ထၧၫ့ဖုဝဲထံၩၥိၭ ၦလၧအဲၪဒိၭခိၭနၪၦဖျိၩ့ၡါဖိၪၥံၪဧ့ အီၪဆီၪ့အီၪချဲၪ့ ကိၭဂၩဒ့ၭလါဆံၭနဲၪႉ မုကနွ့ၫယီၩ ၦဖျိၩ့ၡါဖိၪအနိၪ့ ယမိဆုးအဲၪဒိၭလီၩအ့ၪဘၪနၥံၪ နးမံၩ့ဖီၫဝီၩၡါဖိၪနီၪ ထီၩ့လၧ နးမံၩ့ဖီၫဝီၩအမိယါ ၦမုၪမဲၪအဖိၪမုၪလဂၩ လ့ၩလၧနီးဖၧၩ့ ကျဲၩ့မၩထၬအၥၭ ဘဲၫနးမံၩ့ဖီၫဝီၩအၥိၭနီၪလီၫႉ

ၦမုၪမဲၫအဖိၪမုၪ နးမုၪၥၧၫ့ထၧၩ့ လ့ၩထီၩ့လၧနီးဖၧၩ့အခၫ စဎွၩဖိၪနီၪ ၥ့ၪယၫလၧ လမွဲဘၪ အဝ့ၫအမၫၥၭဘီၩ့နီၪလီၫႉ မွဲဆၧဘဲၫနီၪ စမုၪလၧဂဲၫထဲၩ့ပၫနီၪ လမွဲဘၪအဝ့ၫအမၫအကၠီၩ့ လီၩဝ့ၫလီၫႉ လါနၫ့ နးမုၪၥၧၫ့ထၧၩ့နီၪ လီၩလၩ့အၥၭမွဲ နးမံၩ့ဖီၫဝီၩလီၫႉ လါနၫ့ ကမွဲဒၪကမိလီၩဝ့ၫနးမံၩ့ မွဲစဎွၩဖိၪလနဲၩ့ဘၪဒဲ အဖိၪခွၫဖိၪနးဆ့ ၥ့ၪယၫဝ့ၫလၧ လမွဲဘၪအဝ့ၫအမိမိတၭ မွဲလအဲၪဘၪဝ့ၫနးဆံၭလီၫႉ စဎွၩဖိၪနီၪ ကနံၩဒဲ ကနံၩ နၪ့ထၪ့မွဲ အမၫၥၭဘီၩ့ နးမံၩ့ဖီၫဝီၩလီၫႉ အဖိၪခွၫဖိၪနးဆ့ နၪ့ထၪ့အမိမိ ကနံၩကနံၩအၪ့စၪ့အမိမိ ခိၪမၪခိၪမၪလီၫႉ

နးမံၩ့ဖီၫဝီၩၥံၫဂီၩ့ ကဲၪထၪ့ထဲၩ့ ထိၪကဘံၪ့နီၪလီၫႉ ကနံၩနီၪတၭ စဎွၩဒိၪႇ နးမံၩ့ဖီၫဝီၩအဝၩၥၭဘီၩ့ စဎွၩဖိၪဒဲ အဖိၪခွၫ ဆၧၫ့နၩ့လီၩ့ထဲးဆၧအထီ ထိၪကဘံၪ့နီၪ ဂဲၫဆုးလၩ့လၧ အဝ့ၫၥံၪအမ့ၬယၫနီၪလီၫႉ အဝ့ၫအဝၩၥၭဘီၩ့ စဎွၩဖိၪ ဒၪစိၩထိၪနီၪတၭ နၪ့ထၪ့အမၫ စံၭစိၩထိၪနီၪ နၧၩအ့ၪမွဲ ယမၫၥၭဘီၩ့ စွါဘဲၫ ဂဲၫဆုးလၩ့လၧ ယစူၪယၪၥၭလီၩယီၩအခၫ ထိၪနီၪ ဂဲၫဆုးလၩ့လၧ အဝ့ၫအစူၪယၪၥၭလီၩ့နီၪလီၫႉ ထီးနီၪ ထိၪဖိၪနီၪ စီၪဝ့ၫလၧ အမၫအဝံအလၩတၭ အဲၪကွံၩကၠၭဝ့ၫ အထၧၫ့ဖိၪဖါနံၫဂၩ ဆၧမုၬအၥၭအၪမၬနီၪလီၫႉ

