ၦဖျိၩ့ဆၨၩဆၧၥၭအွံၪ ဂဲၫအီၪထၪ့အဂဲး

ထၧၫ့ဖုဝဲထံၩၥိၭဖျိၩ့ဖိၪၥံၪဧ့ႇ ၦဖျိၩ့ထၧၫ့ဆၨၩယၫအဂး (ဒီကလုၫခရၧၫ့)  အဆၧကျ့ၭစၨၭအကၠီၩ့ ၦဖျိၩ့ဆၨၩန့ထးဘၪ ဆၧန့ၥၪအၪမံၩ့အကျၩ ၦဖျိၩ့ဆၨၩအဆၧၥၭအွံၪဆ့ မွဲပၫဝ့ၫဒၪ ကမံၩ့အဖၧၩ့လီၫႉ ဒီကလုၫခရၧၫ့ ခိၪနါဒိၪ ၥရၫစၫ့ဘီၫလဂၩ အဆၧကျ့ၭစၨၭဎိၭဒီၪအကၠီၩ့ ၦဖျိၩ့ဆၨၩဆၧၥၭအွံၪယီၩ ဂဲၫအီၪထၪ့ဝ့ၫဒၪလီၫႉ ဆၧၥၭအွံၪယီၩ ဘၪဆၧၥံၫကျံၩဝ့ၫလၧ ၦဖျိၩ့နံၪ့ထၪ့ၥၫ့အထီမွဲဂ့ၩႇ ၦဖျိၩ့အဘိၪ့လဖၪအထီမွဲဂ့ၩ ဒဲ ဆၧထံၪလၩ့ဒီၪလၩ့လၧ အဘၪထွ့ၫဖျိၩ့ဆၨၩဆၬ အဆၧထံၪလၩ့ဒီၪလၩ့လဖၪအဖၧၩ့နီၪလီၫႉ ဆၧၥၭအွံၪယီၩအဖျိၪ့နီၪ မွဲၥရၫစၫ့ဘီၫကွ့ၭတၭ ၦလၧအကွ့ၭဆၧၥၭအွံၪအယွ့နီၪဘိၭ မွဲ ၦဒိၪစီၩၥၪအ့ၩကၠံၩနီၪလီၫႉ

ကဲ အခီၫပယီၫ လၧၫ့ဎွ့ၩဝ့ၫဒၪ ၦဖျိၩ့ဆၨၩဆၧၥၭအွံၪယီၩ ပကခိၭနၪယိ ကၠၧၫ့ကၠၧၫ့နးဘျၩ့နဲၪႉ

ထၧၫ့ဖုဝဲမုၪခွၫၥံၪဧ့ႇ အ့ၪပဝါကီၪ့ယိထဲၩ့ ဆၧၥၭအွံၪယီၩနီၪ ပကဒၪဘၪ ၦဖျိၩ့ဆၨၩအဆၧအီၪက့ၪဎိၩဒိၪဝ့ၫနီၪ မွဲလဘၪထွ့ၫဘၪလၧ အမိဒံၩမိၡါႇ ဆၧလၧပဖီၪ့ၥ့ၪလဖၪနီၪအ့ၬတၭ  မွဲဘၪထွ့ၫလၧ အခံအလဲၪအဒွ့ၩဖၧၩ့အကၠီၩ့ ထၪ့ဖျီၪ့ဝ့ၫနီၪလီၫႉ မုဆၫကနံၩယီၩ မွဲဆၧလၧအဘၪထွ့ၫ ၦကိၭဆၨၩကိၭဂၩ လၧဂၪ့ခိၪထၧၫ့ဖျိၪ့ယၫအဂးနီၪလီၫႉ

ဆၧချဲၩ့လၧခဲၫ့ထုၬအဖၧၩ့ ပဝ့ၫဒၪထီးလူၬ မွဲပလအီၪက့ၪလၩ့ထးခွံၬ ဆၧလၧအလဂ့ၩလဘၪဘၪလဖၪႇ ဆၧလၩ့လံၩအိၫကျၪလဖၪႇ မၩန့ထၪ့ထဲၩ့ၥၭမၧၫ့အၥၫ့ႇ ဆၧအီၪမၧၫ့အၥၫ့ႇ ဆၧဆီၪ့မီၪ့ဆီၫ့မၬအၥၫ့လဖၪႇ ၥုၪ့ထိၬၥၭထိၬ လၧနံၪ့ထၪ့ၥၫ့အဖၧၩ့ဒဲ လ့ၩဆိၬန့ အီၪမၧၫ့ထဲးဎုၬ ထီးနံၪ့အထုၬကကၠၪကိၭဂၩဒ့ၭဆံၭႉ