ထၧၫ့ဖုဝဲထံၩၥိၭဖျိၩ့ဖိၪၥံၪဧ့ႇ ၡၩခံးဂးအဆၧၥၭမၧၫ့ လ့ၩထၪ့လ့ၩထီၫ့အၥိၭ ဆၧၥိၩ့ထၪ့ စီၩ့ဒိၪၥံၪ့ဎွံၪလဖၪနးဆ့ ဂဲၫအၪထၪ့နီၪလီၫႉ ဆၧထူၭထၪ့ စီၩ့ဒိၪၥံၪ့ဎွံၪ မွဲဂဲၫအၪထၪ့နီၪလီၫႉ လၧဆၧလီၩ့ဎွါအၪ့ဎၬအဖၧၩ့ ဒၪဝ့ၫဒၪ ဆၧထူၭထၪ့ စီၩ့ဒိၪၥံၪ့ဎွံၪအမံၩ့အၥၫ့ ၁၀၀၀ ဘျဲၪ ကိၭနံၪ့ဒ့ၭနီၪလီၫႉ လၧထံၫခးၥံၪလဖၪ ထူၭထၪ့ စီၩ့ဒိၪဆၧပိၭဆၧလၫ့ထီးအလူၬ ကအီၪ ၁၃ခွး ဘျဲၪယူၭနီၪလီၫႉ

            စီၩ့ဒိၪၥံၪ့ဎွံၪလဖၪယီၩ ထူၭထၪ့ဝ့ၫ ၥိၩ့ထၪ့ဝ့ၫအထီ နဲၩ့ဎီၩ့ ထံၫအထုၪ့ လံၩအထုၪ့ ထီၩ့လၩ့လၧ ဖံၭအထုၪ့ဖၧၩ့အိၩဂီၩ့ ဘၪၥၭလိၪၥၭလံၭထၪ့ နဲၩ့ဎီၩ့နီၪလီၫႉ ၦၡၩဒဲ ဆၧဖိၪဆၧဎါၥံၪထီးလူၬအဂး ဂဲၫကဲၪထၪ့ ဆၧလၩ့အၪ့ယိၫနီၪလီၫႉ

            လၧဂၪ့ခိၪယီၩ ၦခမျၧးၥံၪၥိၩ့ထၪ့ ဆၧၥုၪ့ဆၧဖျါၥံၪအဂး ဆၧမၩၥံၫၥံၭၥံၪ့ဎွံၪ ကနံၪ့နီၪ ၃ခွးနီၪလီၫႉ လၧဆၧလ့ၩထၪ့လ့ၩထီၫ့အဖၧၩ့ စဲၭဒူၭ ဆၧမၩဒူၭၥံၪလဖၪ နးဆ့ မွဲဂဲၫအၪထၪ့တၭ ဘဲၫစဲၭဒူၭလဖၪ ဂဲၫအၪထၪ့အၥိၭ စဲၭဒူၭလဖၪ ထူၭထၪ့ စီၩ့ဒိၪဆၧဘံၪၥိၭလဖၪ ထီၩ့လၧနဲၩ့ဎီၩ့တၭ ထံၫအထုၪ့ လံၩအထုၪ့ ဖံၬအထုၪ့လဖၪ ၥလိၪၥလိၬထၪ့လကၭဘၪ ကဲၪထၪ့ အစုၪ့ ဘၪခဲၫ့ကံၭထၪ့ ၦၡၩဒဲဆၧဖိၪဆၧဎါလဖၪ ၥၭဆၧလၩ့အၪ့ယိၫနီၪလီၫႉ

စီၩ့ဒိၪဆၧပိၭဆၧလၫ့လဖၪၥံၪယီၩ ထဲၩ့ယွၩလၩ့လၧ ထံၫကၠီၪ့ႇ ထံၫချိၬ ကဆၫ့ ထီၩ့လၩ့လၧ ပၪ့လဲၪမၫဆမံၭဖၧၩ့တၭ ယၪ ၥဒၪ့ၥံၪ ဆၧဖိၪဆၧဎါၥံၪလၧအအီၪထံၫကျၩလဖၪ ဘၪၥံၫခွံၬဝ့ၫနီၪလီၫႉ လကၭဒံၭဘၪ စီၩ့ဒိၪဆၧပိၭဆၧလၫ့ယီၩအကၠီၩ့ ဘၪထံၭဆၫ ၦၡၩအထီၫ့ဖျါလၧၥ့ၪယၫဆၧႇ မၩဂဲၩအစူၪအခၪ့န့လၧၩ့အ့ၬႇ ဒၪဆၧကျၩလၧၩ့အ့ၬႇ မိၥၭဘီၩ့လၧအီၪအဒံၪအဒၧၩ့လဖၪ ဘၪထံၭဆၫဖိၪၥၪႇ ဘၪထံၭဆၫ အၥုၪ့ဒဲအပိၭၥိၭႇ ဖိၪၥၪလဖၪအခိၪနူၬဂ့ၩလအ့ၬ ကဲၪထၪ့ၥ့ၪနီၪလီၫႉ ဂၪ့ခိၪၡၩအဆၧဝံဆၧနၭဖိၬဘိၭ ၂၅ခွးနီၪ ဘၪထိး ဆၧမၩၥံၫၥံၭၥံၪ့ဎွံၪအစုၪ့ ဆၧလၩ့အၪ့ယိၫနီၪလီၫႉ