ဆၧလၧဝၪထံၭၥံၪနီၪ စွံၭထၪ့ ကၫဘိၫဒဲၫ့အီၭဆဲၭႇ ထူၭထၪ့ထဲၩ့ အီၭဆံၫဂၠံၫႇ ဆၧစီၪ့ထၪ့အခံၫ့နီၪ စွံၭထၬဝ့ၫဂီၩ့ ဆၧဂဲၫဎဲၪ့ထၬအခံၫ့နီၪ ထူၭထၪ့ထဲၩ့ ဆၧအစီၪ့ၥံၪတၭ အခိးတၩဂ့ၩဒိၪဝ့ၫလၧနဲၩ့ဎီၩ့နီၪလီၫႉ မွဲဆၧဘဲၫနီၪ ဝၪထံၭလဖၪနီၪ ၦၡၩႇ ဆၧဖိၪဆၧဎါႇ ၥံၪ့ထံၭလဖၪဒဲ နဲၩ့ဎီၩ့ခိၪလီၩ့လဖၪအဂး အရ့ၩဒိၪဝ့ၫ ဆၧအထံၭနီၪလီၫႉ အၡါမၪနီၪ ဆၧလၧဝၪထံၭၥံၪနီၪ မွဲဝ့ၫ နၪ့အဆၨၩလါနၫ့ အဆၧလၩ့ဆၫ့ အီၪအၪမၬနီၪလီၫႉ အဝ့ၫၥံၪနီၪ မွဲဆၧအထံၭလၧ အဎိၩဖျဲၪဒဲ ကနံၩနီၪ ထၪ့ထီၪ့ဝ့ၫန့ ထီးထီၩ့ ကမံၫတၫနီၪလီၫႉ
ဆၧလၧဝၪအထံၭနီၪ မွဲၥိၩ့ထၪ့န့လၧ ဆၧအီၪဆီၪ့အီၪချဲၫ့အဂးလီၫလကၭဘၪဒဲ ပၥိၩ့ထၪ့န့ဒံၭလၧ ဂံၪ့အဆၧပိၭ ဆၧလၫ့ၥံၪလဖၪ မွဲဝ့ၫ စံၭမၬချၭ – ပထးႇ လးဆၧၫ့နၩ့ႇ ဂံၪ့အဒီၪ့အခိၪႇ ဂံၪ့အထၧၫ့ႇ ဒဲ တံၫၡူၩၥံၪနီၪလီၫႉ န့ဝ့ၫလၧ ဝၪအထံၭလီၩ့ ဝၪဖျိၪ့လဖၪၥံၪနီၪ မွဲပၥိၩ့ထၪ့န့ အလးအၪဒၪဆၧနီၪလီၫႉ မွဲဆၧဘဲၫနီၪ ဝၪအထံၭၥံၪနီၪ ၦၡၩၥံၪအဂး ဖ့ၪလၫ့အ့ၪပၧၩ ဆၧအၪ့ဆၧအီၩ့ႇ ထီးကန့အဂး ဒဲ မၩလၩ့ၡၩအ့ၪပၧၩ ဂၪ့ခိၪချိၫ့ဂဲၫခိထၪ့ ဆၧအခိးအတၩလဖၪၥံၪယီၩ မွဲဝ့ၫနဲၩ့ဎီၩ့အခၪ့ထံၭ ခၪ့ဎၧၩ့နီၪလီၫႉ
ဝၪထံၭလဖၪၥံၪနီၪ မွဲဂ့ၩဒိၪဝ့ၫဒၪလၧ ခီၫ့ၡၩအဂးဒံၭအကၠီၩ့ ပကြၨၭၥၧၫ့ဝၪထံၭအကၠီၩ့ ဆၧၥုၪ့ဆၧဖျါပကိၪ့ၥ့ၪလဖၪ ဖ့ၪကိၪ့ဖ့ၪတဲၩ့ထၬဝ့ၫနီၪလီၫႉ ၦလနၩ့နၩ့ ဖ့ၬဝၪဂီၩ့ ၥၧၫ့လၩ့ထဲၩ့ဝ့ၫနီၪ အီၪဝ့ၫၡၩၡၩလီၫတၭ ခးပယၩ့ယီၩ ဝၪအထံၭလဖၪ ဂဲၫလၩ့ၡၩထၪ့နီၪလီၫႉ ဝၪအထံၭၥံၪနီၪ မွဲလရွံဘၪဖံၭတၭ အ့ၪပၥိၩ့ၥ့ၪနီၪ အလူအဎွ့ၩအီၪမီၪ့ဎီၩ့ ထီၪ့နီၪလီၫႉ လၧ ဂၪ့ခိၪယီၩ ဎိၩဖျဲၪဝ့ၫဒၪမွဲဝ့ၫ ဝၪအထံၭလဖၪယီၩ ပၧၩလနၩ့နၩ့ကိၭဒံၭလၧ ထီၪ့အယ့ၫ (အစိမ်းရောင်ရွှေ)နီၪလီၫႉ
ထၧၫ့ဖုဝဲထံၩၥိၭဖျိၩ့ဖိၪၥံၪဧ့ ၦအီၪလၧဂၪ့ခိၪချိၫ့ယီၩ ဂၪ့ခိၪဖ့ၪလၫ့ထၬပၧၩ လၬဆီၪ့ကမံၩ့မွဲဝ့ၫ အခိးအတၩဂ့ၩဒိၪဝ့ၫဒၪ ဝၪအထံၭလဖၪၥံၪယီၩ မွဲပကအီၪက့ၪအလူအဎွ့ၩဒဲ ကျ့ၭစၨၭၥၧၫ့လၩ့ထဲၩ့ ဝၪထံၭၥံၪလဖၪအကၠီၩ့ ယမိအဲၪဒိၭဘၪပဂၨၪထၪ့ဘၪ နၥံၪနီၪလီၫႉ