ဟၨၩ ယဆၧၥၭမၧၫ့ယီၩနီၪ အိၭဆၧအ့ၬယါဧ့ စီၪဘဲၫနီၪဂီၩ့ ၥၭနူန့ၭလဂ့ၩႉ ဘဲၫပၥၭကနူ န့ၭအဂး ၦအမၩထၪ့ဆၧနီၪမွဲၦဂူၫဂၩအ့ၬႉ မွဲကလိၭကလၭအ့ၬႉ မွဲဒၪပနၫ့ဆါဒၪပၧၩနီၪလီၫႉ ဘဲၫ ပမၩအၥိၭ ပကန့ဘၪထဲၩ့ဆၧချဲၩ့အၥိၭ ပဆၧၥၭမၧၫ့ဖၧၩ့ဂဲၫကဲၪထၪ့အ့ၪပၧၩလဖၪနီၪ မွဲဒၪပဆၧမၪ ဒၪပၧၩအကၠီၩ့တၭ ဆၧဘၪမၪဘဲၫနီၪၥိၭလဖၪနီၪ မွဲပကဘၪကွဲၪလၩ့ခွံၬနီၪလီၫႉ
နစီၪလၩ့နၥၭ နလၩ့ဂံၬအၪမၬလ့ၬယူၭဧၪႉ ၥၭလၩ့ဆ့ၭလၩ့ယွၩဒံၭလဂ့ၩႉ နအၪ့ဎၬဆၧနီၪ ဘၪမၪအကၠီၩ့ မၩဂ့ၩထၪ့ထဲၩ့လါဆံၭႉ ယိလၧနနဲၩ့ဝါဝါနီၪ ကဲၪထၪ့ဘၪၦၡၩလါနၫ့ဂ့ၩ ခါကမုၪခါႇ ဘျီၪကမုၪဘျီၪႇ နါအၧၩ့ကမုၪအၧၩ့ ၦၡၩဘဲၫယီၩၥိၭလဖၪ အဆၧၡၪ့ဆၧယၬနီၪ အၪ့ဎၬယိနးထံၪ ဒၪလူၬႉ လၩ့ၥၭမဲၪဝ့ၫဒၪအၪမၬလ့ၬမွဲအ့ၬဧၪႉ အ့ၪမွဲနကအၪ့ဎၬထၪ့ဘဲၫနီၪစွါဘဲၫ နကစံၭလၩ့ထဲၩ့ ဘၪနၥၭ ယါကဆါဧ့ ယဆၧၥၭမၧၫ့ယီၩနီၪ ကီၩ့ယါဒံၭ နကစံၭထၪ့ဘၪဆၧ ဘဲၫနီၪလီၫႉ
လခဲၫ့ကမံၩ့နီၪဘိၭ ယဆၧၥၭမၧၫ့ယီၩနီၪလ့ၩထၪ့လ့ၩထီၫအီၪဘၪနၭလ့ၬယူၭယါဧ့ အဂ့ၩဒိၪ ထုၬဒ့ၭ နစီၪလၩ့ၥၭဘဲၫနီၪဂီၩ့ စီၪဎိၩလၩ့နၥၭ နၭလ့ၬလဂ့ၩႉ အီၪက့ၪထၪ့ထီၫနၥၭလဂ့ၩႉ ဆၧကိၭမံၩ့ နီၪ မွဲဒၪကဆိကလးဖိၪလီၫႉ အ့ၪမွဲနစီၪလၩ့ဘၪနၥၭ နအီၪဘၪထီၫလ့ၬယူၭစွါဘဲၫ ယိထၪ့ထဲၩ့ လၧနဖၫ့ခိၪ ၦအကဲၪဒိၪအၪန့နၧၩ ၦအလ့ၩထၪ့လ့ၩထီၫအၪန့နၧၩဘဲၫနီၪ အီၪဝ့ၫဒၪဒံၭက တၨၩဒံၭႉ လၧဂၪ့ခိၪချိၫ့ဖၧၩ့ ဘီလျံနာ အီၪဝ့ၫဒၪ အဂၩ၁၀၁၁ဂၩဖၧၩ့ နပၫထဲးယူၭဧၪႉ ဆၧနီၪအကၠီၩ့ နစီၪ လၩ့နၥၭနကဲၪဒိၪကဲၪမုအၪလ့ၬယူၭနီၪ အီၪဒၪန့ၫဆၩ့ဖီၫကဖိၪလီၫႉ
ဆၧနီၪအကၠီၩ့ ပစီၪလၩ့ပၥၭ ပလၩ့ဂံၬဂီၩ့ ၥၭလၩ့ဆ့ၭလၩ့ယွၩဘၪလဂ့ၩႉ မၩဒိၪထၪ့ထီၫ ထၪ့ထဲၩ့နၥၭနီၪဆံၭႉ ဘဲၫနီၪအၥိၭ ပစီၪလၩ့ပၥၭ ပကဲၪဒိၪကဲၪမုအၪလ့ၬယူၭဂီၩ့ စီၪဎိၩလၩ့ၥၭလဂ့ၩႉ ၦအကဲၪဒိၪကဲၪမုနၭန့ပၧၩ အီၪဝ့ၫဒၪ ကတၨၭဒံၭနီၪ နၪၥ့ၪထၬလါဆံၭႉ အ့ၪမွဲပစီၪဎိၩလၩ့ပၥၭနၭ လၨၫနီၪ လခဲၫ့ပထဲၩ့လၩ့ဂံၬထဲၩ့ၥ့ၪနီၪဆ့ ၥ့ၪယၫထၬလါဆံၭႉ