လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ  မံၩ့ဎိၩၥၪဖျီၪ မုခွၫလၧအအီၪအနိၪ့ အဆၧရၩလၩ့ဖၧၩ့  မုကနံၩယီၩ ယအဲၪဒိၭ ရၩလၩ့န့အ့ၪဘၪနၥံၪနီၪ မွဲဝ့ၫဒၪ Blessed Dominic Collines, SJ  အဂဲးအကၠီၩ့နီၪလီၫႉ Blessed Dominic Collines ယီၩ အီၪဖျဲၪလၧ နံၪ့ (1566) နံၪ့ လၧ ခး အဲၫ့ယၫလၫ့ နီၪလီၫႉ အဝ့ၫကဲၪၥၭဘၪ့ဖိၪအခံၫ့နီၪ ကဘၪလ့ၩမၩ ၥုၭအဆၧမၩအဂး ဘၪလ့ၩလၧ ခးစပံၫ့နီၪလီၫႉ လၧအလးနီၪ ဘၪမၩၥုၭအဆၧမၩ (၉) နံၪ့နီၪလီၫႉ အဝ့ၫယီၩ အၥၭဂ့ၩၥၭဘွၩအီၪႇ ယၫ့ၥုၪ့ယၫ့ၥၭဆၧၥ့ၪ အၪမၬဒ့ၭနီၪလီၫႉ မၩၥၫထနၫဆၧမၩအခံၫ့ ဘၪယိ ဆၧဆၫဖျဲၪဆါၥံၪနီၪလီၫႉ

လကၭဒ့ၭဘၪႇ အဝ့ၫကကဲၪၥၫ့ခၫအဂး အၥၭအီၪ (၃၂) နံၪ့နီၪ လ့ၩနုၭလၩ့လၧ Jesuit ခရၧၫ့ဖၧၩ့နီၪလီၫႉ လယံၭယမီးဘၪ အဝ့ၫကဲၪထၪ့ တပွ့ၫကပၩနီၪလီၫႉ အခံၫ့အထီဒၪအိၩ ၦဎွၩမုၪ Elizebth ပၧၩ့ဆၧအခံၫ့နီၪလီၫႉ အဝ့ၫပၧၩ့ဆၧအခံၫ့နီၪ ၦၡၩထီးအလူၬ  ဘၪဘိၪ့ထၪ့ဘၩထၪ့ အဝ့ၫဆၧဘိၪ့ဆၧဘၩနီၪလီၫႉ အဝ့ၫၥံၪ ဒၪဆၧဘိၪ့ဆၧဘၩဂူၫဂၩ စွါဘဲၫ မၩၥံၫမၩဆၫခွံၬဝ့ၫထီးအလူၬနီၪလီၫႉ ဆၧနီၪအကၠီၩ့ႇ အဝ့ၫၥံၪ ဖီၫထၬ Blessed Dominic Collines မၩနၧၩ့မၩစၪဝ့ၫဂီၩ့ ခွံၬလၩ့ဝ့ၫလၧထီၫ့ဖၧၩ့နီၪလီၫႉ

Blessed Dominic Collines အဘူၭအထံၭၥံၪလဖၪနီၪ အဝ့ၫကဖီၩ့ဖျ့ၭလၧ ဆၧၥံၫဖၧၩ့အဂး အၪ့မၧၫ့အဝ့ၫ ကျဲၩ့မၩနုၬလၩ့ၥၭလၧ အဝ့ၫၥံၪအဆၧဘိၪ့ဆၧဘၩဖၧၩ့နီၪလီၫႉ လါနၫ့ႇ Blessed Dominic Collines ယီၩ ဖျါဖျ့ၭခွံၬ အဆၧဘိၪ့ဆၧဘၩ နးဆံၭအ့ၬနီၪလီၫႉ အဝ့ၫကဘၪထိးၥံၪၥၭ အၥွံၫဒူၩအီၪတဲၩ့ဝဲၩထၬၥၭ ကိၭနံၩနီၪလီၫႉ ၦၡၩကမၩၥံၫထီအဝ့ၫအခံၫ့ လီၩထၬဆၧချဲၩကမံၩ့နီၪမွဲဝ့ၫဒၪ ယဆၧဆူၩနဲၩအဂး ယကထိးၥံၫယၥၭမုၬမုၬလၩလၩႇ လကၭဒ့ၭဘၪ လၧခဲၫ့ အ့ၪယဘၪၥၭမၧၫ့ဒ့ၭ ယကထိးၥံၫယၥၭမုၬမုၬလၩလၩနီၪအကၠီၩ့ ကိၭၡါထၪ့ဝ့ၫဂီၩ့ ၥံၫဖီၩ့ခွံၬဝ့ၫဒၪနီၪလီၫႉ

ပဆၧဘိၪ့ဆၧဘၩအဂး ပၥွံၫဒူၩကဘၪအီၪဘဲၫၥိၭ Blessed Dominic Collinesႇ ပၥၭဒူၩလအီၪဒ့ၭဘၪလါနၫ့ ပကဘၪအၪ့န့အဒီၩ့လၧအဝ့ၫအီၪဂီၩ့ ပဒိၭန့ဆၧၥူၪဝၭစကြမၫ့တူၩဒၪအိၩ ပအၪ့န့ထၬ ၦဆံၫ့ဎံၪအဂဲးအဖးနီၪ ပကဘၪၥ့ၪယၫထၬကိၭဂၩနီၪလီၫႉ အဲၪကွံၩဘၪ ထၧၫ့ဖုဝဲထံၩၥိၭ ထီးအလူၬၥံၪဧ့ႇ ဘဲၫၥိၭနၥံၪကထီးန့ထၬ Blessed Dominic Collines အဂဲးအကၠီၩ့ ကန့အဂး ယရၩလၩ့န့အ့ၪဘၪနၥံၪလၧ    ဆၧအဲၪဆၧကွံၩ   ဎိၩဒိၪဖၧၩ့နီၪလီၫႉ  အဲၪကွံၩဘၪ ထၧၫ့ဖုဝဲ ထံၩၥိၭထီးအလူၬႇ မွဲနၥံၪလၧၫ့ဎွ့ၩဝ့ၫဒၪလၧ ကဆါယွၩ အဆၧအဲၪဆၧကွံၩလါဆံၭႉ