နးမုၪၥၧၫ့ထၧၩ့ၥ့ၪယၫ ဆၧအဂဲးအဖးယီၩအခၫ အၥၭထၪ့ဒိၪဒိၪလီၫႉ ကနံၩနီၪတၭ စဎွၩဖိၪနီၪလ့ၩစဲၪ့လၫ့လၧခီၫ့အထီ နးမုၪၥၧၫ့ထၧၩ့မၩဘျီၪ့ခွံၬအဝ့ၫအဖိၪခွၫအမ့ၬၥၪကခီၫဂီၩ့ မၩၥံၫခွံၬထိၪနီၪဂီၩ့ အၪ့ကၪထၬဝ့ၫလီၫႉ စဎွၩဒိၪအဖိၪခွၫဂဲၫထဲၩ့ထီၩ့အခၫ နးမုၪၥၧၫ့ထၧၩ့စံၭ ထိၪယီၩမၩဘျီၪနဖိၪခွၫအမ့ၬၥၪအကၠီၩ့ ယမၩၥံၫခွံၬအခၫ စဎွၩဖိၪယီၩ ၥၭထၪ့ မွဲလအၪ့ဎၬလၧၩ့ဘၪဆၧနးမံၩ့တၭ ခွံၬၡိၬခွံၬထိၪနီၪကထံၪလီၫႉ ထိၪအကၪနီၪ လၩ့ထ့ၬဘၪလၧ ဖံၫၥၭၡါလဂၩအဂံၪ့ဖၫ့ခိၪတၭ လၩ့ထ့ၬလၧဆၧဖၫ့လၬအခၫ ကဲၪထၪ့ဘဲၫဖီၫၥၪကဖျိၪ့အၥိၭနီၪလီၫႉ ကနံၩနီၪတၭ ဖံၫၥၭၡါနီၪ လ့ၩဆၧလးခဲၫ့အထီ နါဂၧၫ့ဆၧအလူ ဖံၫဧ့ နကဘၪထဲးယၧၩ တၭ လီၩ့ယိဎွါဝ့ၫအခၫ ဒၪလၧဖီၫၥၪကဖျိၪ့တၭ ဂဲၫထဲၩ့န့ဝ့ၫလၧအဂံၪ့လီၫႉ လၧခဲၫ့ ဖီၫၥၪနီၪ ကဲၪထၪ့လၧ နးမံၩ့ဖီၫဝီၩတၭ မၩဆၧၩ့ဖံၫၥၭၡါယီၩ ဂံၪ့အဆၧမၩနီၪလီၫႉ ဖံၫနီၪမွဲ ဒုၭလ့ၩအဝ့ၫဆၧနးစီၪ့အ့ၬဂီၩ့ အၪ့မၧၫ့ဝ့ၫ မၩဂံၪ့အဆၧမၩနီၪလီၫႉ

ကနံၩနီၪတၭ နးမံၩ့ဖီၫဝီၩ အဖိၪခွၫနီၪ ဂဲၫကွ့ၩၥဲၫလၧအၥိၭၥံၪ လၧဖီၫၥၭၡါအဂံၪ့ဖၫ့လၬလီၫႉ လၧခဲၫ နးမံၩ့ဖီၫဝီၩဆၬဆၧ အထီ အလူၫဖျိၪ့လၩ့ထ့ၬတၭ အၪ့မၧၫ့ဖိၪၥၪအၪ့ထုၪ့အ့ၪအခၫ အဖိၪခွၫဒၪအဝ့ၫကထုၪ့ဎး ၥ့ၪယၫဝ့ၫလၧအမိမိတၭ ထဲၩ့လီၩအ့ၪအဖါဖါၥၭဘီၩ့ ထီးအလူၬနီၪလီၫႉ

ထၧၫ့ဖုဝဲမုၪခွၫၥံၪဧ့ မုကနွ့ၫယီၩ ပၡါဖိၪယီၩ ပကအီၪပထုၬထၬအလးထယီၩဂီၩ့ နးမံၩ့ဖီၫဝီၩလဂၩ ဒၪဎီၩ့ထဲၩ့လိၬၥၭလၧအဖိၪခွၫ အခၫ ၦၡါဖိၪယီၩကဆုးကဲၪထၪ့ ဘဲၫၥ့ၪလဲၪနီၪ လၧခဲၫ့မုနွ့ၫမၬ ပကဒၪဎီၩ့ထဲၩ့လိၬၥၭလၧ ၦဖျိၩ့ၡါဖိၪအနိၪ့ ဖၧၩ့ယီၩနဲၪႉ