ထၧၫ့ဖုဝဲထံၩၥိၭ ၦလၧအဲၪဒိၭခိၭနၪၦဖျိၩ့ၡါဖိၪၥံၪဧ့ အီၪဆီၪ့အီၪချဲၪ့ ကိၭဂၩဒ့ၭလါဆံၭနဲၪႉ မုကနွ့ၫယီၩ ၦဖျိၩ့ၡါဖိၪအနိၪ့ ယမိဆုးအဲၪဒိၭလီၩအ့ၪဘၪနၥံၪ နးမံၩ့ဖီၫဝီၩၡါဖိၪနီၪ ထီၩ့လၧ နးမံၩ့ဖီၫဝီၩအမိမိအဎွံၪၥံၪနီၪ ကဲၪထၪ့ထဲၩ့ ဖီၫစ့ၩကထံၭဒဲ ဖီၫထီၫ့ကထံၭတၭ စဎွၩအၪ့မၧၫ့အထံၫဖိၪခးဆါၥံၪထ့ၬ လကၭဒံၭဘၪ ခွံၬလၩ့ထၬအလူလၧ ၦလၧထ့ၬန့နီၪ ကရွံအၪ့ထုၪ့ဝ့ၫဒၪလၧ အဒဲၪအမၬၥံၪနီၪလီၫႉ

နးမံၩ့ဖီၫဝီၩ အမိယါနးၥၭကဲၪ့လဂၩ နါဂၧၫ့ဆၧပရၧၫ့ယီၩအခၫ အၪ့မၧၫ့အဖိၪမုၪနံၫဂၩနီၪ လ့ၩထ့ၬလါနၫ့ မွဲထ့ၬဝ့ၫလန့ ဘၪလီၫႉထံၫဖိၪခးဆါၥံၪ ဂဲၫကျ့ၭစၨၭထ့ၬကၠၭလါနၫ့ မွဲၦၡၩထ့ၬလန့ဘၪ နးဂၩနီၪလီၫႉ ထီးနီၪ စဎွၩနီၪ စံၭဆၧ လၧယပၧၩ့ထံၫခးဖၧၩ့ယီၩ ၦၡၩအီၪထးကဂၩဂၩဒံၭဧၪ အၪ့စၪ့ဆၧဘဲၫယီၩၥိၭအခၫ လၧၦခမျၧးဖၧၩ့နီၪ ၦၡၩလဂၩ စံၭဆၧၫ့လီၩအ့ၪစဎွၩဒိၪ စဎွၩဒိၪဧ့ ၦမုၪနၩ့ဖိၪအီၪဒံၭကဂၩဒံၭ အဝ့ၫ အဖံၭအခီၫ့အဂ့ၩလအီၪဘၪအကၠီၩ့ ဂဲၫထ့ၬဝ့ၫဘၧၫ့အ့ၬနီၪလီၫႉ လၧခဲၫ့ စဎွၩဒိၪအၪ့မၧၫ့ၦၡၩလ့ၩၥိၪ့အ့ၪ နးမံၩ့ဖီၫဝီၩ ဆၧကီၩ့ဆၧၥိၭအၥၫ့ဂီၩ့  အၪ့မၧၫ့ဝ့ၫၥိၭကီၩ့ထၪ့နီၪလီၫႉ လၧခဲၫ့ စဎွၩဒိၪ မၪလူၬစိၩ လၧကဘၪဂဲၫဒၪအဝ့ၫနီၪလီၫႉ

လၧခဲၫ့ နးမံၩ့ဖီၫဝီၩလဂၩ လ့ၩထီၩ့လၧစဎွၩဒိၪအီၪကထံၪဎး စၭထၪ့ထ့ၬ ဖီၫထံၭၥံၪယီၩနီၪလီၫႉ အဝ့ၫလစၭထၪ့ထ့ၬဒံၭဘၪဝ့ၫအထီ စံၭအမိမိ မိဧ့ ဖိၪမုၪကထ့ၬ ဖီၫထံၭလီၫအီ လီၩဝ့ၫဘဲၫယီၩၥိၭဂီၩ့ ထ့ၬဂုဖီၫထီၫ့နီၪလီၫႉ လၧခဲၫ့ အီၪထးဖီၫစ့ၩကထံၭနီၪ လီၩအ့ၪအမိဘဲၫအဂုခိၪအိၩဂီၩ့ ထ့ၬထၪ့ဝ့ၫန့ယီၫယီၫဖိၪနီၪလီၫႉ စဎွၩဒိၪ ဒၪနးမံၩ့ဖီၫဝီၩနီၪ ဘၪအၥၭ အၥၭဎွံၫ ထဲၩ့ကိၭန့ဝ့ၫလၧ နီးဖၧၩ့ဂီၩ့ ဒုၭအီၪဎုၬဝ့ၫလၧ အဖိၪခွၫ နီၪလီၫႉ

