ထၧၫ့ဖုဝဲဖျိၩ့ဖိၪၥံၪဧ့ႇ အီၪဆီၪ့အီၪချဲၫ့ကိၭဂၩဒ့ၭလါဆံၭနဲၪႉ မုကနွ့ၫယီၩ ယမိဆုးအၪ့နၩ့လီၩဖ့ၪနဲၪဘၪနၥံၪ ပထၧၫ့ဖုဝဲဖျိၩ့ဆၨၩလဖၪ ဘၪနီၫလဲၪ ပဆၧချဲၩ့လမီၪ့ဎီၩ့ဘၪ အဂဲး လၧအအီၪထးလဖၪနီၪလီၫႉ

                                      ပထၧၫ့ဖုဝဲဖျိၩ့ဆၨၩဖိၪၥံၪလဖၪ ဘဲၫထံၫ ဖံၬ ခိၪလီၩ့ ခိဆၧၩ့ချံၪ့ အလးအကျဲၩ့ၥံၪပအီၪလမီၪ့ဎီၩ့ဘၪအၥိၭ ပချဲၩ့ပဆၧချဲၩ့နးဆ့ မီၪ့ဎီၩ့လူၬလအ့ၬဂီၩ့ ဂဲၫလၩ့ဆၫ့ထၪ့ကဆံၭဆံၭနီၪလီၫႉ ဖျိၩ့ၡိဖိၪမီၪ့ဎီၩ့လါနၫ့ ချဲၩ့အခၫ အလူစဲၪ့ထၪ့ အဎွံၪ အဎၧၫ့ လမီၪ့ဎီၩ့ဘၪ ပကဒၪဘၪနီၪလီၫႉ

ထၧၫ့ဖုဝဲဖျိၩ့ဆၨၩလၧအအီၪ ဖျိၩ့ဆၨၩခးဒီၪ့ႇ မိၫ့ဆၨၩခးဒီၪ့ႇ တန့ၥၫရံၫခးဒီၪ့ ပထၧၫ့ဖုဝဲဖျိၩ့ၡိမုထၪ့ၥံၪလဖၪ ချဲၩ့ထၪ့ဆၧချဲၩ့ အလူလဖၪနီၪ ဖျိၩ့ၡိမုနုၬၥံၪလၧအအီၪ ထံၫထၪကျိၩ့ႇ တခိၩ့ခးဒီၪ့ၥံၪလဖၪ အဆၧအလူနီၪ ကမီၪ့ဎီၩ့အ့ၬ ကဆံၭကခ့ၭ ဖိၪနီၪလီၫႉ အ့ၪပခိၭနၪထံၪထံၪဆါဆါနီၪ ပနၪကၥ့ၪလနၩ့နီၪလီၫႉ ဖျိၩ့ၡိၬမုထၪ့ (အရှေ့ပိုးကရင်)မွဲဂ့ၩ ႇ ဖျိၩ့ၡိမုနၬ(အနောက်ပိုးကရင်)မွဲဂ့ၩ ပဂဲၫထဲၩ့အီၪကၠၧၫ့ကၠၧၫ့လၧ မိၫဆၨၩၥံၪခီၫလၧ ဖျိၩ့ဖျိၩ့အိၩယူၭနီၪလီၫႉ ပဂဲၫထဲၩ့အီၪကၠၧၫ့ကၠၧၫ့လၧ မိၫဆၨၩၥံၪအကၠီၩ့ ဘဲၫမိၫအၥိၭ ဖျိၩ့ၡိနးဆ့ မွဲအလံၬလဲအီၪဆ့နီၪလီၫႉ

အီၪလၧ ပခိၩခးဒီၪ့ႇ တခိၩ့ခးဒီၪ့ႇ ထံၫထၪကျိၩ့ ဖျိၩ့ၡိဒဲ ဖျိၩ့ၡၩ့ၥံၪနီၪ ဂဲၫထဲၩ့အီၪကၠၧၫ့ကၠၧၫ့လၧ မိၫဆၨၩဆၬဖိၪၥံၪအီၪလၧ စဎွၩပၧၩ့ဆၧအထီအိၩတၭ ၥိၩ့ထၪ့ မိၫအလံၬလဲနီၪလီၫႉ မွဲဆၧဘဲၫနီၪ လၧစဎွၩအထီဒံၭဒၪအိၩ ဖျိၩ့ၡိဒဲဖျိၩ့ၡၩ့န့ၫၦဖျိၩ့လံၬလဲနီၪ မွဲလဒၪဘၪဝ့ၫအကၠီၩ့ နဲၩ့ထၬဝ့ၫဒၪနီၪလီၫႉ လၧခဲၫမၬ ဆၧအီၪကီၪ့ဆရၫၥံၪ ဖိၬလိၬထၪ့ၦဖျိၩ့လံၬလဲယီၩ ဂဲၫအီၪထၪ့ထဲၩ့နီၪလီၫႉ

ထၧၫ့ဖုဝဲထံၩၥိၭဖျိၩ့ဖိၪၥံၪဧ့ႇ ယအဲၪဒိၭအၪ့နၩ့လီၩအ့ၪနၥံၪ ပထၧၫ့ဖုဝဲဖျိၩ့ဆၨၩလဖၪ ဘၪနီၫလဲၪ ပဆၧချဲၩ့လမီၪ့ဎီၩ့ဘၪ အဂဲးနီၪမွဲဒၪထီးယီၩလီၫနဲၪႉ ပကဲၪထၧၫ့ဖုဝဲဖျိၩ့ဆၨၩၥံၪလဖၪ ပအီၪအလးလမီၪ့ဎီၩ့ဘၪဒဲ ပဆၧလူဆၧချဲၩ့လမီၪ့ဎီၩ့ဘၪထီးအလူၬလါနၫ့ ပအီၪၥၭမၧၫ့ဝ့ၫဒၪလၧ နိၪတၨၩယါကဘံၪ့အဖၫ့လၬလီၫတၭ ပကအီၪကၠၭလၧ ဆၧမၩဆၧၩ့လိၬၥၭႇ ဆၧအဲၪဆၧကွံၩဒဲ လၧဆၧယံၩဆၧၡီၩ့အဖၧၩ့ ကိၭဂၩဒ့ၭလါဆံၭႉ