လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ  မံၩ့ဎိၩၥၪဖျီၪ မုခွၫလၧအအီၪအနိၪ့ အဆၧရၩလၩ့ဖၧၩ့  မုကနံၩယီၩ ယအဲၪဒိၭ ရၩလၩ့န့အ့ၪဘၪနၥံၪနီၪ မွဲဝ့ၫဒၪ  BL. Dina Belanger  အဂဲးအကၠီၩ့နီၪလီၫႉ BL. Dina Belanger  ယီၩ အီၪဖျဲၪလၧ နံၪ့ (1510)  လၧ ခး Spain နီၪလီၫႉ အဝ့ၫယီၩ အထၧၫ့ဖုထၧၫ့ဝဲ အီၪနးဂၩအ့ၬနီၪလီၫႉ အဝ့ၫအဆံၭဆံၭဒၪအိၩ လ့ၩအီၪလၧ မံၭထၭမုၪၥံၪ ကၠၧၫ့ကၠၧၫ့ဂီၩ့ ထၪ့ကၠီးနီၪလီၫႉ အဝ့ၫအၥၭအီၪ (၁၄) နံၪ့ကကၠၪ အဝ့ၫအမုၪနၩ့စီၪၥံၫ့ ထၧၫ့ဘီၩ့ယၫနီၪ ဖ့ၪလၫ့လၩ့ၥၭလၧ ကဆါကၠဲၭအီၪနီၪလီၫႉ ကနံၩနီၪတၭ အဝ့ၫယီၩ အၪ့စၪ့ အဆရၫမုၪ ဆၧကမံၩ့နီၪ ၦဆံၫ့ဎံၪအမံၩ့ ထီးအလူၬဖၧၩ့နီၪ  BL. Dina Belanger  အမံၩ့ယီၩအီၪဧၪ အီၪနးဂၩလအ့ၬ အဆရၫမုၪ စံၭဆၧၫ့ထဲၩ့ အဝ့ၫဘဲၫယီၩၥိၭနီၪလီၫႉ အနီၪစွါဘဲၫ ကနံၩကကၠၪခိၭနီၪ ၦဆံၫ့ဎံၪအမံၩ့ဖၧၩ့ ယမံၩ့ယီၩ ကဘၪကဲၪထၪ့ၦဆံၫ့ဎံၪအမံၩ့နီၪအကီၠၩ့ လီၩအ့ၪအဆရၫမုၪနီၪလီၫႉ

BL. Dina Belanger  ယီၩ လ့ၩမၩဆၧၩ့ ၦၡၪ့ဖိၪၥံၪႇ ၦလၧအီၪလမုၬဘၪၥံၪ လၧအမိမိကၠၧၫ့ကၠၫ့နီၪလီၫႉ လကၭဒ့ၭဘၪႇ လ့ၩနုၭလၩ့လၧ  ဆၧဘၩဆိၪဖၪ အၥီၫ့ အဖုၫဖၧၩ့ဂီၩ့ ဖ့ၪလၫ့လၩ့ၥၭ ဖီၫ့ထၪ့ဖံၭထၪ့ ဆၧမၩအၪမၬဒ့ၭနီလီၫႉ အဝ့ၫအၥၭအီၪ (၂၄) နံၪ့နီၪ လ့ၩနုၭလၩ့လၧ ဎြံၬဖိၪဒဲ နးမၫရံၫယၫ အခရၧၫ့ဖၧၩ့နီၪလီၫႉ အဝ့ၫယီၩ ဆၧအီၪဆီၪ့အီၪချဲၫ့ လဂ့ၩဘၪ အၪမၬဒ့ၭနီၪလီၫႉ အဝ့ၫယီၩ ဘၩကၠဲၭအၪမၬဒ့ၭႇ အဲၪကဆါဎြံၬအၪမၬဒ့ၭနီၪအကၠီၩ့ နါဂၧၫ့ဘၪ ကဆါဎြံၬ အလူၬနီၪလီၫႉ နံၪ့ ( ၁၉၂၈) နံၪ့နီၪ အဝ့ၫ အုၩ့လၩ့အီၪလၩ့ၥၭအဆိၩအကၠၪဂီၩ့ ကဲၪထၪ့မံၭထၭမုၪနီၪလီၫႉ လယံၭလမီးဘၪ အၥၭအီၪ (၃၂)  နံၪ့နီၪ ၥံၫဖီၩ့ခွံၬလၧ ဆၧဆၫပိၬၥိၭနီၪလီၫႉ

နံၪ့  (၁၉၉၃) နီၪ ၦၡၩရွံထၪ့အဝ့ၫ BL. Dina Belanger  နီၪလီၫႉ ဆၧနီၪအကၠီၩ့ႇ ၦၡၩကဂၩအီၪဖျဲၪဂီၩ့စွါဘဲၫ ကရွံထၪ့အမံၩ့အဂး လီၩဎွါ ၦဆံၫ့ဎံၪအမံၩ့ၥ့ၪဝ့ၫဒၪနီၪလီၫႉ BL. Dina Belanger  ယီၩအၪ့န့ၬထၬအမံၩ့နီၪ မွဲၦဆံၫ့ဎံၪအမံၩ့အ့ၬ လါနၫ့ အဝ့ၫအမံၩ့နီၪ မၩကဲၪထၪ့ဝံၬဝ့ၫ ၦဆံၫ့ဎံၪအမံၩ့နီၪလီၫႉ ဆၧနီၪအကၠီၩ့ ၦကိၭဂၩၥံၪယီၩ ပကဘၪ မၩန့ဆၧမၩလိၪလၧ  BL. Dina Belanger အီၪလိၪဝ့ၫဒၪအကၠီၩ့  ယရၩလၩ့န့အ့ၪဘၪနၥံၪလၧ    ဆၧအဲၪဆၧကွံၩ   ဎိၩဒိၪဖၧၩ့နီၪလီၫႉ  အဲၪကွံၩဘၪ ထၧၫ့ဖုဝဲထံၩၥိၭ ထီးအလူၬႇ  မွဲနၥံၪလၧၫ့ဎွ့ၩဝ့ၫၪလၧ ကဆါယွၩ အဆၧအဲၪဆၧကွံၩလါဆံၭႉ