ထၧၫ့ဖုဝဲထံၩၥိၭ ၦလၧအဲၪဒိၭခိၭနၪၦဖျိၩ့ၡါဖိၪၥံၪဧ့ အီၪဆီၪ့အီၪချဲၪ့ ကိၭဂၩဒ့ၭလါဆံၭနဲၪႉ မုကနွ့ၫယီၩ ၦဖျိၩ့ၡါဖိၪအနိၪ့ ယမိဆုးအဲၪဒိၭလီၩအ့ၪဘၪနၥံၪ နးမံၩ့ဖီၫဝီၩလဂၩ ဒၪဎီၩ့ထဲၩ့လိၬၥၭလၧအဖိၪခွၫယူၭနီၪလီၫႉ

နးမံၩ့ဖီၫဝီၩအဝၩၥၭဘီၩ့ဒဲ အဖိၪခွၫနီၪ လ့ၩလၧအမိမိအီၪ ဖံၫၥၭၡါအဂံၪ့နီၪဂီၩ့ လ့ၩယိ အဖိၪခွၫဒဲ အထံၩၥိၭၥံၪကွ့ၩၥဲၪ နီၪလီၫႉလၧခဲၫ စဎွၩဖိၪနီၪ ၥ့ၪယၫဝ့ၫအမၫအီၪလၧ ဖံၫၥၭၡါအဂံၪ့နီၪတၭ လ့ၩထၪ့လီၩ့ဎွါဝ့ၫ ဒၪအမၫၥၭဘီၩ့လၧ ဂံၪ့ဖၧၩ့နီၪလီၫႉလၧခဲၫ့ စဎွၩဖိၪယီၩ ထဲၩ့ကိၭန့ထဲၩ့အမၫၥၭဘီၩ့လၧ နီးဖၧၩ့ဒဲ ဖံၫၥၭၡါနီၪဆ့ မွဲထဲၩ့ကိၭန့ထဲးဝ့ၫလၧ နီးဖၧၩ့ဆ့နီၪလီၫႉ

စဎွၩဖိၪနီၪ ထဲၩ့ထီၩ့လၧအနီးဖၧၩ့အခၫ အၪ့န့ဎ့ၬနံၫဘံၪ့ဂီၩ့ ကဘံၪ့နီၪ မွဲယိၩယိၩဎ့ၬဖိၪဒဲ ကဘံၪ့နီၪမွဲ ထီဝီၩဎ့ၬနီၪလီၫႉ အဎ့ၬယိၩယိၩဖိၪနီၪ ဖ့ၪလၫ့အ့ၪအမၫၥၭဘီၩ့ဂီၩ့ ထီးဎ့ၬကဘံၪ့နီၪ ဖ့ၪလၫ့အ့ၪ ၦမုၪမဲၫ အဖိၪမုၪနီၪလီၫႉ ၦမုၪမဲၫအဖိၪမုၪနီၪ အုၭလၩ့အၥၭ ယဝၩအဲၪယၧၩအကၠီၩ့ ဖ့ၪလၫ့ယၧၩ ထီးဎ့ၬနီၪလီၫႉ အၥိၭနံၫဂၩ န့ဘၪဎ့ၬဂီၩ့အခၫ ကဘၪဖ့ၬပျၧၩ့လိၬၥၭ အခိၪနီၪလီၫႉ နးမံၩ့ဖီၫဝီၩ ဖျၭလၩ့ထၬအခိၪဂီၩ့ ၦမုၪမဲၫအဖိၪမုၪ ဖ့ၬဂုအခၫ ဖ့ၬဝ့ၫကထုၪ့ဎး မွဲလထ့ၬဘၪဒဲ အဎ့ၬပျၩတၭ မွဲဖ့ၬဝ့ၫလန့လၧၩ့ဘၪနီၪလီၫႉ နးမံၩ့ဖီၫဝီၩအခိၪထ့ၬနးဘီၩ့အ့ၬနီၪလီၫႉ လၧခဲၫ့ ၦမုၪမဲၫအဖိၪမုၪ ဖျးလၩ့ထဲၩ့အခိၪဂီၩ့ အၪ့မၧၫ့ နးမံၩ့ဖီၫဝီၩဖ့ၬထဲၩ့နီၪလီၫႉ နးမံၩ့ဖီၫဝီၩအဎ့ၬနီၪ ဂီၫအ့ၪထၪ့ ဖျီၪနုၬနၭအ့ၬလါနၫ့ ဖ့ၬဝ့ၫကထံၪလီၫ နးမုၪၥၧၫ့ထၧၩ့အခိၪဎွံၪ ထ့ၬလီၩ့ကထံၪလီၫနီၪလီၫႉ

