ဖျိၩ့ဆၨၩၥံၪလဖၪနီၪ ခးတရူၭအလးခဲၫ့လံၩထံၭကကဲၩ့ခီၫ ကဆၫ့ လၧၥၫ့လွ့ၫဘံၩႇ မဲခီၫဘံၩဒဲ ရွံၫလံၫဘံၩ ဧရၫဝတံၫဘံၩ ဘံၩ(၃) ဘီၩ့ယီၩ ဂဲၫထဲၩ့ဖိၬထုၬလၩ့ဝ့ၫဂီၩ့ အီၪပျံၩပျၩလၩ့ထီးအဎံၩ့ လၧအဝ့ၫၥံၪထီးအလးၥံၪနီၪလီၫႉ လၧဘံၩယီၩ (၃) ဘီၩ့အဖၧၩ့ ဖျိၩ့ၥံၪအဂဲၫထဲၩ့ဖိၬလၩ့ ဧရၫဝတံၫဘံၩနီၪ အီၪလၧ ပခိၩခးဒီၪ့ ပၠ့ၫဒဲ တီၫ့ငူၫၥံၪနီၪလီၫႉ ထီးကဆၫ့ ဂဲၫထဲၩ့အီၪထီၩ့ထဲၩ့လၧ တခိၩ့ဝံးဒီၪ့နီၪလီၫႉ လၧခဲၫ့ ထီၩ့ဒံၭလၧ ပခိၩခိၪလီၩ့လီးဘီၩ့ႇ ထံၫထၪကျိၩ့ဒဲ ရခဲၫ့ခိၪလီၩ့လီးဘီၩ့ထၧၫ့ဘီၩ့ယၫနီၪလီၫႉ

ဆၧလၧထံၫထၪကျိၩ့နီၪ ပခိၩခးဒီၪ့လံၩထံၭကကဲၩ့ခီၫႇ တခိၩ့ခးဒီၪ့ ဒဲ ဧရၫဝတံၫခးဒီၪ့ၥံၪနီၪ အီၪဂဲၫထဲၩ့ကိၭထၬဝ့ၫခီၫလၧ ခိၩလၩဘွၩပၧၩအထီဒံၭဒၪအိၩနီၪလီၫႉ ဆၧအလးၥံၪလဖၪယီၩ လၧအဖီၩ့ခွံၬနံၪ့ဆံၫလၩယံၬဒံၭဒၪအိၩ မွဲဝ့ၫဒၪ ပၫ့လဲၫ့ထံၫမ့ၬပၫနီၪလီၫႉ လၧခဲၫ့ ထံၫထၪ့ထံၫလၩ့တၭ ကျိၩ့ၥံၪ ဂဲၫဖျီၪ့ထၪ့ႇ ပၫ့လဲၫထံၫထဲၩ့လၩ့အခၫ ၦၡၩဒဲ ဆၧဖိၪဆၧဎါၥံၪ ဂဲၫအီၪထၪ့နီၪလီၫႉ ဖျိၩ့ၥံၪနီၪ ဂဲၫထဲၩ့ၥုၭအီၪထဲၩ့အၥၭ ကဆံၭကဆံၭလၧ ဧရၫဝတံၫထံၫကၠီၪ့ ကျိၩ့ဖံၬဖၩ့ခိၪနီၪလီၫႉ ပကအၪ့ဎါလီၩ့ဎွါယိထဲၩ့လၧ ထီမုဆၫကနံၩယီၩ စွါဘဲၫ ပခိၩႇ တခိၩ့ႇ ဧရၫဝတံၫၥံၪနီၪ ပကဒၪဘၪ ၦဖျိၩ့ဆၨၩဖိၪၥံၪ အီၪအၪမၬနီၪလီၫႉဖျိၩ့ၥံၪလၧအဂဲၫထဲၩ့ဖိၬလၩ့ မဲခီၫဘံၩဒဲ ရွ့ၫလံၫဘံၩၥံၪနီၪ ပဘၪဂဲၫအီၪထီၩ့လၧ ပခိၩႇ တခိၩ့ဒဲ ဧရၫဝတံၫယီၩအကၠီၩ့ အီၪနးမံၩ့အ့ၬနီၪလီၫႉ

အဝ့ၫၥံၪနီၪ အီၪဎံၩ့လၩ့ထီၩ့ထဲၩ့လၧ ၥဲၫ့ခိၪလီၩ့ဒၩ့ခိၪႇ ကယၩ့ဆၨၩခးဒီၪ့ႇ ဖျိၩ့ဆၨၩခးဒီၪ့ႇ တန့ၩၥၫရံၫခိၪလီၩ့ ဒၩ့ခိၪကဆၫ့ ထီၩ့စိၩလၧ ၥဲၫ့ခးႇ လၫအိၫႇ ဖ့လပ့ၩထံၫခးၥံၪနီၪလီၫႉ မွဲဆၧဘဲၫနီၪ ဖျိၩ့ဆၨၩၥံၪနီၪ ဆၨၩဆၬလမီၪ့ဎီၩ့ဘၪအၥိၭ ဂဲၫထဲၩ့ဖိၬထုၬလၩ့ ထံၫကၠီၪ့နးဆ့ ပမီၪ့ဎီၩ့ဧၪအ့ၬနီၪလီၫႉ လကၭဒံၭဘၪ ပဘၪဒၪဎီၩ့ဆၧၫ့ယၫ ပဘၪဂဲၫထဲၩ့အီၪအလးအကျဲၩ့ ခိဆၧၩ့ချံၪ့ နဲၩ့ဎီၩ့ဆၧလၩ့အၪ့ယိၫ လမီၪ့ဎီၩ့ဘၪအၥိၭ ဖျိၩ့ဆၨၩၥံၪလၧအထီၩ့လၧခိၪလီၩ့လးကျဲၩ့လဖၪနးဆ့ မွဲအဝ့ၫၥံၪ ဘၪဒၪဎီၩ့ဆၧၫ့ယၫဆၧယီၩဆ့ နီၪလီၫႉ ထံၫထၪကျိၩ့ ဖံၬဒၩလးႇ ထီးအထီၩ့စိၩပၫ့လဲၫ့နဲၩ့ ဖျိၩ့ၥံၪလဖၪ မွဲအီၪဆ့နီၪလီၫႉ