မုဆၫကနံၩယီၩ ပဒၪဘၪၥၭဘၪ့နံၫမံၩ့နီၪလီၫႉ ကမံၩ့နီၪ ၥၭအုၭဆၧနးမံၩ့အ့ၬ ထီလၧယၫအဂး ဆၧမံၫမးအီၪနးမံၩ့အ့ၬႉ လီၩ့ဒၪဆၧမုၬဆၧလၩကမံၩ့လီၫႉ
လၧခဲၫ့ၥၭဘၪ့ကမံၩ့နီၪဘိၭ မွဲဘဲၫနီၪအ့ၬႉ အထီလၧယၫအဂးဆၧမံၫမးအီၪႉ အ့ၪမွဲလအီၪဒံၭဘၪစွါဘဲၫလီၩ့ဎွါထၪ့အဆၧမံၫမးနီၪလီၫႉ မုကိနံၩဒ့ၭ အဝ့ၫၥံၪယီၩ ဘၪလီၩ့မၩဆၧမၩလၧၦၡၩအစူၪဖၧၩ့လါနၫ့ ကယဲအဝ့ၫၥံၪ ဘၪမၩဆၧမၩလဖၪနီၪ မၩဝ့ၫလၧၥုၪ့အီၪၥၭအီၪအဖၧၩ့ ကျ့ၭစၨၭမၩဝ့ၫဂ့ၩဘၪစဲၪ့နီၪလီၫႉ ဂီၩ့နီၪ ကယဲလီၩ့ဎွါ ကျိၪၥံၪစ့ၩၥံၪန့နီၪ ၥိၩ့ဂီၩ့ၥိၩ့စၪခွံၬဝ့ၫအ့ၬႉ ၥိၩ့ဝ့ၫဒၪလၧ လိၪဝ့ၫအလးနီၪလီၫႉ
လကၭဘၪ အၥၭဆံၭဆံၭဆိၭဆိၭအဖၧၩ့ အၪ့ဎၬယိဝ့ၫလၧ အဝ့ၫၥံၪအထီ လၧယၫအဂးဂီၩ့ အၪမွဲဂ့ၩ ၡၩမွဲဂ့ၩ ဆူၫလၩ့စ့ၩလၧ ဆၧမၩကမံၩ့မံၩ့အဖၧၩ့နီၪလီၫႉ အဝ့ၫၥံၪယီၩ ဘဲၫအဝ့ၫၥံၪအဂဲးအီၪအၥိၭ စၭထၪ့မၩခီၫ့ၡၩကမံၩ့မံၩ့ဂီၩ့ ကျ့ၭစၨၭထၪ့ ဝ့ၫ ကဆံၭဘၪကဆံၭနီၪလီၫႉ အနီၪဘိၭ အဝ့ၫၥံၪယီၩ ယံၭထၪ့ကဆံၭ လ့ၩထၪ့လ့ၩ ထီၫကဆံၭႉ
ဆၧနီၪအကၠီၩ့ ယမိအၪ့ယၫဘၪၦၡၩအဎိၩလဖၪ အ့ၪမွဲနၥံၪဒၪဘၪ ၥၭဘၪ့ဖိၪ ဘဲၫယီၩလဖၪအခၫ အွံၪၥၭဆၧၩ့ ကၠူၭထၪ့ဘၪအဝ့ၫၥံၪလါဆံၭႉ ဖ့ၪဂဲးဖ့ၪဘၭအဝ့ၫ ၥံၪလါဆံၭႉ ၥၭဘၪ့လၧအလၩ့ဆ့ၬလၩ့ယွါလဖၪဆ့ အၪ့န့ထၪ့အဒီၩ့အထ့ၬလၧ ၥၭဘၪ့ဘဲၫယီၩလဖၪ အအီၪလါဆံၭနီၪဘိၭ ကနံၩယီၩ ယအဲၪဒိၭလီၩဘၪလၧ ဆၧ အဂဲးဖိၪယီၩနီၪလီၫႉ ၦအလ့ၩခိၪလ့ၩနါဂၪ့ခိၪချိၫ့ယီၩနီၪ မွဲလၧၦအၥွံၪဒူၩလဖၪတၭ ၦအၥွံၪလဒူၩဘၪလဖၪအဂး အလးအီၪအ့ၬအီႉ
နးအဲၪဖီၫဘွၩ