ၦမုၪမဲၫအဖိၪမုၪၥံၫဂီၩ့ စဎွၩအၪ့မၧၫ့အဖျဲၥံၪ ဒၪ့လၩ့ကကုၬကကုၬဂီၩ့ ၥံၭလၩ့ဝ့ၫလၧမီၪ့ဖၧၩ့ဂီၩ့ အၪ့မၧၫ့ဝ့ၫလ့ၩၥိၪ့လၧ နးမံၩ့ဖီၫဝီၩအမိယါ ၦမုၪမဲၫအီၪနီၪလီၫႉ စဎွၩအဖျဲၥံၪလ့ၩၥိၫ့အခၫ စဎွၩအဖျဲကဂၩနီၪ စံၭ ၦမုၪမဲၫ နဖိၪၥိၪ့စိၩအ့ၪနၧၩ ယၪဆဲၪ့တၭ  ကထံၪဎးၦမုၪမဲၫနီၪ စံၭအဝၩ နဒၪဧၪ နဖိၪမုၪလ့ၩအီၪလၧနီးဖၧၩ့ဎွ့ဘနီၪ ၥိၪ့အ့ၪနၧၩဆၧနးမံၩ့အ့ၬ ယဖိၪမုၪလ့ၩအီၪယံၬဒံၭအ့ၬ ၥိၪ့အ့ၪယၧၩ ယၪဆဲၪ့ယူၭ လီၩဝ့ၫလၧ ဆၧမုၬလၩၥၭဎွံၪအဖၧၩ့ အၪ့ကၠၭယၪဆဲၪ့နီၪလီၫႉ အဝ့ၫၥံၪ အၪ့မ့ၩလၧယၪဆဲၪ့ အွံၪအွံၪဆၧၫ့ဆၧၫ့အခံၫ့နီၪ ဒၪၦၡၩအစူၪကခီၫတၭ အဖိၪမုၪဆံၭအီၪထးလၧဂံၪ့ကဂၩနီၪစံၭ အယီၩလၩ့ဂၩ နးနးအစူၪနဲၪ မိ အခၫ အမိမိအဲၪ့လိၬ ဆၧလမွဲဘၪနီၪ လီၩချဲၩ့လဂ့ၩ ကမွဲဒၪ ယၪဖၭဒိၪအစူၪလၥၨၩ လီၫဂီၩ့ ဆုးအၪ့မ့ၩနီၪလီၫႉ လၧခဲၫ့ အဝ့ၫအဖိၪဆံၭနီၪ ဒၪဒီၭ ၦၡၩအခိၪဎွံၪကကဲၩ့ဒီၭတၭ အနီၪမၬ ၥ့ၪယၫဝ့ၫလၧအဖိၪမုၪ ၦမုၪမဲၪယီၩ အၪ့လၩ့ထဲၩ့အဖိၪအယၪ ၥ့ၪယၫဝ့ၫကထံၪဎး အဖျ့ၩဂဲၫၥၭထၪ့နီၪလီၫႉ အဝ့ၫၥံၪအၥိၭ ၥၧၫ့ဂၩလူၬ အဖျ့ၩၥၭ ထီးဝ့ၫလန့လၧၩ့ဘၪတၭ ထီးဘၪကူၭထ့ၬဝ့ၫ လၧခဲၫ့ထုၬအၥၭဘၪၥံၫခွံၬ ၥၧၫ့ဂၩလူၬနီၪလီၫႉ

နးမံၩ့ဖီၫဝီၩဒဲ အဂံၪ့ဒီၪ့ၥံၪ ဆုးအီၪထဲၩ့ဝ့ၫလၧ ဆၧမုၬလၩၥၭဎွံၪအဖၧၩ့နီၪလီၫႉထၧၫ့ဖုဝဲမုၪခွၫၥံၪဧ့ ယအဲၪဒိၭလီၩအ့ၪဘၪနၥံၪ နးမံၩ့ဖီၫဝီၩၡါဖိၪနီၪ မွဲဒၪထီးယီၩလီၫနဲၪႉ ဆၧခိးဆၧတၩႉ