လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪမွဲဝ့ၫဒၪ ၦလၧဘၪထိးဆိၫ့ခွံၬ အဖိၪမုၪဖိၪခွၫ မိဖါၥံၪလဖၪအဂး ပကဘၪ မၩမုၬအဝ့ၫၥံၪအၥၭ ဘဲၫၥ့ၪလဲၪအဂဲး အကၠီၩ့နီၪလီၫႉ ဂံၪ့ဒီၪ့ဖၧၩ့ အဝၩၥံၫဖီၩ့ခွံၬစွါဘဲၫ အမၫနီၪကဲၪထၪ့ ၦမုၪမဲၫနီၪလီၫႉ အ့ၪအမၫၥံၫဖီၩ့ခွံၬစွါဘဲၫ အဝၩနီၪ ကဲၪထၪ့ ၦခွၫမဲၫနီၪလီၫႉ လကၭဒ့ၭဘၪႇ ဂံၪ့ဒီၪ့ဖၧၩ့ မိဖါ ၥံၫဖီၩ့ခွံၬစွါဘဲၫ အဖိၪမုၪဖိၪခွၫနီၪ ကဲၪထၪ့ဖိၪဎွ့ၫနီၪလီၫႉ လါနၫ့ႇ ဂံၪ့ဒီၪ့ဖၧၩ့ ဖိၪမုၪဖိၪခွၫၥံၫဖီၩ့ခွံၬဒၪ မိဖါၥံၪစွါဘဲၫ ပကဘၪကိၭ ဆၧချဲၩ့လအီၪ ဘၪနီၪလီၫႉ
အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဂံၪ့ဒီၪ့ဖၧၩ့ ဖိၪမုၪဖိၪခွၫလနၩ့နၩ့နီၪ ဘၪၥံၫလၧ ဆၧဆၫႇ လနၩ့နၩ့နီၪ ဘၪၥံၫလၧ န့ၩခၠၧၫ့ ဆၧလၩ့အၪ့ယိၪႇ လနၩ့နၩ့နီၪ ဘၪၥံၫလၧ ဆၧဒုၭဆၧယၩ ဆၧလၩ့အၪ့ယိၪ ကအီၪအမံၩ့မံၩ့နီၪလီၫႉ ဆၧနီၪအကၠီၩ့ႇ မိဖါၥံၪ ဘၪထိးဆိၫ့ခွံၬ အဖိၪမုၪဖိၪခွၫအဖျီၩ့အမံၩ့မံၩ့ႇ အဝ့ၫၥံၪ အၥၭခံဖၧၩ့ ဘၪထိးဝ့ၫ ဘဲၫၥ့ၪလဲၪနီၪ ၦၡၩၥ့ၪယၫကိၭဂၩဒ့ၭ လါနၫ့ႇ ပကထုၬဖျီၪထၪ့အဂး ဆၧချဲၩ့အီၪနးမံၩ့အ့ၬနီၪလီၫႉ ပလ့ၩမၩမုၬအဝ့ၫၥံၪအၥၭ အမံၩ့မံၩ့ဒၪဆၧ ၥၭၡူၪလၩ့ဘၩလၩ့ န့နးဆံၭအ့ၬနီၪလီၫႉ ပမၩမုၬအ့ၪ အဝ့ၫၥံၪအၥၭ ဆၧချဲၩ့လနၩ့နၩ့နီၪ ကဲၪထၪ့ ပမၩမုၬအဝ့ၫၥံၪအၥၭအ့ၬ ကဲၪထၪ့ ဘဲၫၥိၭ ပမၩဎိၩထၪ့အဝ့ၫၥံၪအဆၧဆၫနီၪလီၫႉ
အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဖၧၩ့ၥၭအဖျီၩ့အဂ့ၩထုၬနီၪ ပကဘၪအီၪအ့ၪလၧ အဝ့ၫၥံၪအနဲၩ့ႇ ခိၭနၫအ့ၪအဝ့ၫၥံၪ ဆၧအယီၩနီၪ မွဲဝ့ၫဒၪ ပမၩမုၬအဝ့ၫၥံၪ ဖၧၩ့ၥၭအဖျီၩ့အဂ့ၩထုၬနီၪလီၫႉ လၧပဆၧအဲၪဆၧကွံၩဖၧၩ့ ပကဘၪမၩမုၬအဝ့ၫၥံၪအၥၭ ဘဲၫၥိၭ ကဆါဎြံၬ မၩမုၬၦလၧ ဘၪထိးဆၧကၪဆၧဂဲၩၥံၪနီၪအကၠီၩ့ ၥၫ့ဎွၩဖရၫ့စ့ၭ အဆၧၥီၫ့ဆၧၥၫ့အီၪ ဝ့ၫဒၪ ဘဲၫယီၩၥိၭအဂဲး ယရၩလၩ့န့အ့ၪဘၪနၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭ ထီးအလူၬ မွဲနၥံၪလၧၫဎွ့ၩဝ့ၫဒၪလၧ ကဆါဎြံၬအဆၧအဲၪဆၧကွံၩ လါဆံၭႉ