ၦဖိၪဎွ့ၪဖိၪ အဆၧအဲၪ (၁)

ခိၪလီၩ့ထိၩ့ချိၬလဖၪ ဆုးကျိၭအၥၭကဖျိၪ့ဂီၩ့ကဖျိၪ့ ခီၫလၧလံၩခံၫ ထီးထီၩ့လံၩထံၭနီၪလီၫႉ ဆၩ့လဖၪနးဆ့ လၩ့ဎွံၪလၩ့ဝ့ၫဒၪလၧ ခိၪလီၩ့ဖၩ့ခိၪယီၩ ပအီၪယိစိၩလၧအယဲၩ့ ဎံၪလၩ့ဝ့ၫခိၪလီၩ့ထီၩ့ချိၬယီၩ ပဒၪစိၩၥ့ၪဂိးဂိးဖိၪလီၫ နီၪလီၫႉ လါနၫ့ လၧခိၪလီၩ့ခၪ့ထံၭ ထံၫဖိၪချိၬကဘီၩ့အနဲၩ့ထံၭနီၪ ပကိၭဝ့ၫအမံၩ့မွဲဝ့ၫ စခးချံၪ့ ဖိၪၥၪခွၫလဂၩ ဖ့ၬပျၩ့ထၪ့ဎုၬကလးဂီၩ့ အီၪဝ့ၫကဂၩလီၫနီၪလီၫႉ အဝ့ၫ အီၪယဲၩ့လၧ ၦၡၩၥံၪနီၪ အမငါထုၬလီၫႉ

စခးချံၪ့ယီၩ အမိအဖါၥံၪၥံၫဒၪအဝ့ၫ ခီၫလၧအဆံၭဆံၭဒၪအိၩတၭ အဖၫထံဖျဲၡါက့ၭလဂၩ ကိၭယိထွ့ၫထၬ အဝ့ၫလါနၫ့ဂ့ၩ ဖိၪၥၪခွၫယီၩ မွဲၦလၧအဘိၪ့လဂ့ၩဘၪဘိၭ အဖၫထံယီၩ လယံၬယမီဘၪအထီ ဖၫထံယီၩ ၥံၫဒၪအဝ့ၫဒီၭနီၪလီၫႉ လၧဖျိၩ့ဖျိၩ့အိၩ ဆၧလၧၦဖိၪဎွ့ၪၥံၪနီၪ ဘၪအီၪအမ့ၬအနၪဆံၭ ၦၡၩၥံၪမိကိၭဘူၭနးဂၩအ့ၬ ဘၪန့လဲၪစွါဘဲၫ ဆၧလၧၦဖိၪဎွ့ၪၥံၪနီၪ မီၪ့ဎီၩ့ဆၧဆၫလၧ အဘၪဎၬဆၧအကၠီၩ့ နဲၩ့ထၬဝ့ၫဒၪအကၠီၩ့နီၪလီၫႉ

မွဲဆၧဘဲၫနီၪ စခးချံၪ့လဂၩ လ့ၩအီၪလၧ ၦၡၩလအီၪဘၪနးဂၩအလး ခိၪလီၩ့ခၪ့ထံၭနီၪဂီၩ့ မၩအၪ့မၩအီၩ့ဎုၬ အဆၧမၩ အီၪဝ့ၫကဂၩလီၫ ချံၪ့ချံၪ့ရူၪရူၪနီၪလီၫႉ အဝ့ၫယီၩ မွဲၦလၧအၥုၪ့ဂ့ၩၥၭဘွၩလဂၩအၥိၭ ဆၧလၧအဂဲၫ မၩနိၫ့မၩနၭယံၫယါ အဝ့ၫအဎုၬ လးမွဲဝ့ၫ ထိၬမံၩ့ ဆၧအူၭ ဆၧဖိၪဆၧဎါၥံၪနီၪ မွဲလၧဆိၪဆံၭဘၪဝ့ၫဒဲ အၪ့ကံၩ့ဘၩ ဆိၪဖၪအ့ၪဝ့ၫအဂး ကိၭကၠၪဒ့ၭလီၫစွါဘဲၫႉ  ကိၭနံၩဒ့ၭ စခးချံၪ့ယီၩ လ့ၩအၪ့လုယံၫယၩထံၫလၧ ခိၪလီၩ့ခၪ့ထံၭ ထံၫမၧၫ့ယွၩလၩ့ ထံၫဖိၪချိၬနီၪလီၫႉ လၧထံၫဖိၪချိၬအဖၫ့ခိၪနီၪ အဝ့ၫလ့ၩလီၩ့ဎွါယံၫယါ ဆၧဒိၭဆၧလၪၥံၪတၭ လၧၡိၬကျၩနီၪ နါဂၧၫ့ ဘဲၫၥိၭၦၡၩချဲၩ့ဂူၪအၥိၭ ထိၪဂၪ့ကိၭႇ ထွံၪမၩ့ဆၧအလူတၭ အဝ့ၫလီၩ့ခိၬနၪလါနၫ့ ဒၪဆၧနးမံၩ့အ့ၬႉ အဝ့ၫအၪ့ဎၬထၪ့ မလံၩဂဲၫအလူလီၫဧၪ လမွဲဘၪ မထံၫမၧၫ့ယွၩလၩ့ဧၪ နီၪလီၫႉ