ၦဆံၫ့ဎံၪ Maximilian Kolbe အဂဲး
လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မံၩ့ဎိၩၥၪဖျီၪ မုခွၫလၧအအီၪအနိၪ့ အဆၧရၩလၩ့ဖၧၩ့ မုကနံၩယီၩ ယအဲၪဒိၭ ရၩလၩ့န့အ့ၪဘၪနၥံၪနီၪ မွဲဝ့ၫဒၪ ၦဆံၫ့ဎံၪ Maximilian Kolbe အဂဲးအကၠီၩ့နီၪလီၫႉ ၦဆံၫ့ဎံၪ Maximilian Kolbe ယီၩ အီၪဖျဲၪလၧ နံၪ့ (၁၈၉၄) နံၪ့ လၧ ခး Poland နီၪလီၫႉ အဝ့ၫကဒိၭနဲၩ နးမၫရံၫယၩ ကၥ့ၪအဂး အမိမိဖါဖါ ၥီၪအ့ၪအဝ့ၫ ကိၭနံၩနီၪလီၫႉ နံၪ့ (၁၉၀၆) နံၪ့ နီၪ နးမၫရံၫယၩ နဲၪဖျီၪ ဒၪဆၧလၧယၫ ဂီၩ့ ဖ့ၪအ့ၪအဝ့ၫ ၥရဖူၩ အဘွၩဒဲအဝီၩ နံၫမံၩ့နီၪလီၫႉ ဆၧအၪ့မၧၫ့ရွံ ကမံၩ့နီၪလီၫႉ လါနၫ့ အဝ့ၫရွံ နံၫမံၩ့နီၪလီၫႉ အဘွၩနီၪ မွဲဝ့ၫဒၪ အဝ့ၫအဆၧဆံၫ့ဖျ့ၪ ၥၭမၧၫ့ဂီၩ့ အဝီၩနီၪ မွဲဝ့ၫဒၪ ဆၧဆူနဲၩ ဆၧအဲၪဆၧကွံၩအဂး က ဘၪထိးၥံၫၥၭနီၪလီၫႉ အၥၭအီၪ (၂၀) နီၪ လ့ၩနုၬလၩ့လၧ Franciscam ခရၧၫ့ဖၧၩ့ဂီၩ့ နံၪ့ (၁၉၁၈) နံၪ့နီၪ ကဲၪထၪ့ၥၫ့ခၫနီၪလီၫႉ ကဲၪၥၫ့ခၫဂီၩ့ ဘၪလ့ၩမၩ ၥၫထနၫဆၧမၩလၧ ခး Poland နီၪလီၫႉ
လၧအလးနီၪ ဎရံၬဖိၪၥံၪ ဆၧဆူၩနဲၩဒဲ ကၥ့ၪယၫကဆါဎြံၬ ဆၧပရၧၫ့အဂး ဘၪထုၬလၫ့ မဲၭကစ့ၩ့ ဒဲ ၥတံၩ့စၪ နီၪလီၫႉ နံၪ့ (၁၉၁၈) နံၪ့နီၪ အလးဘၪထဲၩ့လၧ ခး Japan နီၪလီၫႉ နံၪ့ (၁၉၃၉) နံၪ့ ဆၧဒူၭထၪ့ နံၫဘျၩ့အခံၫ့နီၪ အဝ့ၫလ့ၩမၩဆၧၩ့ ၦလၧဘၪထိး မၩၥံၫမၩဆၫၥၭၥံၪတၭ ၦၡၩဖီၫ့အဝ့ၫနီၪလီၫႉ လကၭဒ့ၭဘၪႇ ၦၡၩၥိၪအဝ့ၫလၧ ၦဘၪထိးမၩၥံၫၥၭအလးနီၪလီၫႉ အဝ့ၫအနဲၩထံၭ ၦၡၩကဂၩနီၪ ကဘၪထိးၥံၫၥၭ အခံၫ့ထီၩ့တၭ ကဘၪထဲၩ့လၩ့ဎွါဘုၪလၩ့အဖိၪအမၫနီၪအကၠီၩ့ အၪ့က့ၩအၪ့ယၫ ထီၫ့ခိၪဒိၪနီၪလီၫႉ ၦဆံၫ့ဎံၪယီၩ နါဂၧၫဘၪ ဆၧချဲၩ့နီၪတၭ ယၧၩဝ့ၫယဖိၪယမၫအီၪအ့ၬ အနၫ့ဆါအလးနီၪ ယကထိးမၩၥံၫယၥၭနီၪအကၠီၩ့ လ့ၩလီၩ ထီၫ့ခိၪဒိၪဂီၩ့ ထိးၥံၫၥၭနီၪလီၫႉ
အဝ့ၫၥံၫဖီၩ့ခွံၬဂီၩ့နီၪ ၦၡၩနါဂၧၫဆၧဘၩဆိၪဖၪအလူၬဒဲ ဆၧၥၭအွံၪအလူၬနီၪလီၫႉ နံၪ့ (၁၉၈၂) နံၪ့နီၪ ၥၫ့ဎွၩ John Paul နံၫ ရွံထၪ့အဝ့ၫ ၦဆံၫ့ဎံၪနီၪလီၫႉ လကၭဒ့ၭဘၪႇ ၦၡၩလၧအဝ့ၫပဒၩ့ထၬကဂၩနီၪ ဂဲၫဂီၩ့ လီၩလၩ့ ၦဆံၫ့ဎံၪပဒၩ့ထၬအဝ့ၫအၥၭ ဘဲၫၥ့ၪလဲၪ အဂဲးအကၠီၩ့နီၪလီၫႉ ၦဆံၫ့ဎံၪယီၩ ဆၧအဲၪဆၧကွံၩဎိၩဒိၪလၧ ၦဂူၫဂၩအဖၫ့ခိၪ ထိးၥံၫၥၭဘၧၫ့ မွဲဝ့ၫဒၪ ၦဆံၫ့ဎံၪနီၪအကၠီၩ့ ယရၩလၩ့န့အ့ၪဘၪနၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ အဲၪကွံၩဘၪ ထၧၫ့ဖုဝဲထံၩၥိၭ ထီးအလူၬႇ မွဲနၥံၪလၧၫ့ဎွ့ၩဝ့ၫၪလၧ ကဆါယွၩ အဆၧအဲၪဆၧကွံၩလါဆံၭႉ
