ဆၧအၥၭမၧၫ့လဖၪထီးအလူၬအဂး ဂၪ့ခိၪချိၫ့ဖ့ၪလၫ့ထၬလၬဆီၪ့ ဝၪအခၪ့ထံၭခၪ့ဎၧၩ့လဖၪနီၪ ဘဲၫၦၡၩၥံၪအယူၭယၪ့အီၪက့ၪဒိၪကၥ့ၪအဂး ထိစိၩဝ့ၫဂီၩ့ မွဲဝ့ၫ နံၪ့ကနံၪ လၩစဲၭတ့ၩ ဘၫ (၁၈) ၥၫ့နီၪ မွဲအီၪက့ၪထၬဝ့ၫလၧ ဂၪ့ခိၪထၧၫ့ ဘံၪ့ယၫ ဂၪ့ခိၪဝၪအမုနံၩ World Bamboo Day နီၪလီၫႉ

ဂၪ့ခိၪချိၫ့ယီၩ ခးတရူၭဒဲ ခးအံၩ့ဒံၩယၭ ဂီၩ့နီၪ ပခးပယၩ့ယီၩ မွဲဝၪမၧၫ့ထၪ့ဝ့ၫဒၪ ၥၧၫ့ခးလခး အအၪထုၬထံၫခးနီၪလီၫႉ ၥံၪ့ကျိၭပၧၩ့ၥိၫ့အနိၪ့ အဆၧအၪ့ထၧၫ့လီၩ့ဎွါထၬအဖၧၩ့ ဂၪ့ခိၪချိၫ့ယီၩ ဝၪအဆၨၩ (၇၅) ဆၨၩႇ ဝၪအဆၨၩဖိၪ ကအီၪဖိၬ ဘိၭ (၁၂၅၀ ) အဖၧၩ့ လၧခးပယၩ့ဖၧၩ့ယီၩ ဝၪအဆၨၩ (၂) မံၩ့ဒဲ အဆၨၩဖိၪ ကအီၪဖိၬ ဘိၭ ၁၀၂မံၩ့နီၪ မၧၫ့ထၪ့ဒၪဝ့ၫအကၠီၩ့ ပၥ့ၪယၫ ဘၪနီၪလီၫႉ ဝၪၥံၪလဖၪနီၪမွဲ ဝၪကျုၪႇ ဝၪမံၩႇ ဝၪဘွၩႇ ဝၪၥၭႇ ဝၪမီချီႇ ဝၪလဲမ့ၬႇ ဝၪဖျၫ့ႇ ဝၪကဲၪ့ႇ ဝၪၥီၫ့ႇ ဝၪဆၫ့မ့ၬဒဲ ဝၪဆူၪၥံၪနီၪ မွဲခီၫ့ၡၩအနိၫ့ အနံၪ့ဂ့ၩဝ့ၫဒၪ ဝၪအဆၨၩၥံၪနီၪလီၫႉ

ပခးပယၩ့ယီၩ ဝၪနီၪ ၦၡၩၥၧၫ့အအၪထုၬ လးကျဲၩ့လဖၪနီၪမွဲ လၧဝံးတခိၩ့ခးဒီၪ့လးဝၩ့အဖၧၩ့ ဝံးတဝၫ့ထုးႇ ကော့မှူးႇ ကွမ်းခြံကုန်း လၧထံၫထၪကျိၩ့ခးဒီၪ့လးဝၩ့အဖၧၩ့ ကြံခင်း၊   မြန်အောင်၊  စစ်ကိုင်းခးဒီၪ့လးဝၩ့ ဖၭဒိၪႇ ခၠ့ၩတွ့ၩထံၫကဘီၩ့ယၫတဝၫ့လဖၪႇ ၥဲၫ့ဆၨၩခးဒီၪ့ႇ မိၫ့ဆၨၩခးဒီၪ့အဖၧၩ့ တဝၫ့လဖၪၥံၪနီၪလီၫႉ

ဂၪ့ခိၪချိၫ့ယီၩ လၧဆၧခိအၪအလးအကျဲၩ့လဖၪနီၪ မွဲအီၪပဲၩ့ခွံၬလၧ ဝၪလန့ဘၪလီၫႉ လကၭဒံၭဘၪ ဝၪအဆၨၩ ဝၪဒူၪဘၪ့နီၪ ဂဲၫမၧၫ့ထၪ့ ကအီၪဖိၬဘိၭ မၧၫ့ကနွ့ၫအဖၧၩ့နီၪ ၦၡၩဘိၬခၬဂီၩ့ ထဲၩ့မၩထၪ့ ဝၪဒူၪဘၪ့ ပအၪ့န့နီၪလီၫႉ ဝၪဒူၪဘၪ့နီၪ ပဘိၭခၬဂီၩ့ ကထုၪ့ဎး ပအၪ့န့အၥိၭ ၦၡၩမၩဆဲၪ့ (လမွဲဘၪ)  မၩဎဲၪ့ထၬဝ့ၫဂီၩ့ အီၪက့ၪအၪ့ထၬဝ့ၫ အခံၫ့န့ယံၬနီၪလီၫႉ န့လၧဝၪအထံၭအီၪ ဝၪဒူၪဘၪ့ယီၩ ဂ့ၩဒံၭၥံၪ့ဎွံၪလၧ ၦၡၩအၥၭကၭႇ ဘၪကူၭၥံၪဒံၭနီၪလီၫႉ လကၭဒံၭဘၪ ဂ့ၩဒံၭလၧ  အီၪလၧပၥွံၪအဖၧၩ့ ကိုလဲၭစထရီၩအၥိၪလဖၪ လၩ့ႇ ၥၭခၭဆၧဆၫႇ ဘဲၫၦၡၩအလ ယၧးလထၪ့ဘၪ ဖီၪ့ဂုးထၬဝ့ၫန့ ဒဲ လၧၦၡၩအမုၪၥံၪအဂးဆ့ မၩဆံၫ့ဖျ့ၪအ့ၪဝ့ၫအၥွံၪဆ့နီၪလီၫႉ ဝၪအလၪနီၪ အ့ၪမွဲပအၪ့ဎွံအီၩစွါဘဲၫ အီၪလၧၦၡၩအဝိးဖိၪ့ဖၧၩ့ ဆၫ့ကလ့ၬလဖၪ ကၥံၫဝ့ၫနီၪလီၫႉ လၧတရူၭအလုၫလါ ဘၠၭဆၧအဖၧၩ့ ၦအဒၧၩ့လဖၪ ဘဲၫကအီၪဖျဲၪန့ယီၫယီၫအဂး ကအီၪဖျဲၪထီ လၧခဲၫ့ထုၬလၩကဘံၪ့နီၪ အၪ့ယံၫယါဝၪဘၪ့အကၠီၩ့ ပၥ့ၪယၫဘၪနီၪလီၫႉ