လၧကကၠၪအိၩတဝၫ့ကတဝၫ့နီၪ ကဲၩ့ဖၭၥၭနံၫကဲၩ့ ကကဲၩ့နီၪ ၦအမ့ၬၥၪဘျီၪ လဖၪ အီၪဝ့ၫဒၪဂီၩ့ လခဲၫ့ကကဲၩ့နီၪဘိၭ ၦအခၪ့လၩ့ၥံၫလဖၪအီၪဝ့ၫဒၪလီၫႉ

အၥိၭၥံၪလဖၪယီၩအိၭလိၬၥၭနးဆံၭအ့ၬႉ ဘၪထံၭဘၪနဲၪ့လိၬၥၭခိၪမၬခိၪမၬႉ အီၪက့ၪထၬကၠၭ ၥၭထၪ့ထီၫလဖၪဂီၩ့ လ့ၩဘူၭလိၭၥၭအ့ၬ ချဲၩ့ဒုၪ့ဘူၭလိၬၥၭအ့ၬႉ ကနံၩတၭ အဲၩ့ၥဲၭကဂၩဂဲၫထီၩ့စိၩလၧတဝၫ့နီၪအခၫ ဒၪဘၪတဝၫ့ဖိၪၥံၪယီၩ လအိၭ ဘၪလိၬၥၭအခၫ အဝ့ၫယီၩကိၪ့ထၪ့ဝ့ၫကမံၩ့နီၪလီၫႉ အနီၪမန့လဲၪစွါဘဲၫ ကအၪ့ မၧၫ့တဝၫ့ဖိၪၥံၪ စဲၪ့ပြၧၩ့ကၠၭလီၫႉ

အဲၩ့ၥဲၭယီၩဘဲၫအၪ့ဎါထၬဝ့ၫအၥိၭ ကနံၩနီၪ ဒုၭစဲၪ့ပြၧၩ့တဝၫ့ဖိၪၥံၪလဖၪနီၪ လီၫႉ အနီၪအခၫ ၦအမ့ၬဘျီၪလဖၪနီၪ အခၪ့ဂ့ၩလါနၫ့ ဒၪဆၧလၥ့ၪဘၪအကၠီၩ့ စဲၪ့ဒၪလူၬနီၪ လ့ၩစိၩလၧဖီၪ့တၧၩ့အလးဘၪအ့ၬ စဲၪ့ထီၩ့လအိၩ စဲၪ့ထီၩ့လၧယီၩဘိၭ နၧၩ့ကၠၭနးဂၩအ့ၬႉ မၩဒီၭၦအခၪ့လၩ့ၥံၫကပၫနီၪဒီၭ အမ့ၬဖၩ့လါနၫ့ အခၪ့ခီၫလၩ့ၥံၫ ဘိၭ ဘၪကၠူၭလ့ၭန့ဒၪအၥၭနီၪ ထီၩ့စိၩလၧဖီၪ့တၧၩ့နးဂၩအ့ၬႉ

အနီၪဘိၭအဲၩ့ၥဲၭယီၩ စံၭအဝ့ၫၥံၪ ကဲ အ့ၪမွဲဘနီၪနီၪ ၦအမ့ၬဘျီၪကဂၩဒဲ ၦအခၪ့လၩ့ၥံၫကဂၩ လဲၩ့ဎုၬနၥံၪအၥၭ နံၫဂၩ နံၫဂၩ ဘဲၫနီၪဂီၩ့ စဲၪ့ပြၧၩ့ထဲၩ့ နးဘျၩ့ ဒီၭႉ ဘဲၫနီၪဘိၭ ၦအမ့ၬဘျီၪကဂၩဒဲၦအခၪ့လၩ့ၥံၫကဂၩ အီၪလၩ့ဎိၭကၠၭၥၭ ဘဲၫနီၪ ဂီၩ့ ၦအမ့ၬဘျီၪလဖၪနီၪ ပျူၫထၬန့ ၦအခၪ့လၩ့ၥံၫလဖၪဂီၩ့ စဲၪ့ပြၧၩ့ကၠၭနီၪလီၫႉ အနီၪအခၫ အခၪ့ဂ့ၩလဖၪဒဲအမ့ၬဖၩ့လဖၪနီၪ မၩလၩ့ဎိၭကၠၭဆၧကၠၧၫ့ကၠၧၫ့အကၠီၩ့ ထီၩ့စိၩကၠၭလၧဖီၪ့တၧၩ့အီၪကိၭဂၩနီၪလီၫႉ စၭထၪ့လၧအခံၫ့နီၪ တဝၫ့ဖိၪၥံၪယီၩ ၥ့ၪယၫထၪ့ထဲၩ့ ဆၧမၩဎိၭလၩ့ဆၧ အခိးအတၩဂီၩ့ အီၪထဲၩ့ယံၩယံၩၡီၩ့ၡီၩ့နီၪလီၫႉ

ၡါဖိၪယီၩဖ့ၪလၫ့ပၧၩ ဆၧမၩလိၪ လၧပဆၧၥ့ၪဆၧဘၪအဖၫ့ခိၪ ကြၨၭပလ အီၪက့ၪထၬ ၥၭထၪ့ထီၫလဖၪဂီၩ့ ပကိၭဂၩဒ့ၭ ပခံပလဲၫ ပဆၧၥ့ၪဆၧဘၪ အီၪထၬ လမီၪ့ဎီၩ့ဘၪအကၠီၩ့ ပကဘၪမၩဎိၭလၩ့ဎုၬကၠၭဆၧ လၧဆၧယံၩဆၧၡီၩ့ဖၧၩ့ အဂး နီၪလီၫႉ