ကနံၪ့ယီၩဆၧယီၩခၫအထီ အီၪလၧမက္ကဆီကို ထံၪခးဖၧၩ့ ဖိၪၥၪလၧအဂံၪ့အဎၪ့လအီၪဘၪ၂၂ဂၩနီၪ အီၪဒုၩ ၥၭလၧကၭၥလံၬဆၧဘိၪ့ဆၧဘၩဖၧၩ့ န့ထၪ့ဝ့ၫဒၪနီၪလီၫႉ

လကၭဘၪ ၦမူၩဒၩအီၪလဖၪနီၪ လီၩ့ဆုးကျိၭအ့ၪ ဖိၪၥၪၥံၪအမိဖါဘူၭထံးလဖၪဂီၩ့ လၧဂွာတာလုပေဘာ စီးလီကာၥရိၬဖၧၩ့ ဖ့ၪလၫ့အ့ၪ ဖိၪၥၪၥံၪလဖၪ ဆၧၥူၫဝၭဆံၫ့ဎံၪနီၪလီၫႉ ဖိၪၥၪအမိဖါလဖၪနီၪဆ့ အဂံၪ့အဎၪ့ လအီၪ ဘၪဂီၩ့ လီၩ့မံၫဒၪလၧဖၧၩ့ၥၭမုအဖၫ့ခိၪနီၪလီၫႉ

အဝ့ၫၥံၪယီၩ ဘၪအီၪအၪ့လ့ၩထဲၩ့လၧ ဖၧၩ့ၥၭဖၫ့ခိၪအဂဲး ‘Hope of the Poor’ (ချို့တဲ့နွမ်းပါးသူတို့၏ မျှော် လင့်ချက်) ခရၧၫ့ဖိၪၥံၪ ဒၪဝ့ၫဒၪအကၠီၩ့ မၩဆၧၩ့ထၪ့ဝ့ၫန့ ဘဲၫယီၩအၥိၭနီၪလီၫႉ လါနၫ့ ခရၧၫ့အယီၩဆ့ ကျိၪစ့ၩအ လၧၫ့အဎွ့ၩလအီၪဘၪအကၠီၩ့ ဘၪထဲၩ့မၩဆၧၩ့ထၪ့ဝ့ၫ ၡီၡီဖိၪ ဒဲ ကဆၫ့ဘၪကဆၫ့ ထၧၩ့အီၪကၠၭဘၪဝ့ၫလၧ အဂံၪ့ အဎၪ့ဒၪဝ့ၫနီၪလီၫႉ

လၧဆံၫ့ဆံၫ့ဖျ့ၪဖျ့ၪဖၧၩ့ လၧဆၧဒူၩဆၧယၪ့ဖၧၩ့ အီၪဘၪလၧအဂံၪ့အဎၪ့ဒၪဝ့ၫနီၪ ၦကနၩ့နၩ့အဆၧၥၭမၧၫ့ ထၧၫ့ဖျီၩ့ယၫအဖၧၩ့ မွဲလၧအဆိၫထုၬကဘျၩ့နီၪလီၫႉ အဝ့ၫၥံၪအဆၧၥၭမၧၫ့ အၪ့လဲၩထၪ့အၥၭနီၪ အီၪထဲၩ့ဘၪလၧ အဂံၪ့အဎၪ့ဒၪဝ့ၫကမံၩ့လီၫ လကၭဘၪတၭ အဝ့ၫၥံၪယီၩ အီၪဂဲၫလၧကၭၥလံၬမိဖါၥံၪအအီၪ လါနၫ့ မွဲလၧအဆၧၥၭ မၧၫ့ အဆၧကၪဆၧဂဲၩလဖၪအကၠီၩ့ ဒိၭန့ဆၧၥူၫဝၭဆံၫ့ဎံၪလန့ဘၪနီၪလီၫႉ ဆၧနီၪအကၠီၩ့ အဝ့ၫၥံၪယီၩ ဘဲၫဆၧၥူၫဝၭ ဆံၫ့ဎံၪကန့အဂး ကိၭနွံၫဒ့ၭ ၥံၭၥီၫမုနံၩနီၪ မၩလိၪကၠၭ ယွၩလူယွၩထၫနီၪလီၫႉ လကၭဘၪ ၦလၧ လၩ့ဆ့ၭလၩ့ယွၩထၬ လၧၥံၪမၧၩ့ပၠိၭဖၧၩ့ႇ ဂၬထံၫဂၬနီၫ့ဖၧၩ့ ဒဲ gameဖၧၩ့လဖၪနီၪ ဘၪအီၪလၧ ၦဖ့ၬထ့ၬခွံၬဆၧလဖၪနီၪအလးဂီၩ့ ဘၪထိးဘၠၩ့ ကၠၭအၥၭနီၪလီၫႉ

ၦၡၪ့ၦယၬဖိၪၥံၪနီၪ မွဲလၧ‘Hope of the Poor’ ဖိၪၥံၪအဂး လၬဆီၪ့လဖၪလီၫႉ မွဲလၧအဝ့ၫၥံၪအကၠီၩ့ မီၪ့ဎီၩ့ ပအီၪဘၪလၧ ယွၩဘူၭဘူၭထံးထံးနီၪလီၫႉ ၦၡၪ့ယၬဖိၪၥံၪယီၩ ကဒုၭအီၪပၧၩလၧ ယွၩဘူၭဘူၭထံးထံးဆ့နီၪ လၧယ ဆၧမၩဒၪမ့ၬအဖၧၩ့ ပဒၪထၪ့ဘၪလီၫ အဂဲး ၦအၥုၪ့ထၪ့ထၬ ‘Hope of the Poor’ ခရၧၫ့ ခိၪနါနံၫဂၩလဂၩနီၪ လီၩဝ့ၫ ဘဲၫနီၪလီၫႉ

 ဆၧဒိၭန့ဆၧၥူၫဝၭဆံၫ့ဎံၪယီၩ လအီၪပထုၬခွံၬဘၪအၥၭလၧ ဖိၪၥၪ၂၂ဂၩယီၩတၭ လၩနးဘံၪ့ဒီၭဆ့ ၦဂံၪ့ဎၪ့ လအီၪဘၪ ဖိၪၥၪ၁၅ဂၩနီၪ ကဒိၭန့ဆၧၥူၫဝၭဆံၫ့ဎံၪဒံၭအဂဲး ‘Hope of the Poor’ ခရၧၫ့ဖိၪၥံၪ စံၭဝ့ၫဒၪဘဲၫနီၪအ ၥိၭလီၫႉ

နးအဲၪဖီၫဘွၩ