လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪမွဲဝ့ၫဒၪ ဆၧမုၬဆၧလၩကအီၪအဂး ပကဘၪဖ့ၪအ့ၪကဆါယွၩအခံၫ့အဂဲး အကၠီၩ့နီၪလီၫႉ ဂၪ့ခိၪဖိၪၥံၪထီးအလူၬနီၪ အဆၧမၩအၪကိၭနံၩ အီၪပွံၩအခံၫ့လအီၪဘၪနီၪလီၫႉ ပကဘၪလၩ့ဎွါ ပအီၪပွံၩအခံၫ့အဂး ကဆါယွၩကိၭဖံၭၥိၭပၧၩနီၪလီၫႉ အၡါမၪနီၪ ပကဘၪအၪ့န့ပအီၪပွံၩအခံၫ့ လိၪဝ့ၫဒၪနီၪလီၫႉ
အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဆၧလၧပကဲၪၦၡၩနီၪ ပဆၧမၩအီၪကိၭဂၩမွဲလါနၫ့ႇ ပကဘၪအီၪပွံၩအခံၫ့နီၪ ပကဘၪဖၭထၬ အီၪစဲၪနီၪလီၫႉ ပဆၧမၩအၪကိၭဂၩႇ ပဆၧမၩအီၪကိၭနံၩမွဲလါနၫ့ ကဆါယွၩအဂး ပကဘၪဖ့ၪအ့ၪအခံၫ့နီၪ ၥၭနၫ့ဘၪနးဂၩလဂ့ၩႇ နၥံၪကဘၪထုၪ့လၩ့ၥၭနီၪလီၫႉ ကဆါယွၩအဂး ပၥိၩ့ထၪ့အခံၫ့စွါဘဲၫ ပၥၭခံဖၧၩ့ဆၧဎွံၫကအီၪႇ ဆၧမုၬဆၧလၩကအီၪနီၪလီၫႉ အနီၪဂီၩနီၪ ပၥၭခံဖၧၩ့ ပကအီၪ ၡူၪၡူၪဘၩဘၩနီၪလီၫႉ လကၭဒ့ၪဘၪႇ ပဘၪထိးအီၪက့ၪပဲၩၥၭဒဲ ဆၧလဂ့ၩဘၪထီးလူၬဖၧၩ့ ကပဒၩ့ထၬအ့ၪပၧၩနီၪလီၫႉ
အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ပအီၪၥၭမၧၫ့ကိၭနံၩဖၧၩ့ ပအီၪအၪ့လၧကဆါယွၩႇ ကဆါယွၩအဂး ပဖ့ၪအ့ၪအခံၫ့ဘဲၫၥ့ၪလဲၪနီၪ ပကဘၪအၪ့ဎါလၩ့ပၥၭနီၪလီၫႉ ဆၧနီၪအကၠီၩ့ႇ ပဆၧမၩအၪကိၭနံၩဒၪဆၧ ကဆါယွၩအဂး အခံၫ့နီၪကဘၪအီၪကိၭနံၩႇ အ့ၪပမၩဘဲၫယီၩၥိၭစွါဘဲၫ ပအီၪၥၭမၧၫ့ကိၭနံၩဖၧၩ့နီၪ ပကအီၪဘၪမုၬမုၬလၩလၩႇ ပကအီၪဘၪလၧ ၥုၪ့ဎွံၪၥၭယီၫကိၭဂၩနီၪအကၠီၩ့ ၥၫ့ဎွၩဖရၫ့စ့ၭ အဆၧၥီၫ့ဆၧၥၫ့အီၪ ဝ့ၫဒၪ ဘဲၫယီၩၥိၭအဂဲး ယရၩလၩ့န့အ့ၪဘၪနၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭ ထီးအလူၬ မွဲနၥံၪလၧၫဎွ့ၩဝ့ၫဒၪလၧ ကဆါဎြံၬအဆၧအဲၪဆၧကွံၩ လါဆံၭႉ