လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪမွဲဝ့ၫဒၪ ဖိၪၥၪအီၪၥုၪ့လၩ့ၥၭအလူ အဂဲးအကၠီၩ့နီၪလီၫႉ ဆၧလၧဖိၪၥၪကမံၩ့နီၪ နုၬဖျီၫ့ ၦၡၩအဎိၩၥံၪအၥၭခံဖၧၩ့ န့ဝ့ၫဒၪနီၪလီၫႉ ဘၪမနီၪလဲၪစွါဘဲၫ အ့ၪပနါဂၧၫ့ဘၪ ဖိၪၥၪၥံၪအလူစွါဘဲၫ ပကဘၪ အၪ့စၪ့လၩ့ပၥၭအဂး ဂဲးဖ့ၪဆီၪ့ပၧၩ ဆၧကမံၩ့နီၪလီၫႉ လၩ့ဆၫ့ဒၪဆၧႇ ဖိၪၥၪၥံၪကဎိၩထၪ့အဂးႇ ကအီၪအၪ့အဂး ပကဘၪမၩအ့ၪမနီၪလဲၪ အဝ့ၫၥံၪ ထီလၧယၫအဂး ပကမၩအ့ၪမနီၪလဲၪနီၪ ပကဘၪဆီၪ့မီၫ့လၩ့ပၥၭနီၪလီၫႉ
အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဆၧလၧဖိၪၥၪနီၪ မၩမုၬၦၥၭၡါၥံၪအၥၭ ၥ့ၪအၪမၬဒ့ၭနီၪလီၫႉ ဘၪမနီၪလဲၪစွါဘဲၫ ၦၡၩအဎိၩၥံၪ အီၪဂဲၫထဲၩ့လၧ ဆၧမၩဖၧၩ့ ဆၧပွံၩအၥၭအခံၫ့ အ့ၪနါဂၧၫ့ဘၪဖိၪၥၪအလူႇ ဒၪဘၪဖိၪၥၪ ဆၧနံမွံၫစွါဘဲၫ အဝ့ၫၥံၪဆၧပွံၩဆၧထၩ့ၥၭ လၩ့မၬခွံၬထီးအလူၬနီၪလီၫႉ ဖိၪၥၪအဂး အဝ့ၫၥံၪကဘၪမၩအ့ၪမနီၪလဲၪ မၩဝ့ၫနၧၩထီးအလူၬနီၪလီၫႉ လါနၫ့ အထီဘဲၫယီၩ ပဘၪဒၪ ဖိၪၥၪဘၪၥံၫ အဖျီၩ့အမံၩ့မံၩ့နီၪလီၫႉ ဆၧဒုၭဆၧအကျၩ ဖိၪၥၪဘၪၥံၫႇ ၦတတုၬတနၭဖၧၩ့ အၪ့ဆၧအီၪအ့ၬႇ ဘၪထိးဆၧဆၫ ကဘၠၩ့အၥၭအီၪအ့ၬ ဘၪထိးၥံၫၥၭနီၪလီၫႉ
အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဆၧကၪဆၧဂဲၩ အမံၩ့မံၩ့ဖၧၩ့ အဝ့ၫၥံၪ ကဘၪဎိၩထၪ့အဂးဒဲ အဝ့ၫၥံၪထီလၧယၫ ဆၧဒူၩဆၧယး ကအီၪအဂး ပကဘၪပဒၩ့ထၬအ့ၪအဝ့ၫၥံၪနီၪလီၫႉ လကၭဒ့ၭဘၪႇ အဝ့ၫၥံၪကလ့ၩထၪ့လ့ၩထီၫ အခွးအယါအဂး ၦၡၩအဎိၩၥံၪ ကဘၪမၩအတၩလၫ့ အီၪကိၭဂၩနီၪအကၠီၩ့ ၥၫ့ဎွၩဖရၫ့စ့ၭ အဆၧၥီၫ့ဆၧၥၫ့အီၪ ဝ့ၫဒၪ ဘဲၫယီၩၥိၭအဂဲး ယရၩလၩ့န့အ့ၪဘၪနၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭ ထီးအလူၬ မွဲနၥံၪလၧၫဎွ့ၩဝ့ၫဒၪလၧ ကဆါဎြံၬအဆၧအဲၪဆၧကွံၩ လါဆံၭႉ