လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မံၩ့ဎိၩၥၪဖျီၪ မုခွၫလၧအအီၪအနိၪ့ အဆၧရၩလၩ့ဖၧၩ့ မုကနံၩယီၩ ယအဲၪဒိၭ ရၩလၩ့န့အ့ၪဘၪနၥံၪနီၪ မွဲဝ့ၫဒၪ ၦဆံၫ့ဎံၪ Francis Borgia အဂဲးအကၠီၩ့နီၪလီၫႉ ၦဆံၫ့ဎံၪ Francis Borgia ယီၩ အီၪဖျဲၪလၧ နံၪ့ (1510) လၧ ခး Spain နီၪလီၫႉ ၦဆံၫ့ဎံၪ Francis Borgia ယီၩ ခီၫလၧ ၥၭဘၪ့ အခံၫ့ဒၪအိၩ အီၪလၧကၠဲၭလူၬကၠဲၭထၫဂီၩ့ ၦၡၩအဲၪအဝ့ၫ ကိၭဂၩဒ့ၭနီၪလီၫႉ အဝ့ၫအၥၭအီၪ (၁၈) နံၪ့နီၪ လ့ၩမၩဆၧမၩလၧ ၦဎွၩခွးရိၩ့နီၪလီၫႉ
နံၪ့ (၁၅၃၉) နံၪ့နီၪ အဖါဖါၥံၫဖီၩ့ခွံၬ ဝ့ၫဒၪနီၪလီၫႉ အဝ့ၫယီၩထၪ့ၡါဂီၩ့ အဖိၪန့ထၪ့ (၈) ဂၩနီၪလီၫႉ လယံၬလမီးဘၪ အဝ့ၫ အမၫၥံၫဖီၩ့ခွံၬ အဝ့ၫနီၪလီၫႉ ဆၧနီၪအကၠီၩ့ အဝ့ၫယီၩ ကရွံထၪ့ထဲၩ့ ဖၧၩ့ၥၭလၧခဲၫ့ကဘီၩ့အဂး စ့ၩရၫ့လၩ့ၥၭနီၪလီၫႉ နံၪ့ (၁၅၅၀) နီၪ လ့ၩကဲၪၥၫ့ခၫလၧ Jesuit ခရၧၫ့ဖၧၩ့နီၪလီၫႉ အဝ့ၫကကဲၪထၪ့ ၥၫ့ခၫအဂး ဂဲးဖ့ၪဆီၪ့အဝ့ၫ ဆၧဒၪခီၩ့ ခၫ့ဖျီၫ့ အီၪကမံၩ့နီၪလီၫႉ ကနံၩ့နီၪတၭ အဝ့ၫလ့ၩဒၪ ၦဎွၩမုၪ Isabella အစွၪဂီၩ့ အၥၭခံဖၧၩ့ဆၧကဲၪထၪ့ကမံၩ့နီၪ အခီၩ့ဒၪအိၩ အဝ့ၫယီၩ ဂ့ၩအၪမၬဒ့ၭနီၪလီၫႉ ၥံၫဖီၩ့ခွံၬကကၠၪနီၪ ဆၧအဂ့ၩ လၩ့မၬခွံၬဂီၩ့ နၧၫ့အုၪထီးအလူၬနီၪလီၫႉ
ဆၧနီၪအကၠီၩ့ အဝ့ၫန့ထၪ့ထဲၩ့ ဆၧဂဲးဆါဂီၩ့ လ့ၩကဲၪၥၫ့ခၫနီၪလီၫႉ St. Ignatius ၥံၫဖီၩ့ခွံၬဂီၩ့ အဝ့ၫဘၪကဲၪ ၥၫ့ခၫအခိၪအနါနီၪလီၫႉ ၦဆံၫ့ဎံၪ Francis Borgia အီၪၥၭမၧၫ့ဖၧၩ့နီၪ လၩ့မဲၩ အၪမၬဒ့ၭနီၪလီၫႉ ၦၡၩအၪဒၪဆၧနီၪ န့ထၪ့ဘၪ စကြမၫ့တူၩ (၅) မံၩ့ အ့ၪလမွဲဘၪ (၆) မံၩ့ နီၪလီၫႉ လါနၫ့ႇ ၦဆံၫ့ဎံၪ Francis Borgia ယီၩ ထၪ့ၡါဂီၩ့ လ့ၩကဲၪၥၫ့ခၫအကၠီၩ့နီၪ န့ထၪ့ဘၪ စကြမၫ့တူၩ (၇) မံၩ့နီၪလီၫႉ ၦဆံၫ့ဎံၪ Francis Borgia အီၪၥၭမၧၫ့ ထၧၫ့ဘီၩ့ယၫနီၪ အီၪဘၪလၧ လးလၩအမံၩ့မံၩ့နီၪလီၫႉ လါနၫ့ႇ ဖျါဖျ့ၭခွံၬ လးလၩထီးအလူၬဂီၩ့ ရွံထၪ့ ၦအဆံၫ့အဎံၪ ဖၧၩ့ၥၭနီၪလီၫႉ အဝ့ၫကဲၪၥၫ့ခၫ အခိၪအနါဒၪဆၧ ၥၭထၪ့ထီၫ အီၪနးဆံၭအ့ၬနီၪလီၫႉ ဆၧနီၪအကၠီၩ့ႇ ၦၡၩအဲၪအဝ့ၫ အၪမၬဒ့ၭနီၪလီၫႉ
ၦဆံၫ့ဎံၪ Francis Borgia ယီၩ မွဲဝ့ၫဒၪ ၦထၪ့ၡါဂီၩ့ကဂၩနီၪလီၫႉ လါနၫ့ အဝ့ၫကဲၪထၪ့ ၥၫ့ခၫကကၠၪနီၪ အီၪအၪ့ ဆံၫ့ဆံၫ့ဖျ့ၪဖျ့ၪလၧ ဆၧဆၫ့လၩ့ၥၭဂီၩ့ ကျ့ၭစၧၭမၩ ၥၫထနၫဆၧမၩ ဂ့ၩဂ့ၩဘၪဘၪ နီၪလီၫႉ အဝ့ၫ မၩၥၫထနၫဆၧမၩအခံၫ့ ဘၪဒၪဆၧၫ့ယၫလၧ ဆၧအီၪဆီၪ့အီၪချဲၫ့ၡၪ့နီၪလီၫႉ နံၪ့ (၁၅၇၂) နံၪ့နီၪ ၥံၫဖီၩ့ခွံၬဝ့ၫဒၪလၧ ဝံး Roma နီၪလီၫႉ နံၪ့ (၁၆၇၀) နီၪ ၦၡၩရွံထၪ့အဝ့ၫ ၦဆံၫ့ဎံၪနီၪအကၠီၩ့ ယရၩလၩ့န့အ့ၪဘၪနၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ အဲၪကွံၩဘၪ ထၧၫ့ဖုဝဲထံၩၥိၭ ထီးအလူၬႇ မွဲနၥံၪလၧၫ့ဎွ့ၩဝ့ၫၪလၧ ကဆါယွၩ အဆၧအဲၪဆၧကွံၩလါဆံၭႉ