ဘဲၫၥိၭၦၡၩၥ့ၪယၫယွၩႇ ကဒၪဘၪယွၩႇ ကအီၪဘၪလၧယွၩကၠၧၫ့ကၠၧၫ့အဂးႇ ယွၩနဲၪဖျီၪထၪ့ၥၭလီၫႉ ယွၩနဲၪဖျီၪလၧထၪ့ၥၭ လၧအဖီၩ့ခွံၬဒၪ အနံၪ့ ၂၀၀၀ အိၩလၧၫ့မွဲအ့ၬႉ ယွၩနဲၪဖျီၪထၪ့ၥၭ လၧထီအဖီၩ့ခွံၬႇ လၧထီဘိၩ့ယီၩႇ ဒဲလၧထီလၧယၫႇ ထီးဂၪ့ခိၪယီၩအထုၬႇ ယွၩအီၪလၧၦၡၩအၥိၭႇ ယွၩကိၭဖံၭၥိၭၦၡၩလၧအအီၪႇ ယွၩမၩဆံၫ့ထၪ့ဎံၪထၪ့ၦၡၩႇ ဖ့ၪဂဲးဖ့ၪဘၭၦၡၩ ခၫ့ဖျီၫ့လၧစၭကြၫမ့ၫတူၩလဖၪနီၪလီၫႉ

ကဆါဎြံၬစၭထၪ့ ဆၧထိးထဲၩ့တၩ့ထဲၩ့ ဆၧဖံၭဆၧမၩ ခၫ့ဖျီၫ့လၧဆၧဒိၭန့ဆၧၥူၫဝၭဆံၫ့ဎံၪ လၧၦဆံၫ့ဎံၪစယီဟၫ့အအီၪနီၪလီၫႉ

ယ့ၫၡူၬဒိၭန့ဆၧၥူၫဝၭဆံၫ့ဎံၪအထီႇ ဘၩဆိၪဖၪဆၧအဘိၩ့ဘၭႇ မူၭခိဝဲထၪ့ၥၭႇ ၥၭမုဆံၫ့ဎံၪအမိၡါဘဲၫထိၪလွံအၥိၭႇ ဂဲၫဆီးလၩ့အလီၩ့ႇ ဆၧအလူၥီၫလၩ့လၧမူၭခိၪႇ စံၭဝ့ၫႇ နဝ့ၫဒၪယီၩ နမွဲယဖိၪခွၫၥၭဘီၩ့တၭႇ မုယၥၭလၧနၧၩလီၫႉ

ကဆါဒိၭန့ဆၧၥူၫဝၭဆံၫ့ဎံၪအဂဲးယီၩႇ အဆိၫထုၬႇ မၩနၪ့ထၪ့ပၧၩ ယွၩအဆၧမၩလဖၪႇ ဖါယွၩလၧအတဲၩ့လၩ့ဆၧႇ ဖိၫခွၫယွၩလၧအထိးထဲၩ့တၩ့ထဲၩ့ပၧၩခၫ့ဖျီၫ့လၧအဆၧထိနိၫ့ထိးနၭႇ ထိၥံၫၥၭဒဲအဆၧမၧၫ့ထၪ့ထဲၩ့ႇ ဒဲၥၭမုဆံၫ့ဎံၪ လၧအမၩဆံၫ့ထၪ့ဎံၪထၪ့ပၧၩနီၪလီၫႉ

ဆၧၥူၫဝၭဆံၫ့ဎံၪစၭကြၫမ့ၫတူၩယီၩ မၩဆံၫ့ထၪ့ထဲၩ့ပၧၩ လၧဆၧဒဲၩဘၭအခၪ့ထံၭႇ ဒုၭနုၬပၧၩ လၧယွၩအဂံၪ့ဒီၪ့ဆံၫ့ဎံၪႇ ယွၩအဆၧအီၪကီၪ့ဖၧၩ့ႇ ဒုၭကဲၪထၪ့ပၧၩ ယွၩအဖိၪအလံၩႇ မၩကဲၪထၪ့ပၧၩ ၦၡၩအၥၫ့လဖၪလီၫႉ

