ပလီၩလၧၥံၪ့ကျိၭစွါဘဲၫ အၪဒၪဆၧ ၦၡၩကစီၪဘၪဒိၭလၧ လဘူၭဘၪလၧၦၡၩအလး ၥံၪ့ကျိၭၡါမုနၧၫ့ဖၫနးဆ့ ၦၡၩဒဲ ၥံၪ့ကျိၭနီၪ မွဲဆုးကျိၭအၥၭနီၪလီၫႉ အ့ၪၥံၪ့ကျိၭလအီၪဘၪ ဂၪ့ခိၪချိၪ့ဒဲ ခိဆၧၩ့ချံၪ့ ၦၡၩအဆၧအၪ့ဆၧအီၪ ကအၪ့လဲၩ့ထၪ့အၥၭလီၫႉ ထံၫခးအၪဒၪဆၧနီၪ အၪ့ဆၫခွံၬလၧအထံၫခး ၥံၪ့ဒဲ ဆၧပိၭဆၧလၫ့လၧအန့ထၪ့ၥံၪ့အီၪ လဖၪဂီၩ့ လၧထံၫခးကလ့ၩထၪ့လ့ၩထီၫ့အဂး ထီးန့နီၪ မွဲလါနၫ့ဂ့ၩ ၥံၪ့ကျိၭအခိးအတၩဎိၩဒိၪဝ့ၫဎွ့ပၥ့ၪလဲၪနီၪ ၦလၧအအၪ့ဎၬ အီၪၡၩခိၬဖိၪနီၪလီၫႉ
ၥံၪ့ကျိၭၥံၪနီၪ လၧၦခမျၧးၥံၪအဂး အခိးအတၩန့ဝ့ၫပၥ့ၪလဲၪစွါဘဲၫ မၩဂ့ၩထၪ့ ခိဆၧၩ့ချံၪ့ႇ ဖံၬအထုၪ့လဂၭဂီၩ့ ဘၪအဂး ပဒၩ့ထၬဝ့ၫ ႇထံၫခးအခၪ့ထံၭခၪ့ဎၧၩ့မွဲဝ့ၫ ဆၧဖိၪဆၧဎါၥံၪလဖၪ အီၪဒုၩ့အၥၭအလး ဒဲ ၦခမျၧးၥံၪအဂးနးဆ့ မွဲဒံၭလၧ အၥၭကဎွံၪထၪ့ လ့ၩအီၪပွံၭအလးဒံၭနီၪလီၫႉ ဆၧလၧၥံၪ့ကျိၭနီၪ ပဒၩ့ထၬ မုမ့ၬဒဲ လံၩအကၠီၩ့တၭ လၧၥံၪ့ကျိၭအီၪအလးနီၪ ခိဆၧၩ့ချံၪ့ဂ့ၩနီၪလီၫႉ ခိဆၧၩ့ချံၪ့ဂ့ၩမၬဆံၭ ၦမၩဆံၬဖိၪၥံၪလဖၪ ၥုၪ့ဆၧဖျါဆၧ ကဂ့ၩနီၪလီၫႉ လၧခိၪလီၩ့ဒၩ့ခိၪလဖၪ အ့ၪမွဲၥံၪ့ကျိၭအီၪစွါဘဲၫ ဆၧဆၧၩ့နၭနီၪလီၫႉ အခီၫပယီၫနီၪ လၧၥံၪ့ကျိၭအဖၫ့ခိၪ လံၩနီၪ ချံၪ့ဝ့ၫဒဲ ထံၫအခူၪပၫထဲးဎုၬလၧလံၩဖၧၩ့နီၪ လဲၩ့မွံၩထၪ့အၥၭလၧ လံၩအချံၪ့အခၫ ကဲၪထၪ့ ဆၧဆၧၩ့အကၠီၩ့ မွဲဆၧဘဲၫနီၪ ၥံၪ့ကျိၭအီၪအလးနီၪ ဆၧဆၧၩ့အၪနၭနီၪလီၫႉ ပခးပယၩ့ကျၩယီၩ ထံၫဘၪၡၩဝ့ၫဒၪနီၪ မွဲၥံၪ့ကျိၭၡၩဝ့ၫဒၪအကၠီၩ့နီၪလီၫႉ
ၥံၪ့ကျိၭဒဲ ဖံၬအထုၪ့နီၪ ဘၪဒိၭနဲၩ့လိၬၥၭ လၬခီၫလၬဘၭနီၪလီၫႉ လၧၥံၪ့ကျိၭဖၧၩ့ ၥံၪ့အထံၭလဖၪ အဆၫနီၪ န့ဝ့ၫလၧ ဖံၬအထုၪ့ဖၧၩ့နီၪလီၫႉ ထီးနီၪ လံၩဂဲၫအခၫမွဲဂ့ၩ ဆၧဆၧၩ့ဆီၪ့အခၫမွဲဂ့ၩ ထံၫဆ့ၭလၩ့ယွၩအကၠီၩ့ ဘၪထံၭဆၫဖံၬအထုၪ့ဘဲၫကလၩ့ၡၩအဂး ၥံၪ့ထံၭလဖၪ ဘၪမၩဆၧၩ့ပဒၩ့ထၬဝ့ၫနီၪလီၫႉ ဆၧဆၧၩ့လၩ့ထံၫလဖၪၥံၪနီၪ မွဲဘၪလၩ့ဖံၬကထုၪ့လီၫအ့ၬဂီၩ့ ဘၪထၬၥံၪ့လၪၥံၪ့ထဲၩ့ၥံၪကဆၫ့အကၠီၩ့တၭ အဂဲးဆီၪ့နၭလၧၩ့အ့ၬနီၪလီၫႉ လံၩဂဲၫဆီၪ့ ထံၫဎိၩလၩ့နးဆ့ လၧၥံၪ့ကျိၭအီၪအလးနီၪ ပဒၩ့ထၬ ဖံၬအၪ့လၩ့လဲန့နီၪလီၫႉ