ဆၧမၩဂၭဂီၩ့ပၥၭန့အီၪဝ့ၫဒၪအၪမံၩ့အၪမၠိၩလီၫႉ ဆၧလဖၪနီၪ မွဲပကဘၪခွံၬၡိၬခွံၬနီၪလီၫႉ ဘဲၫပၥၭကဂၭဂီၩ့အၥိၭ ဘဲၫပၥၭကဘံၪဘူၪၥၭအၥိၭ မၩဝ့ၫဒၪန့နီၪ မွဲလၧပဖျါလုထၬပၥၭဂီၩ့ ပၥုၪ့ ၥၭဂဲၩဝၭထၪ့နီၪလီၫႉ
ဆၧနီၪအကၠီၩ့ ၥုၪ့ခိၥၭဝီၩလဖၪနီၪ ပကဘၪမၩၡူၪလၩ့ထၬႇ ပကဘၪပၧၩ့ထၬပၥၭႇ ပက ဘၪခွံၬလၩ့ထၬ ၥၭထၪ့ထီၫလဖၪႇ ဆၧၥုၪ့လဲးၥၭဘျၪအီၪလၧ မုၪႇခွၫ အဖၫ့ခိၪလဖၪနီၪဆ့မွဲ ပက ဘၪပၧၩ့ထၬ ထၧၩ့အန့နီၪလီၫႉ
အ့ၪမွဲနကမိအီၪလၧ ၥုၪ့မုၬၥၭၡူၪအဖၧၩ့နီၪဘိၭ အၪ့ယိၫခဲၫ့ကံၭဆၧ ဖျီးလၨၪလဂ့ၩ ဘၪၥၭ ခိဆၧအီၪနးမံၩ့အ့ၬႉ ၥၭမဲၪဆၧနၭနၭလဂ့ၩ မွဲကကဲၪထၪ့အၡါမၪအ့ၬႉ အီၪက့ၪၥၭစၧၩ့ထၬဂီၩ့ မၩကၪထဲၩ့လဂ့ၩႉ ဖျါခွံၬလါဆံၭႉ ၦလဂၩအ့ၪမွဲလ့ၩထၪ့လ့ၩထီၫစွါဘဲၫ ထီးၥၭခ့ၬဘၪလဂ့ၩႉ ၥၭဎွံၪ အ့ၪ အဝ့ၫအဂးလါဆံၭႉ
လၧပအီၪယီၩ ပန့ထၬဘၪ ပဂံၪ့ပဎၪ့ႇ ဆၧအၪ့ဆၧအီၩႇ ဆၧကီၩ့ဆၧၥိၭလဖၪနီၪ လၧဆၧ ယၪ့ၥၭဖၧၩ့ ပကဘၪအၪ့နၩ့ထဲၩ့ ၦၡၪ့ၦယၬဖိၪၥံၪနီၪလီၫႉ ဂဲၫဘၪဘုၭ ယဆၧလဂ့ၩႇ ဂဲၫအီၪဒုၩၥၭ လၧယလၬဒုၩဖၫ့လၬလဂ့ၩ ဘဲၫယီၩၥိၭ ဘုၭအ့ၪဘုၭဆံၪလဂ့ၩႉ ဆၧလဖၪယီၩ အ့ၪမွဲပကလီၩ့ဖိၬ ထွ့ၫစွါဘဲၫ ပၥုၪ့ပၥၭလဖၪမွဲကဂဲၫဎွံၪထၪ့န့လၧအဂုအိၩနီၪလီၫႉ
အိပ်ချ် ဂျက်ကဆင်ဘရောင်း ၦကွ့ၩလံၬဆရၫနီၪ စံၭထၬဝ့ၫ ဆၧမၩနၧၩ့ခၫ့ဖျီၫ့နီၪ မွဲလၧ ပမိမၩလဖၪ ပန့ဘၪနီၪလီၫႉ ဆၧၥုၪ့မုၬၥၭၡူၪနီၪဘိၭ မွဲလၧ ပန့ထၬဘၪလဖၪႇ လၧပအီၪယီၩ အီၪထၬဝဲၩလဖၪအဖၫ့ခိၪ ပအဲၪကွံၩဝ့ၫဒၪနီၪလီၫႉ
အ့ၪမွဲပမိၥၭမုၬၥၭၡူၪနီၪ ပအီၪယီၩအီၪဝ့ၫဒၪ ဆၧကီၩ့ဆၧၥိၭလဖၪနီၪ အနံၪ့ခၩခၩ အနံၪ့ ဘၪဘၪ ပကဘၪဘၪၥၭနီၪလီၫႉ ပဂံၪ့နီၪဆ့ မွဲပကဘၪအဲၪဒိၭနီၪလီၫႉ ပအီၪဝ့ၫဒၪအလး အကျဲၩ့နီၪ ပကဘၪအဲၪကွံၩဝ့ၫလီၫႉ ပဖိၪပလံၩလဖၪနီၪ ပမိပဖါလဖၪနီၪ မွဲပကဘၪ အဲၪကွံၩဝ့ၫ လီၫႉ ပကဘၪဖ့ၪလၩဖ့ၪဖၩ့ပဆၨၩနီၪလီၫႉ
လၧပန့ထၬဘၪဆၧလဖၪအဖၫ့ခိၪ ပကဘၪအီၪက့ၪထၬဆၧအဲၪဆၧကွံၩနီၪလီၫႉ ပက ဘၪစံၭခိးစံၭတၩဝ့ၫကိၭနံၩနီၪလီၫႉ အ့ၪမွဲပကမၩဘဲၫယီၩၥိၭစွါဘဲၫ ပၥုၪ့ပၥၭနီၪ ကမုၬကၡူၪထၪ့ ကဆံၭကဆံၭနီၪလီၫႉ ဆၧနီၪအကၠီၩ့ ပဆၧမုၬဆၧၡူၪနီၪအီၪဒၪလၧ ပစူၪဖၧၩ့နီၪလီၫႉ
ဘဝဆိုတာကိုယ်ဖန်တီးတဲ့အရာမှ ကောက်နုတ်ချက်
(လူငယ်ဆိုတာလန်းရမယ်)
ချစ်နိုင်(စိတ်ပညာ)