ယ့ၫၡူၬဂဲၫလၩ့အၪ့န့ၦၡၩအဆၧကဲၪႇ မွဲယွၩအဖိၪခွၫႇ ယွၩအဆံၫ့ဎံၪႇ ဖီၩ့ဖျ့ၭလၧဆၧဒဲၩဘၭႇ ယွၩယီၩ ဂဲၫအီၪလၧၦဆၧဒဲၩဘၭဖီၪအကျၩႇ ဂဲၫဆၪ့လၩ့အၥၭႇ ထိးထဲၩ့တၩ့ထဲၩ့ၦၡၩအဂးနီၪလီၫႉ

ၥၭမုဆံၫ့ဎံၪကဆါယွၩနီၪ မွဲဝ့ၫယွၩလၧ အဆူၭခဲၩ့ထၪ့ခွံၬႇ ဒဲမၩဂၭဂီၩ့ခွံၬ ဂၪ့ခိၪအဆၧဒဲၩဘၭလီၫႉ အဝ့ၫမၩဖီၩ့ဖျ့ၭပၧၩ ဆၧဒဲၩဘၭအဆၧခံၭဒဲအဆၧပၧၩ့ပၧၩအဖၧၩ့ဂီၩ့ ၥိၫ့စိၩပၧၩ လၧဆၧဖၩ့ႇ ယွၩအဘၩ့အမုးဖၧၩ့လီၫႉ

လကၭဒ့ၭဘၪႇ မၩနၪ့ထၪ့ပၧၩ လၧပနၫ့ဆါဒ့ၪဝ့ၫအဆၧဒိၭန့ဆၧၥူၫဆံၫ့ဎံၪအဂဲးႇ ပဆၧအုၩ့လၩ့ႇ ဒဲပမူၩဒၩအဂဲး ဘဲၫဎြံၬဖိၪလဖၪအၥိၭနီၪလီၫႉ  

ပဒိၭန့ဆၧၥူၫဝၭဆံၫ့ဎံၪမုနံၩဒၪအိၩႇ ပမိပဖါႇ ဒဲဎြံၬဖိၪခရၧၫ့ အုၩ့လၩ့ဆၧဆူနဲၩ လၧပလးႇ လၧပဂးႇ အုၩ့လၩ့ၥၭ ကဂၭဎ့ၭႇ ကမီၪ့ဘံၭ မုၪခီၩလဲႇ ဒဲအဆၧဖံၭဆၧမၩလဖၪ ဒဲကအီၪၥၭမၧၫ့ လၧခိၭနၪယွၩအလူအထၫနီၪလီၫႉ

ပကဲၪထၪ့ယွၩအဖိၪအလံၩႇ ဎြံၬဖိၪႇ အထံၩအဖျဲႇ လၧနၫ့ဆါၥၧၫ့ဂၩယွၩလဂၩအမံၩ့အဖၧၩ့နီၪလီၫႉ ဎြံၬဖိၪထီးလူၬအဆၧၥၭမၧၫ့ထၧၫ့ဖျီၩ့ဒၪယီၩႇ အီၪပဲၩ့ခွံၬၥၭ လၧနၫ့ဆါၥၧၫ့ဂၩယွၩအအီၪန့အ့ၬႉ ဘဲၫပၥၭမၧၫ့အီၪစၭလၧ နၫ့ဆါၥၧၫ့ဂၩယွၩလဂၩအမံၩ့အဖၧၩ့အၥိၭႇ ပၥၭမၧၫ့ပဘၪအီၪပထုၬၥၭ လၧဂၪ့ခိၪချိၫ့ယီၩႇ လၧနၫ့ဆါၥၧၫ့ဂၩယွၩအမံၩ့အဖၧၩ့နီၪဆ့လီၫႉ