ၥံၪ့ကျိၭလဖၪ အခိးအတၩဎိၩဒိၪဝ့ၫဒၪဎွ့ပၥ့ၪလဲၪနီၪ ပကအၪ့ဎၬထၪ့ထဲၩ့နးထံၪနဲၪႉ အီၪလၧဝံးဖၭဒိၪ တၨၭၥံၪ ဂံၪ့ၥံၪ စၭထၪ့လၧ ဆၧၥုၪ့ဆၧဒီၩ့ဖၭဒိၪလဖၪ ထီးထီၩ့ တဝၫ့အိၩ ကၠၩ့ဖိၪအထီ ကဖီၩ့လၧ စဲၪ့ထၪ့လၧၥံၪ့ကျိၭဖၧၩ့မွဲဝ့ၫ ၥံၪ့ၥံၪ ဝၪၥံၪ လပၫဘၪ မွဲလဂီၩ့ဘၪလီၫႉ ၦၡၩၥံၪ အၪ့အီၩ့ၥိၩ့ထၪ့ဝ့ၫဒၪ ဆၧအၪ့ဆၧအီၩ့လဖၪမွဲဂ့ၩ ၥံၪ့ဎွံၪဖၭဆၧၩ့ လဖၪမွဲဂ့ၩႇ ၥံၪ့ၥၪႇ ၥံၪ့ထံႇ ၥံၪ့လၪ ၥံၪ့ဝံၥံၪလဖၪနီၪ မွဲအရ့ၩဒိၪတၡါလီၫႉ အထီဘဲၫယီၩ ၦၥိၩ့ထၪ့အၪဝ့ၫဒၪ ဆၧဖိၭလိၬထၪ့ပလၭစတ့ၭ ၥိၩ့ထၪ့ဝ့ၫဒၪ ဆဲလျူလို့ နီၪ မွဲအီၪဂဲၫဝ့ၫဒၪလၧ ၥံၪ့ကျိၭနီၪလီၫႉ ဆၧဆၧးဎံၫဆၧလၩ အနိၪ့ကဆံၭကခ့ၭနးဆ့ မွဲဆုးကျိၭအၥၭလၧၥံၪ့ကျိၭဆ့နီၪလီၫႉ

လၧခးပယၩ့ယီၩ ဆၧးဎံၫဆၧးလၩကမံၩ့မွဲဝ့ၫ ပစိၭဖျၩၥံၪ့ (ပန်းပု) ဆၧကိၪ့ၥ့ၪနီၪ ဘၪဖိၬလိၬထၪ့ဝ့ၫလၧ ၥံၪ့အဂ့ၩလဖၪၥံၪလီၫမွဲအ့ၬဧၪႉ န့လၧၥံၪ့ကျိၭၥံၪအအီၪ ၡၩခမျၧးအဆၧၥိၩ့ထၪ့ဆၧပိၭဆၧလၫ့ၥံၪလဖၪနီၪ  ထုၭထၪ့ဝ့ၫလၧ ထံၫခးဖၧၩ့ႇ ၥံၪ့ၥံၪလဖၪ အၪ့ဆၫဝ့ၫလၧ ထံၫယဲၩ့ခးယဲၩ့အကၠီၩ့တၭ န့ခိးန့တၩထၪ့လၧ ထံၫခးကလ့ၩထၪ့လ့ၩထီၪ့နီၪလီၫႉ

ဆၧလၧၥံၪ့ကျိၭၥံၪနီၪ အီၪထၬဝဲၩ့ခီၫလၧ ဂၪ့ခိၪအခၪ့ထံၭခၪ့ဎၧၩ့အိၩတၭ မၫဆမံၭဂီၩ့တၭ ဂၪ့ခိၪယီၩ မွဲၥံၪ့ကျိၭလူၬဘံၭထၬထီးအလူၬနီၪလီၫႉ ၦခမျၧးအဆၧအီၪၥၭမၧၫ့လ့ၩထၪ့လ့ၩထီၫ့အခၫ ၥံၪ့ကျိၭလဖၪယီၩ မၩပျၩ့ထၪ့ဝ့ၫဂီၩ့ ၥံၪ့ထၪ့ကၠၭအဂံၪ့အဎၫ့နီၪလီၫႉ ၥံၪ့ကျိၭၥံၪယီၩ ဖ့ၬပျၩ့ထၪ့ဝ့ၫဂီၩ့ဆံၭဝ့ၫ မၩကဲၪထၪ့ ဎုၬၥံၪကၩၥံၪအလးဂီၩ့ ၥုၪ့အၪ့ၥုၪ့အီၩ့ဆၧနီၪလီၫႉ ဆၧပိၭဆၧလၫ့လၧအစဲၪ့ထၪ့ၥံၪ့ကျိၭအီၪလဖၪ အခိးအတၩဎိၩဒိၪဝ့ၫနီၪ ဂဲၫၥ့ၪယၫထၪ့ဝ့ၫ ကဆံၭကဆံၭဂီၩ့ ၥံၪ့ကျိၭၥံၪ့ထံၭလဖၪနီၪ ဖံၬခု ၥိၩ့ထၪ့ဝ့ၫဂဲၫအၪထၪ့တၭ ၥံၪ့ကျိၭလဖၪ ဂဲၫလၩ့ၡၩထၪ့ ကဆံၭဆံၭ နီၪလီၫႉ

မွဲဆၧဘဲၫနီၪ ၥံၪ့ကျိၭလဖၪ အခိးအတၩဎိၩဒိၪဝ့ၫဎွ့ပၥ့ၪလဲၪနီၪ မွဲပၥ့ၪယၫကိၭဂၩဆ့တၭ ၥံၪ့ကျိၭၥံၪယီၩ လကြၨၭဖ့ၬဘၪ ထီးဖ့ၬလဂ့ၩႇ အ့ၪမွဲပဘၪၥိၩ့ထၪ့အလးအီၪ ပကဖ့ၬစွါဘဲၫ ပဖ့ၬကထံၭနီၪ ၥုၪ့လၩ့ထဲၩ့ကထံၭ ထီးအမၧၫ့အကၠီၩ့ ၦဂၪ့ခိၪဖိၪၥံၪထီးလူၬ ဆၧမၩယီၩ ကြၨၭပမၩထၪ့နီၪလီၫႉ ၦဂၪ့ခိၪဖိၪၥံၪထီးလူၬ မွဲပဖီၩ့ဖျ့ၭဝ့ၫဒၪ လၧဂၪ့ခိၪအဆၧလၩ့အၪ့ယိၫကိၭဂၩဒ့ၭဒဲ မွဲကဲၪထၪ့ၦလၧအမုၬလၩ့ၥၭဎွံၪလၧနဲၩ့ဎီၩ့ကိၭဂၩဒ့ၭလါဆံၭႉ