လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪမွဲဝ့ၫဒၪ ပကဘၪ ဘၩဆိၪဖၪန့ ၦၥၭၡါၥံၪအဂး လိၪဝ့ၫဒၪအဂဲး အကၠီၩ့နီၪလီၫႉ ဂံၪ့ဒီၪ့ကိၭဂံၪ့ဖၧၩ့နီၪ ၦၥၭၡါၥံၪ အီၪအၪမၬဒ့ၭနီၪလီၫႉ ၦၥၭၡါၥံၪအီၪ အကၠီၩ့နီၪ ဆိၩအၥၫ့ ကဲၪထၪ့န့နီၪလီၫႉ ပကမၩဆၧၩ့ ၦၥၭၡါၥံၪအဂး ဆၧထံၫလၩ့ဒီၪလၩ့ အီၪအၪမၬဒ့ၭနီၪလီၫႉ လါနၫ့ႇ ဆၧကိၪ့တဲၩ့ဒိၪနီၪ အီၪၡၩခိၬဒ့ၭနီၪလီၫႉ ပကဘၪယိဆၧၩ့ ၦၥၭၡါၥံၪ လၧဆၧအဲၪဆၧကွံၩဒဲ ၥုၪ့ဆၧၩ့ ၥၭဆၧၩ့လိၪဝ့ၫဒၪ အၪမၬဒ့ၭနီၪလီၫႉ လၩ့ဆၫ့ဒၪဆၧ ပကဘၪ ယိဆၧၩ့ ၦၥၭၡါၥံၪလၧ ဖူၬလူၭကူၭ နီၪလီၫႉ
အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ပကယိလၧ ပထီအခံၫ့ယီၩစွါဘဲၫ အဝ့ၫၥံၪ မိၡါအဂးမွဲဂ့ၩႇ အနးၥၭအဂးဒဲ အၥၭခံဖၧၩ့ဆၧမုၬဆၧလၩ့ ကအီၪအဂး လိၪဝ့ၫဒၪ အရ့ၩဎိၩထုၬနီၪလီၫႉ ဆၧလၧ ၦၥၭၡါၥံၪနီၪ ၥၭဘၪ့ၥံၪအဂးမွဲဝ့ၫဒၪ အဂဲးအဘၭနီၪလီၫႉ ဘၪမနီၪလဲၪစွါဘဲၫႇ ဆၧလၧ ၦၥၭၡါၥံၪနီၪ ဂဲၫထဲၩ့ကဲၪ ၦၡၩလၧ ဂၪ့ခိၪဖၧၩ့နံၪ့ဆံၫ့လၩယံၬနီၪ အကၠီၩ့ အဆၧၥ့ၪယၫနၪၥ့ၪအီၪ အၪမၬဒ့ၭနီၪလီၫႉ ပကိၭအဝ့ၫၥံၪန့လၧ ပဒူၩဖိၪၥံၪနီၪလီၫႉ
အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ၦၥၭၡါၥံၪအဂး ပကဘၪ ဘၩဆိၪဖၪန့နီၪလီၫႉ လကၭဒ့ၭဘၪႇ ၥၭဘၪ့ဖိၪၥံၪအီၪအၪ့ လ့ၪထဲၩ့ ဆၧကိၭမံၩ့နီၪ ကဘၪမၩန့ဆၧမၩလိၪလၧ ၦၥၭၡါၥံၪအီၪ လိၪဝ့ၫဒၪအကၠီၩ့ ၥၫ့ဎွၩဖရၫ့စ့ၭ အဆၧၥီၫ့ဆၧၥၫ့အီၪ ဝ့ၫဒၪ ဘဲၫယီၩၥိၭအဂဲး ယရၩလၩ့န့အ့ၪဘၪနၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭ ထီးအလူၬ မွဲနၥံၪလၧၫဎွ့ၩဝ့ၫဒၪလၧ ကဆါဎြံၬအဆၧအဲၪဆၧကွံၩ လါဆံၭႉ