နးမံၩ့ဖီၫဝီၩ အဖိၪအီၪကဂၩဂီၩ့ အမိယါအၪ့လီၫစိၩအဝ့ၫ နဖါၥံၫယူၭ ဂဲၫထဲၩ့အဖျဲၪနီၪလီၫႉ နးမံၩ့ဖီၫဝီၩလဂၩ စီၪဝ့ၫအဖါဖါၥံၫအၡါမၪတၭ အီၪက့ၪထးအဖိၪလၧ အဝၩၥၭဘီၩ့အီၪဂီၩ့ လီၩထးအဝၩၥၭဘီၩ့ ကထဲၩ့လၧအဖါအီၪဒံၭနီၪလီၫႉ အမိယါၦမုၪမဲၫနီၪ နးမံၩ့ဖီၫဝီၩလဂဲၫထဲၩ့ထီၩ့ဒံၭဘၪဂံၪ့အထီ အၪ့မၧၫ့အဝၩအီၪက့ၪၥူၪအၥၭဂီၩ့ ၥၭကျုၩဖုၪနီၪ မၩဘံၭထၬဝ့ၫလၧၡၪ့ ဘဲၫၦၡၩအၥံၫစွၪအၥိၭနီၪလီၫႉ အဝ့ၫထဲၩ့ထီၩ့လၧအဂံၪ့အခၫ လၧဆၧၥုၪ့လမုၬၥၭမုၬဘၪအဖၧၩ့ ကမိဝဲလၫ့ယိအမ့ၬလါနၫ့ ဒုၭဝဲလၫ့ဝ့ၫအ့ၬႉ လၧခဲၫ့အမိယါနီၪစံၭ ပကဒုၭအၪ့လုနဖါထံၫ ကွဲၪလၩ့ထၬ နနါဒံၭႇ ဖျုၩ ဒဲ စူၪၥံၭၥံၪနီၪ ဂီၩ့ အၪ့လူထၪ့နၥၭ လၧခဲၫ့ နးမံၩ့ဖီၫဝီၩအထီၫ့ၥံၪနီၪ အမိယါ ခွံၬလၩ့ဂူၪလၧ ဂံၪ့ဖၫ့လၬတၭ အၪ့မၧၫ့အဝ့ၫလ့ၩအၪ့ထုၪ့တၭ အဝ့ၫလၥ့ၪယၫဘၪအမိယါအဆၧကိၪ့ဆၧတဲၩ့ဒဲ  အဆၧၥုၪ့ဂ့ၩၥၭဘွၩအီၪဝ့ၫ နးမံၩ့ဖီၫဝီၩယီၩ လ့ၩစဲၪ့လၩ့အၪ့ထုၪ့ထဲၩ့အဆၧလဖၪကထံၪဎး အမိယါ လူၫလၩ့စိၩဝ့ၫလၧ ထံၫချၪ့အခိတၭ မွဲအဝ့ၫထိးလန့လၧၩ့ဘၪဒဲ အၥၭဘၪၥံၫခွံၬဝ့ၫဒၪနီၪလီၫႉ လၧခဲၫ့ နးမံၩ့ဖီၫဝီၩၥံၫဂီၩ့ အမိယါနီၪ အၪ့မၧၫ့အဖိၪမုၪကဂၩ ၥိၭကီၩ့ထၪ့ဘဲၫ နးမံၩ့ဖီၫဝီၩဒဲ နးမံၩ့ဖီၫဝီၩအလး အၪ့မၧၫ့ဝ့ၫလ့ၩဖိၬ စဎွၩအဖျဲၥံၪအခဲၫ့လၧ နီးဖၧၩ့နီၪလီၫႉ စဎွၩအဖျဲၥံၪနးဆ့ စီၪဝ့ၫမွဲဒၪအကဆါမုၪ နးမံၩ့ဖီၫဝီၩတၭ အၪ့မၧၫ့ဝ့ၫထၪ့လၧ ကဆၫ့အလီၩ့အခၫ ကဆၫ့ဖၭဒိၪနီၪ ၥ့ၪယၫဝ့ၫလၧလမွဲဘၪအကဆါမုၪတၭ စဲၪ့ထၪ့ဝ့ၫဒၪလၧ အယဲၩ့လီၫႉ ၦလၧအဘၪဖီၪ့ကဆၫ့နီၪ ကဆၫ့မဘၪမနီၫလဲၪ လၥ့ၪယၫဘၪဝ့ၫဒဲ ဘၪလီၩမၩနဲၩထၪ့ဝ့ၫလီၫႉ လၧခဲၫ့ထုၬ ကဆၫ့နီၪ လမွဲဘၪအကဆါမုၪနးဆ့ ထဲၩ့န့ဝ့ၫလၧ နီးဖၧၩ့နီၪလီၫႉ

ထၧၫ့ဖုဝဲမုၪခွၫၥံၪဧ့ မုကနွ့ၫယီၩ ပၡါဖိၪယီၩ ပကအီၪပထုၬထၬအလးထယီၩဂီၩ့ နးမံၩ့ဖီၫဝီၩအမိယါ ၦမုၪမဲၫအဖိၪမုၪလဂၩ လ့ၩလၧနီးဖၧၩ့ ကျဲၩ့မၩထၬအၥၭဘဲၫနးမံၩ့ဖီၫဝီၩအခၫ ၦၡါဖိၪယီၩကဆုးကဲၪထၪ့ ဘဲၫၥ့ၪလဲၪနီၪ လၧခဲၫ့မုနွ့ၫမၬ ပကဒၪဎီၩ့ထဲၩ့လိၬၥၭလၧ ၦဖျိၩ့ၡါဖိၪအနိၪ့ဖၧၩ့ယီၩနဲၪႉ