစွါဘဲၫ ခွံၬၡိၬပၡၩန့အ့ၬ ခွံၬၡိၬပၧၩန့အ့ၬ အယီၩမၬကကဲၪထၪ့ ဆၧကၪဖၭဒိၪ မွဲအ့ၬဧၪႉ ဆၧနီၪအကၠီၩ့ ၦခွၫကဂၩလအဲၪလၧၩ့ဘၪပၧၩဂီၩ့ အ့ၪခွံၬၡိၬထးပၧၩစွါဘဲၫ ပက ဘၪဆၧမုၬပၥၭ ပကဘၪစံၭခိးစံၭတၩလၧအဝ့ၫၥံၪခီၫဒံၭႉ နၥံၪဘၪမၩဂၭဂီၩ့ခွံၬ နၥံၪအဆၧ ၥၭမၧၫ့ အထီလၧယၫအလးအီၪနးစီၪ့အ့ၬႉ
လၧပၥၭဆံၭဒံၭအခံၫ့ လၧပဆီၪ့ချဲၫ့ဒံၭအခံၫ့ လၧပကျ့ၭစၨၭမၩဆၧမၩန့ဒံၭအခံၫ့ ပၥ့ၪ ယၫထၪ့အဝ့ၫအဂဲး အကၠီၩ့ လၧအခီၫပယီၫလအီၪဘၪအဖၧၩ့ လၧဆၧၥုၪ့ၡၪ့ၥၭၡၪ့အဖၧၩ့ ခီၫခီၫပကဘၪအီၪလၧအဝ့ၫအနဲၩ့နီၪ ပစဲၪ့ထၪ့ခွံၬဂီၩ့ လၧဆၧပျီၩဖျ့ၭဖၧၩ့ ပအီၪဒၪပၧၩကဂၩ လၧပထီလၧယၫအဂး ကြၨၭပမၩဝ့ၫဒၪလဖၪနီၪ မၩထၪ့ဂီၩ့ အီၪမၧၫ့ထၪ့ထဲၩ့နၥံၪအၥၭလၧ ဆၧၥုၪ့ဎွံၪၥၭဎွံၪအဖၧၩ့နီၪႉ
ဂၪ့ခိၪချိၫ့ဖၧၩ့ ဆၧအကၧၩ့ဒိၪန့ ဆၧအဲၪဆၧကွံၩ အီၪဝ့ၫဒၪအၪမၬဒံၭႉ ဘဲၫၦၡၩ လတီၩလီၩ့ဘၪ ပဖၫ့ခိၪအီၪအၥိၭ ၦၡၩအဲၪပၧၩလၧဆၧအဲၪအတီၩ ၦအတီၩလီၩ့လၧပဖၫ့ခိၪ နီၪ မွဲကအီၪဆ့ႉ ဆၧနီၪအကၠီၩ့ ဘၪၥၭခိဆၧ အီၪနးမံၩ့အ့ၬႉ
မုၪမွဲဂ့ၩ ခွၫမွဲဂ့ၩ အ့ၪမွဲ နၥံၪအဆၧအဲၪတၩ့ၥံၪ နၥံၪအမၫအဝၩၥံၪ အဲၪဘိၩ့နၥံၪမွဲဂ့ၩ ဒၪထဲၩ့အၥၫ့မွဲဂ့ၩ အ့ၪခွံၬၡိၬထးနၥံၪအခၫ ၥၭအုၭဒၪကဆိကလးဖိၪလီၫဂီၩ့ စံၭခိးစံၭတၩထဲၩ့ အဝ့ၫၥံၪနီၪလါဆံၭႉ အ့ၪမွဲပၥၭထ့ၬနီၪ ကၥၭကဘၪဆၫကကၠၪလီၫ အ့ၪမွဲပၥၭလထ့ၬ ဘၪနီၪ ဘိၭ ပၥၭကဘၪဆၫကဘျၩ့ဘျၩ့ ဆၧနီၪအကၠီၩ့ ယၫ့ၥၭလၩ့ ဒၪနၥံၪအၥၭနီၪဂီၩ့ ကြၨၭပၥၭ ထ့ၬအလးနီၪ မၩထ့ၬဝံၬ ထၧၩ့အန့လါဆံၭႉ
နးအဲၪဖီၫဘွၩ