နဲၩ့ဘံၩနီၪ အလီးအီၪဝ့ၫ ဖိၬဘိၭ မံလၬ ၄၀၀၀တၭ ခးအၫဖရံကၭနီၪ မွဲဝ့ၫဘံၩလၧအထီၪ့ထုၬဂီၩ့ ဂၪ့ခိၪချိၫ့ ယီၩ မွဲဒံၭလၧ အထီၪ့ထုၬ ဘံၩကဘံၩနီၪလီၫႉ လကၭဒံၭဘၪ ဂၪ့ခိၪချိၫ့ယီၩ မွဲဘံၩလၧ အခံၫအီၪဝ့ၫလၧ အံၫကွ့ၫတၫ အနဲၩ့တၭ ထဲၩ့ဆ့ၭလၩ့ယွၩဝ့ၫဒၪလၧ သမပိုင်းဇုန်အဖၧၩ့ အီၪဝ့ၫကဘံၩလီၫနီၪလီၫႉ
နဲၩ့ဘံၩလံၩခံၫကကဲၩ့ခီၫနီၪ ဖံၬပၫ့လဲၫ့ႇ မုထၪ့ကကဲၩ့ခီၫနီၪ အာရေဗျ မ့ၬၡါမုနၧၫ့ဖၫဒဲ ပၫ့လဲၫဝီၩႇ လံၩထံၭခီၫ နီၪ ခးဆူၫဒၫ့ဒဲ မုနုၬခီၫနီၪ လစ်ဗျန်မ့ၬၡါမုနၧၫ့ဖၫ ၥံၪဆုးဆုးနီၪလီၫႉ
ထၧၫ့ဖုဝဲမုၪခွၫၥံၪဧ့ နဲၩ့ဘံၩနီၪ ခၪ့ဂၬမ့ၬၡါမုနၧၫ့ဖၫအလးဂီၩ့ ထဲၩ့ဆ့ၭလၩ့ယွၩလၧလံၩခံၫထံၫကၠီၪ့နီၪ ဂဲၫထဲၩ့ လၩ့အဲၪ့ကဆံၭကဆံၭနီၪလီၫႉ နဲၩ့ဘံၩနီၪ ခးအီဂျစ်ဝံးဒိၪႇ ဝံးကိုင်ရို လံၩထံၭကကဲၩ့ခီၫနီၪ မွဲအလဲးလအီၪလၧၩ့ ဘၪဖိၬဘိၭ ပေ ၃၀၀ နီၪလီၫႉ ဝံးခါတွမ်း ဒဲ ဝံးအက်ဆူးဝန် အကျၩနီၪ ထံၫလၩ့ဆူၭဖၭဒိၪ(ရေတံခွန်ကြီး) အီၪ (၆) ဒုၩနီၪလီၫႉ မွဲဆၧဘဲၫနီၪ ဆၧလ့ၩထဲၩ့ထၪ့ဆၧလၧ ချံၪ ကဘၩ့ၥံၪစွါဘဲၫ ဆၧကၪဆၧဂဲၩအီၪဝ့ၫနီၪလီၫႉ နဲၩ့ဘံၩနီၪ ထဲၩ့ဆ့ၭယွၩလၩ့လၧ ခးအံၫဂၠ့ၭဂီၩ့ လၧထံၫထၪနီၪ ကဲၪထၪ့ထံၫကၠီၪ့နံၫဘီၩ့တၭ ထဲၩ့ဆ့ၭယွၩလၩ့လၧ ဘံၩဖၧၩ့နီၪလီၫႉ
နဲၩ့ဘံၩထံၫချိၬဂုၬဒၩနီၪ ဂၪ့ခိၪချိၫ့ယီၩ ဆၧဖံၭအၪ့မၩအၪ့ကဲၩ့ကၩၥံၪအဂး မွဲပၫဝ့ၫဒၪလၧ ဖံၬယၪထံၫ့အဂ့ၩထုၬ အလးတၭ ခီၫလၧ ဘံၫစံၫ ၅၀၀၀အထီဒၪအိၩ အံၫဂၠ့ၭပမၩဆံၬဖိၪၥံၪလဖၪ ၥုၪ့မၩအၪ့ဖံၭအၪ့ဝ့ၫဒၪနီၪလီၫႉ ကိၭနံၪ့ဒ့ၭ ဆၧခိခၫအလးခဲၫ့အထီနီၪ လၧနဲၩ့ဘံၩအနဲၩ့ ဖံၬဒၩလးကျဲၩ့လဖၪနီၪ ထံၫလူၬဘံၭယံၫယါနီၪလီၫႉ ထံၫလဖၪၥံၪယီၩ ထဲၩ့လၩ့ထဲၩ့အခၫ ဖံၬအၥိၪလဖၪ အီၪထးနီၪလီၫႉ
နဲၩ့ဘံၩထံၫဎိၩလၩ့အခိးအတၩနီၪ ကိၭနံၪ့ဒ့ၭ လၧဆၧလၩ့ဆၫ့အဖၧၩ့ ၦဒိၭန့ဘၪလးကျဲၩ့လဖၪနီၪမွဲ ဝံး အက်ဆူးဝန် လံၩခံၫလးကျဲၩ့ခီၫနီၪလီၫႉ လၧအက်ဆူးဝန်နီၪ ဖိၬလိၬထၪ့ထၬ တမၧၫ့ဖၭဒိၪကဒုၩနီၪလီၫႉ လၧနဲၩ့ထံၫချိၬဂုၬဒၩ စဲၪ့ထၪ့ ဘွ့ၪမု ကအ့ၫကၭနီၪ အၪ့န့ခးအမ့ၫရံကၭ နံၫဆဖိၬဖၫ့နီၪလီၫႉ လၧနဲၩ့ဘံၩ ထံၫထၪကျိၩ့ လးကျဲၩ့ ၦခမျၧးၥံၪအီၪဝ့ၫအၪမၬနီၪလီၫႉ ဖံၬအယၪထံၫ့ဂ့ၩအကၠီၩ့ ၥုၪ့အၪ့ၥုၪ့အီၩ့ဆၧ ကနံၪ့ခၧၩ့နံၪ့နီၪလီၫႉ ဂၪ့ခိၪအဆၧဆၧးဎံၫဆၧးလၩ မွဲစၭထၪ့ဝ့ၫလၧ နဲၩ့ဘံၩထံၫနဲၩ့ထံၭကဘီၩ့ယၫအကၠီၩ့ လီၩထၬဝ့ၫလီၫႉ နဲၩ့ဘံၩအခိးအတၩနီၪ မွဲဎိၩဒိၪဝ့ၫဒၪလၧ ခးအ့ၫဂၠ့ၭဒဲ ခးဆူၫဒၫ့ၥံၪအဖၫ့ခိၪအၪမၬနီၪလီၫႉ