ၦၡၩအယီၩ ပကြၨၭအဲၪအကၠီၩ့ ပအဲၪ ကဲၪဘၪဘဲၫနီၪလဂ့ၩႉ ပကြၨၭအဲၪအကၠီၩ့ ပအဲၪ ဆၧၫ့ထဲၩ့ဂီၩ့ ပဒၪထၪ့ အဝ့ၫဆၧဂဲးဆံၭဘၭဆါလဖၪအခၫ ကဲၪထၪ့ထဲၩ့ဆၧမ့ၬလဲၩၥ့ၪနီၪ လီၫႉ
ပဘၪအီၪလၩ့စဲၪထး ၦကဂၩလီၫအကၠီၩ့ ပအဲၪဆၧၫ့ထဲၩ့ၦၡၩ ကဲၪဘၪဘဲၫနီၪလဂ့ၩႉ ပအဲၪဆၧၫ့ထဲၩ့အဝ့ၫဂီၩ့ အ့ၪပၥုၪ့ၥၭလဘၪလၩ့ဎိၭဘၪကကၠၪ ပကလၩ့စဲၪနၭန့အဂုအိၩဒံၭ နီၪလီၫႉ
ပယိအဝ့ၫနးခီၫ့မိၡါဂီၩ့ ပအဲၪဆၧၫ့ထဲၩ့အဝ့ၫ ကဲၪဘၪဘဲၫနီၪလဂ့ၩႉ ပယိထၪ့နးခီၫ့ မိၡါဂီၩ့ ပအဲၪဆၧၫ့ထဲၩ့အကၠီၩ့ ပဒၪထၪ့အဝ့ၫအၥုၪ့အုၪၥၭအုၪလဖၪအခၫ ဆၧအဲၪနီၪ ကအၪ့ လဲၩ့ထၪ့ထဲၩ့အၥၭလၧ ဆၧၥၭလိၫနီၪလီၫႉ
ပအီၪဘူၭအကၠီၩ့ ပကၠူၭထၪ့ပၥၭလန့လၧၩ့ဘၪဂီၩ့ ပအဲၪအဝ့ၫ ကဲၪဘၪဘဲၫနီၪလဂ့ၩႉ ပဘၪအီၪယဲၩထၪ့ကကၠၪ ပၥုၪ့ပၥၭကယဲၩထၪ့လိၬၥၭနီၪလီၫႉ
ပအၪ့ဎၬလၧပခိၪနူၬဂီၩ့မၬ ပအဲၪထဲၩ့အဝ့ၫ ကဲၪဘၪဘဲၫနီၪလဂ့ၩႉ ပအၪ့ဎၬလၧ ပခိၪ နူၬဂီၩ့ ပအဲၪအဝ့ၫအကၠီၩ့ ဘဲၫပထိၪတွၭထၬအၥိၭ အ့ၪလကဲၪထၪ့ဘၪအခၫ မွဲပကန့ဘၪ ဆၧစံၭဆၧၫ့အတီၩအ့ၬႉ
ဆၧနီၪအကၠီၩ့ အ့ၪပကအဲၪၦၡၩကဂၩစွါဘဲၫ ကြၨၭကဲၪဒၪလၧ အီၪဂဲၫလၧပၥၭလၬ ဖၧၩ့ ဆၧအဲၪဆၧကွံၩတၡါနီၪလီၫႉ အီၪဂဲၫလၧပၥၭလၬဖၧၩ့ဆၧအဲၪဆၧကွံၩတၡါကမံၩ့နီၪ ဘဲၫယူၭယၪ့ဆၧအဲၪတၩ့ အဆၧဂဲးဆီၪ့ဘၭဆီၪ့လဖၪန့အၥိၭ ဆၧအဲၪတၩ့အဆၧဂဲးဆံၭ ဘၭဆါလဖၪနီၪဆ့ နၪၥ့ၪအ့ၪဝ့ၫ အဲၪကွံၩအ့ၪဝ့ၫန့နီၪလီၫႉ