Blessed John Beyzim, SJ  အဂဲး

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ  မံၩ့ဎိၩၥၪဖျီၪ မုခွၫလၧအအီၪအနိၪ့ အဆၧရၩလၩ့ဖၧၩ့  မုကနံၩယီၩ ယအဲၪဒိၭ ရၩလၩ့န့အ့ၪဘၪနၥံၪနီၪ မွဲဝ့ၫဒၪ Blessed John Beyzim, SJ  အဂဲးအကၠီၩ့နီၪလီၫႉ Blessed John Beyzim  ယီၩ အီၪဖျဲၪလၧ ခး Ukranian နီၪလီၫႉ  Blessed John Beyzim ယီၩ နံၪ့ (၁၈၈၆) နံၪ့နီၪ ကဲၪထၪ့ၥၫ့ခၫကပၩနီၪလီၫႉ လကၭဒ့ၭဘၪႇ အဝ့ၫ ကဲၪၥၫ့ခၫအခံၫ့နီၪ ဘၪဒၪဆၧၫ့ယၫလၧ ဆၧဆၫဘၪ ဆၧတတုၬတနၭ အခံၫ့နီၪလီၫႉ ဆၧနီၪအကၠီၩ့ႇ နံၪ့ (၁၈၉၈) နံၪ့နီၪ လ့ၩလၧခး ပၠ့ၫၥ့ၭဂီၩ့ ယိဆၧဆၫခံၫထူၭဆါၥံၪနီၪလီၫႉ ဆၧဆၫခံၫထူၭဆါ အဂၩ (၁၅၀) နီၪ ၡၪ့အၪမၬဒ့ၭအကၠီၩ့ အၪ့အဂးအီၪအ့ၬ ဘၪထိးၥံၫၥၭနီၪလီၫႉ

Blessed John Beyzim ယီၩ လ့ၩဒၪဘၪဆၧဆၫခံၫထူၭဆါၥံၪတၭ အၥၭမုၬအ့ၬ ဂၪ့ခိၪဖၧၩ့ ၦၡၩကိၭဂၩနီၪ မွဲဝ့ၫဒၪကဆါယွၩအဖိၪ ထီးအလူၬနီၪလီၫႉ အဝ့ၫယီၩ ယၫ့ၥၭဆၧဆၫခံၫထူၭဆါၥံၪအကၠီၩ့နီၪ ယိဂ့ၩယိဘၪအဝ့ၫၥံၪလၧ ဆၧအဲၪဆၧကွံၩ ဆၧယၫ့ၥၭနီၪလီၫႉ ၦၡၩလနၩ့နၩ့နီၪ ကိၭအဝ့ၫလၧ ဆၧအဂီၩ့နီၪလီၫႉ ဘၪမနီၪလဲၪစွါဘဲၫႇ ဆၧလၧဆၧဆၫခံၫထူၭနီၪ လၩ့ၥၭမဲၫ့ အၪမၬဒ့ၭနီၪလီၫႉ ဆၧဆၫအနီနီၪ မွဲဝ့ၫ ဆၧဆၫဘၪဂါနီၪလီၫႉ လါနၫ့ႇ Blessed John Beyzim အဆၧအဲၪဆၧကွံၩနီၪ မၩနၧၩ့ခၪ့ဖျီၫ့ ဆၧၥၭမဲၫ့ၥံၪယီၩ ထီးအလူၬနီၪလီၫႉ  ဆၧဆၫခံၫထူၭဆါၥံၪ အနးၥၭအဂး ၥုၪ့အ့ၪဝ့ၫၥရိၭႇ ကဘၠၩ့ၥၭအဂး ၥုၪ့အ့ၪဝ့ၫဆၧဆၫဂံၪ့ႇ ကအီၪဘၪအၪ့ဘၪ ဘဲၫၥိၭၦဂူၫဂၩအဂး ၥုၪ့အ့ၪဝ့ၫဂံၪ့နီၪလီၫႉ

အဝ့ၫယီၩအၥၭဂ့ၩအီၪႇ မၩဆၧၩ့ဆၧဆၫခံၫထူၭဆါၥံၪ အၥွံၪဒူၩအီၪၡါမၪနီၪလီၫႉ လယံၬယမီးဘၪ ဆၧဆၫခံၫထူၭ ဘၪဂါအဝ့ၫဂီၩ့ အၥၭအီၪ (၄၈) နံၪ့နီၪ ၥံၫဖီၩ့ခွံၬဝ့ၫဒၪလၧ ဆၧဆၫခံၫထူၭနီၪလီၫႉ စၭထၪ့လၧ အဝ့ၫ ၥံၫဖီၩ့ခွံၬအခံၫ့နီၪ ၦဂူၫဂၩကိၭအဝ့ၫလၧ ဆၧဆၫခံၫထူၭၥံၪအၥီၫ့နီၪလီၫႉ နံၪ့ (၂၀၀၂) နံၪ့နီၪ ၥၫ့ဎွၩ John Paul II ဘိၭဘၪၥ့ၪယၫ အဝ့ၫလၧ ဆၧဆၫခံၫထူၭဆါၥံၪအဂး ၦဆံၫ့ဎံၪနီၪလီၫႉ အဲၪကွံၩဘၪ ထၧၫ့ဖုဝဲထံၩၥိၭ ထီးအလူၬၥံၪဧ့ႇ ဘဲၫၥိၭနၥံၪကထီးန့ထၬ  Blessed John Beyzim အဂဲးအကၠီၩ့ ကန့အဂး ယရၩလၩ့န့အ့ၪဘၪနၥံၪလၧ    ဆၧအဲၪဆၧကွံၩ   ဎိၩဒိၪဖၧၩ့နီၪလီၫႉ  အဲၪကွံၩဘၪ ထၧၫ့ဖုဝဲ ထံၩၥိၭထီးအလူၬႇ မွဲနၥံၪလၧၫ့ဎွ့ၩဝ့ၫဒၪလၧ ကဆါယွၩ အဆၧအဲၪဆၧကွံၩလါဆံၭႉ