ကနံၩနီၪတၭ လၧထံၫဖိၪချိၬခၪ့ထံၭ အဝ့ၫ ဆၧၫ့နၩ့အီၪလၧ လိးခိလီၫ့ဖၫ့ခိၪနီၪ ယိ ဎံၪချံၪ့ဝ့ၫဒၪ ထံၫမၧၫ့ဆ့ၭယွၩလၩ့အထီ လၧထံၫယွၩလၩ့နီၪကၠၧၫ့ကၠၧၫ့ အဝ့ၫဒၪ ၦမုၪအခိၪၥွံၪဖၭထီၫ့ကဘီၩ့နီၪလီၫႉ အနီၪတၭ အဝ့ၫလ့ၩထၪ့လၧ ထံၫဖိၪချိၬအဖၫ့ခိၪနီၪဂီၩ့ လ့ၩလီၩ့ဎွါဝ့ၫ ၦၡၩၥံၪအဂံၪ့အီၪဧၪ အီၪအ့ၬဧၪနီၪလီၫႉ လယံၬယမီဘၪအဖၧၩ့ နါဂၧၫ့ဘၪ ၦၡၩချဲၩ့ဂူၪဆၧအလူလဖၪႇ ၦၡၩၥံၪနံအလူလဖၪနီၪ ခိၭနၪထံၫဝ့ၫလါနၫ့ အဝ့ၫဒၪဆၧနးမံၩ့အ့ၬႉ ဆုးလ့ၩလၧ ဆၧအလူၥီၫ ထံၫဆ့ၭလၩ့အလး လိးဖၭဒိၪဖၫ့ခိၪနီၪ ဒၪဘၪၦမုၪနၩ့ဎံၫလၩ နံၫဂၩ အၪ့လုထံၫဒဲ အၪ့ဖျုၩအခိၪဎွံၪနီၪလီၫႉ ၦမုၪဎံၫလၩနံၫဂၩနီၪ ကျဲၩမၩဒၪအၥၭလၧ စခးချံၪ့အ့ၬ အၪ့လုထံၫခီၫ ချဲၩ့နံဆၧခီၫစွါဘဲၫႉ အနီၪတၭ စခးချံၪ့လဂၩ လ့ၩလၧၦမုၪနၩ့ဎံၫလၩအီၪနီၪဂီၩ့ အၪ့စၪ့ဝ့ၫလမိဘၧၫ့ဘၪလါနၫ့ စံၭဝ့ၫ ဖုမုၪၥံၪ နၥံၪအီၪကၠၭခလဲၪႇ အလးထယီၩ ဝဲခွၫ ဂဲၫထီၩ့ယံၫယါခိၪမၪခိၪမၪလါနၫ့ ဒၪယံၫယါၦၡၩနးကၠၪအ့ၬႉ ဖုမုၪၥံၪယီၩ အီၪခလဲၪ စီၪယၧၩနးမံၩ့လဂ့ၩ ယၥ့ၪအ့ၬနီၪ ယအၪ့စၪ့နၥံၪလီၫႉ
ကထုၪ့ဎး ၦမုၪနၩ့ဖိၪအဎိၩကဂၩနီၪ ကျဲၩ့မၩနါဂၧၫ့အၥၭအ့ၬဂီၩ့ ချဲၩ့ဘံၪၥူၪအဆံၭကဂၩနီၪ ဆၧချဲၩ့ဎ့ၭဎ့ၭဖိၪ ဂီၩ့အခၫ ၦမုၪဖိၪအဆံၭလဂၩနီၪ ၥိၭကီၩ့လၫ့ထဲၩ့ ဆၧကီၩ့ဆၧၥိၭဂီၩ့ လၩ့မါခွံၬဝ့ၫဒၪနီၪလီၫႉ ထီးနီၪ အီၪထးၦမုၪနၩ့အဎိၩလဂၩနီၪ စံၭစခးချဲၪ့ ဝဲခွၫ ဂဲၫလၧဖုမုၪအနဲၩ့ထံၭယီၩဘၪလဲၪႇ ဝဲခွၫဂဲၫထီၩ့လၧဆၧအလးယီၩ ပၥ့ၪလဲၪႇ ဘၪဆၧကမံၩ့မံၩ့ဧၪႇ ညၩၡၪယၧၩလဂ့ၩ နဘၪလီၩအီၪနီၪလီၩ ဖုမုၪကဘၪမၩဆၧၩ့ ဝဲမုၪမနီၫလဲၪ လီၩဘီၪႉ
အီၩႉႉႉဘယီၩဘီၪႇ ဝဲခွၫဂဲၫယံၫယါအလးထယီၩ ဒၪယံၫယါၦၡၩနးဂၩအ့ၬအကၠီၩ့ အၪ့စၪ့ဖုမုၪနီၪလီၫႉ အ့ၪမွဲၥ့ၪယၫ ဖုမုၪၥံၪအီၪထယီၩ ဝဲခွၫဂဲၫဂၭကွ့ၩလၥၨၩႉ
ဝဲခွၫကလီၩလီၫႉႉလီၩႉႉႉလီၩ ဖုမုၪအခိၭနၪႉ
လယီၩ ဖုမုၪ ဖုမုၪလီၩမနီၫလဲၪႉ ဖုမုၪကခိၭနၪနီၪ ဝဲခွၫကဘၪလီၩမနီၫလဲၪႉ
အီၩႉႉႉဘယီၩဘီၪ ဝဲခွၫ ဝဲခွၫအ့ၪမွဲ ၥ့ၪယၫ ဒ့ၩမုၪၥံၪအီၪအလးထယီၩ ကဂဲၫဂၭလီၩဝ့ၫဘနီၪအကၠီၩ့နီၪ ဖုမုၪအၪ့စၪ့ယိလီၫဘ့ၩႉ နဂဲၫဂၭန့ နဂဲၫဂၭန့ ဖုမုၪၥံၪယီၩ အဲၪဒိၭၦမွံၩၦထံၫ မီၪ့ဎီၩ့ဝဲခွၫအ့ၬႉ ၦမုၪနၩ့ဖိၪဎံၫလၩယီၩ လၧဆၧနံမွံၫအဖၧၩ့ စံၭဆၧၫ့ထဲၩ့စခးချဲၪ့ ဘဲၫၥိၭအခၫ ၦၡါဖိၪယီၩ ကဂဲၫကဲၪထၪ့ဘဲၫၥ့ၪလဲၪနီၪ လၧခဲၫ့မုနွ့ၫမၬ ယကဆုးလီၩဖ့ၪနဲၪဘၪနၥံၪနဲၪႉ