ဘၪနီၪ ဆၧအီၪကီၪ့ဆံၫ့ဎံၪ ကိၭဖံၭၥိၭပၧၩ ပကဘၪၥၭဎွံၫၥၭယီၫလဲၪႉ ယွၩအဖိၪခွၫ ဂဲၫလၩ့အီၪၥၭမၧၫ့ လၧၦၡၩအကျၩ ဘဲၫၦၡၩကဂၩအၥိၭႇ

ဂဲၫဆိၬန့အ့ၪၦၡၩ ဆၧၥၭထိၬပရၧၫ့ႇ

ဂဲၫလၩ့ထိးထဲၩ့တၩ့ထဲၩ့ပၧၩႇ ဂဲၫလၩ့ကွဲၪဖျါပဆၧဒဲၩဘၭႇ ဂဲၫၥီၪ့လိၪနဲၪလိၪအ့ၪပၧၩ ဆၧတီၩဆၧလီၩ့ဖၧၩ့ၥၭ လၧအၥိၫ့ပၧၩ လၧယွၩအအီၪအကၠီၩ့နီၪလီၫႉ

ဆၧအီၪတဲၩ့ဝဲၩၥၭအထီယီၩႇ ပအီၪတဲၩ့ဝဲၩပၥၭႇ လၧဆၧယိလါႇ ဆၧနီၫ့ယါလၩ့ထဲၩ့ၥၭႇ လၧကၭဒ့ၭဘၪႇ ဘဲၫစပီလူၫမၪလူၬပၧၩအၥိၭႇ ပအီၪတဲၩ့ဝဲၩ့ပၥၭ လၧၥုၪ့ဎွံၫၥၭယီၫႇ လၧဆၧအၪ့ကံၩ့ ဘၩဆိၪဆၧႇ လၧစံၭထၪ့အူၭယွၩအခိးအတၩအဖၧၩ့နီၪလီၫႉ

ထၧၫ့ဖုဝဲမုၪခွၫၥံၪဧ့ႇ

လၧၥၭထိၬပရၧၫ့ကနံၩယီၩအဖၧၩ့ ပနါဂၧၫ့ဘၪ ၦဘၭတံၫဇၫ့ဆၧစယီဟၫ့ လီၩလၩ့လၬလၩ့ဆၧၥၭထိၬအပရၧၫ့ လၧၦခမျးအဂဲးလီၫႉ

အၫဒဝ့ၫတူၩ အီၪတဲၩ့ဝဲၩကဆါဎြံၬကဂဲၫလၩ့အဆၧအထီဖၧၩ့နီၪ ကနါဂၧၫ့ဘၪ ၦဆံၫ့ဎံၪ စယီဟၫ့ ဘၭတံၫစတၩ ဒုၭအီၪတဲၩ့ဝဲၩ ၦခမျး ခၫ့ဖျီၫ့လၧအဆၧလီၩလၩ့လၬလၩ့ ဘၪဆဲၫ့လၧဆၧနီၫ့ယါလၩ့ၥၭႇ ဆၧဒိၭန့ဆၧၥူၫဝၭဆံၫ့ဎံၪအဂဲးႇ ဒဲဆၧအီၪၥၭမၧၫ့ လၧဆၧတီၩဆၧလီၩ့ဖၧၩ့အဂဲးနီၪလီၫႉ

စယီဟၫ့ ၥီၪ့ထဲၩ့ၥၫ့ထဲၩ့ ၦခမျး စံၭဝ့ၫႇ  ကယဲၥံၪ့လၧအလၥၪဘၪလၧအဂ့ၩကိၭထံၭဒ့ၭနီၪ မိဘၪဆၧခူၬခွံၬဝ့ၫတၭႇ မိဘၪဆၧဖျုၭလၩ့ခွံၬဝ့ၫ လၧမ့ၪဖၧၩ့လီၫႉ ဒဲလၧမုကနံၩယီၩ ဆၧၥၭထိၬပရၧၫ့ဖၧၩ့ႇ စံၭဝ့ၫႇ

အချဲၩအီၪဝ့ၫလၧအစူၪဖၧၩ့တၭ, မိမၩဆံၫ့ခွံၬအခရဲးဂ့ၩဘၪစဲၪနီၪ, မိအီၪက့ၪကီၪ့ထဲၩ့ အဘုၪၥံၪဂူၫၥံၪလၧအဖၫ့ဖၧၩ့တၭ, အ့ၪမွဲလီခၫ့နီၪ, မိဆူၭထၪ့ခွံၬဝ့ၫလၧမ့ၪလၧ အလၩ့ဖံၬလၥ့ၪဘၪလီၫ.

