ဆၨၩကဆၨၩ ဘဲၫၥိၭလၩ့မါလန့ဘၪအဂး ကအီၪဂုးခၧၫ့အဂးနီၪ အရ့ၩဒိၪထုၬအီၪဝ့ၫ ၥၧၫ့မံၩ့ ဆၧၥၧၫ့မံၩ့ယီၩ အ့ၪမွဲ ပဖီၪ့ဂုးခၧၫ့ထၬနီၪ ဆၨၩကဆၨၩယီၩလါမါလန့ဘၪလီၫႉ ဆၧၥၧၫ့မံၩ့ယီၩနီၪ မွဲဝ့ၫ ဆၧချဲၩ့ လံၬလဲဒဲ ဆၧဆၧးဎံၫဆၧးလၩနီၪလီၫႉ ယမုၫလါ ၦဖျိၩ့ကိၭဂၩ ကချဲၩ့ကွ့ၭထဲၩ့ၦဖျိၩ့ဆၧချဲၩ့ဒဲ ၦဖျိၩ့လံၬလဲလဖၪလီၫႉ ဆၧချဲၩ့ဒဲလံၬလဲၥံၪယီၩနီၪ မွဲဝ့ၫပဖံၫပဖူၫၥံၪအဆၧချဲၩ့မွဲ အ့ၬဧၪႉ ပဘၪၥ့ၪယၫကျ့ၭစၨၭမၩကိၭဂၩလီၫႉ

မုကနံၩယီၩ ပဘၪၥ့ၪယၫလၩ့ၥၭကိၭဂၩလီၫႉ ပဘၪမၩထၪ့ဖျီၪထဲၩ့ဆၧၥၧၫ့မံၩ့ယီၩ ဆၧၫ့ထီထီၩ့ယူၭႉ ပတၫလၫ့အီၪကိၭဂၩလီၫႉ ဆၧၥၧၫ့မံၩ့ယီၩ အရ့ၩဒိၪထီးအလူၬလါနၫ့ဂ့ၩ အရ့ၩဒိၪဎိၩနဲၪ့အဝ့ၫၥံၪလီၫႉ အထီဘဲၫယီၩ ၦဖျိၩ့ဖိၪၥံၪလၧ ချဲၩ့ဖျိၩ့ဆၧချဲၩ့ လၥ့ၪလၧၩ့ဘၪ အီၪအၪမၬလီၫနီၪ မွဲပၥၭလမုၬဘၪလီၫႉ ဆၧယီၩ ပကမၩပၥ့ၪလဲၪႉ အ့ၪမွဲပကလ့ၩဒၪဘယီၩနီၪ ၦဖျိၩ့ကဆၨၩယီၩ ကလၩ့မါထုၬဝ့ၫ ဒၪနီၪလီၫႉ

ယမိကွ့ၭဒုၪၥ့ၪယၫဘၪနၥံၪ ၦဖျိၩ့လံၬလဲအဂဲးအဖးယီၩနးဆံၭလီၫႉ ဘဲၫယီၩ လံၬလဲအဂဲးအဖးယီၩနးဆံၭလီၫႉ ဘဲၫယီၩပဒၪ ဘၪၦဖျိၩ့ဖိၪလဖၪယီၩ ၥီၪ့လိၪလံၬဖျိၩ့လါနၫ့ ထီးမွဲပယိထၪ့လၧ ခးပယၩ့ဖၧၩ့ထၧၫ့ဘံၪ့ယၫအဂးနီၪ အီၪဝ့ၫၡၩခိၬဒံၭလီၫႉ ဘဲၫယီၩ ပဒိၪပမုအကၠီးဖၧၩ့နီၪ လၥီၪ့လိၪဒံၭဘၪၦဖျိၩ့လံၬလဲအီၪဒံၭကနၩ့နၩ့ဒံၭလီၫႉ ဆၨၩဆၬအၥၭကမၧၫ့အဂး ကလ့ၩထၪ့လ့ၩထီၫလၧယၫ အဂး ကဘၪမၩဆၧဖံၭဆၧမၩအီၪအၪမၬအကၠီၩ့ လၥ့ၪယၫလၩ့ၥၭဒံၭဘၪလီၫႉ ကမံၩ့နီၪမွဲ ၦဖျိၩ့ဆရၫ ဆရၫမုၪလဖၪလီၫႉ အဝ့ၫၥံၪနီၪ ကိၭနံၪ့ ကိၭနံၪ့ ဂဲၫထဲၩ့ၥီၪ့အ့ၪဖျိၩ့ၥၭဘၪ့ၥံၪ ဖိၪၥၪဆံၭဖိၪၥံၪလံၬလဲလါနၫ့ဂ့ၩ အဝ့ၫၥံၪလကွ့ၭဘၪဖျိၩ့လံၬနီၪလီၫႉ အဝ့ၫၥံၪဆ့ ကြၨၭကွ့ၭ လံၬအၪအၪဆ့နီၪလီၫႉ

လၧခဲၫ့ကမံၩ့နီၪ ၦဖျိၩ့ၥၭဘၪၥံၪလၧအၥ့ၪဖျိၩ့လံၬၥံၪလဖၪနးဆ့ ကျ့ၭစၨၭကွ့ၭကၠၭလံၬအ့ၬအကၠီၩ့ ၦဖျိၩ့လဖၪ ထုၭထၪ့လံၬၥံၪ လဲၥံၪအခၫ လၧဖျိၩ့ခီၫပကဒၪဘၪၡၩခိၬလီၫႉ  ၦဖျိၩ့ဖိၪၥံၪဧ့ ဖီကွ့ၭထဲၩ့ၦဖျိၩ့လံၬလဲ ချဲၩ့ထဲၩ့ၦဖျိၩ့ဆၧချဲၩ့ကိၭဂၩဒ့ၭလီၫႉဂီၩ့နီၪ ပကအဲၪဒိၭ ဖီၪ့ဂုးခၧၫ့ထၬ ပဆၧဆၧးဎံၫဆၧးလၩ ကိၭဂၩဒ့ၭနဲၪႉ

ဆၧကၪဆၧဂဲၩထီးအလူၬ ဖီၩ့ဖျ့ၭဂီၩ့မၩန့ကျ့ၭစၨၭဒၪဝ့ၫ ဆၨၩဆၬအဂး ထံၫခးအဂး ကိၭဂၩလါဆံၭႉ