ဘဲၫနီၪၥိၭ ၦခမျး လၧအလနီၫ့ယါလၩ့ထဲၩ့ဘၪအၥၭႇ လၧအလမၩဂ့ၩထၪ့ထဲၩ့ဘၪ အဆၧအီၪမၧၫ့အီၪဂဲၩလဖၪ ကဘၪဆၧမၩဂၭဂီၩ့ခွံၬဝ့ၫဒၪလီၫႉ

ၦခမျးႇ ၦအၪ့ကံၩ့အခီၫ့ႇ ၦၥုၭဖိၪၥံၪႇ အၪ့စၪ့စယီဟၫ့ စံၭဝ့ၫႇ

အ့ၪမွဲဘဲၫနီၪတၭ,ပဘၪမၩပဝ့ၫဘဲၫၥ့ၪလဲၪ.-

ၦလၧအဆဲၫ့အီၪဝ့ၫနံၫဘံၪ့နီၪ,မွဲအအၪ့နၩ့ဖၭဖ့ၪလၫ့ ၦလၧအဆဲၫ့လအီၪဘၪဆံၭ. ၦလၧအဆၧအၪ့အီၪဝ့ၫနီၪ, မွဲအမၩဘဲၫနီၪၥိၭဆ့ဆံၭ.-

ဆၧချဲၩ့ယီၩ မၩနၪ့ထၪ့ပၧၩ မုနံၩအလးခဲၫ့ထုၬ ယွၩအၪ့နၩ့ဖၭ ၦတီၩၦလီၩ ဒဲၦလတီၩလလီၩ့ဘၪအဆၧၫ့ႇ အခၫစံၭဝ့ၫႇ စံၭၦအဘၪဆိၪဂ့ၩႇ အီၪလၧအစူၪထွ့ၪလဖၪနီၪႇ ဂဲၫဘီၪ မၩန့ၥၫဘၩ့မုးလၧဆၧတဲၩ့ဝဲၩ့န့နၥံၪအဂး ခီၫလၧဂၪ့ခိၪအခၪ့ထံၭကဲၪထၪ့လံၩလံၩဆံၭႉ အဂဲးဘဲၫယီၩႇ  ဆၧၥၭဝံယၥၭႇ နၥံၪဒုၭအၪ့ဒုၭအီၩယၧၩႇ ယမွဲၦမွံၩႇ နၥံၪထိးဆၧၫ့ယၩႇ ယအီၪဘိၪ့တၭႇ နၥံၪဒုၭကီၩ့ဒုၭၥိၭဘၪယၧၩလီၫႉႉႉႉ

ၦအၪ့ကံၩ့အခီၫ့း   ဆၧလၧဆၧမၪလူၬနၥံၪနီၪ, နၥံၪထီးမၩန့ အၪနဲၪ့အနီၪလဂ့ၩ.-

ၦၥုၭဖိၪလဖၪး  နၥံၪထီးမၩနၧၩ့ဆီၪ့ၦနးဂၩလဂ့ၩ, နၥံၪထီးအၪ့ဘျံၭအၪ့ဘျၪဆၧလဂ့ၩ. ထီးဒၪနၥံၪန့ဘၪနၥံၪအလံၩ့နီၪ, ၥုၪ့မံၫ့ၥၭမံၫ့ဆံၭ.-

စယီဟၫ့အဆၧချဲၩ့လဖၪယီၩႇ မၩနၪ့ထၪ့ပၧၩႇ ယွၩအဆၧမၪလူၬ ၁၀ ထုၪနီၪလီၫႉ

ထီးမၩၥံၫၦၡၩလဂ့ၩႇ ထီးအၪ့လီၫဆၧလဂ့ၩႇ ထီးၥၭကွံၩၦဂူၫအဆၧနးမံၩလဂ့ၩႉ

ထၧၫ့ဖုဝဲမုၪခွၫၥံၪဧ့ႇ မုကနံၩယီၩ လံၬဆံၫ့ဎံၪယွၩအလူအထၫကိၭဖံၭၥိၭပၧၩ လၧဆၧၥုၪ့ထိၬၥၭထိၬအဖၧၩ့လီၫႉ ဘၪနီၪလဲၪႇ ယွၩဂဲၫလၩ့ထိးထဲၩ့တဲၩ့ထဲၩ့ပၧၩႇ ယွၩအီၪလၧပၥိၭအကၠီၩ့လီၫႉ ယွၩလၧပဘိၪ့ထၪ့ဘၩထၪ့ယီၩ မွဲဝ့ၫႇ ယွၩအတီၩလီၩ့ႇ ဆံၫ့ဎံၪႇ လၧၫ့ဎွ့ၩဝ့ၫဒၪ လၧဆၧအဲၪဆၧကွံၩႇ ဆၧယၫ့ၥုၪ့ယၫ့ၥၭနီၪလီၫႉ

မွဲဆၧဘနီၪအကၠီၩ့ႇ ဘဲၫယွၩနီၪ ကအီၪလၧပၥိၭကန့ဝ့ၫအဂးႇ ပကဘၪနီၫ့ယါလၩ့ထဲၩ့ၥၭႇ ပကဘၪအၪ့လဲၩထၪ့ထဲၩ့ပၥၭႇ ပကဘၪအီၪက့ၪဆံၫ့ဎံၪ ပနးခီၫ့နးၥၭႇ အီၪၥၭမၧၫ့လၧဆၧတီၩဆၧလီၩ့အဖၧၩ့ႇ ပကဘၪယၫ့ၥၭမၩဆၧၩ့လိၬၥၭကိၭဂၩဒ့ၭလီၫႉ