နံၪ့၂၀၂၄နံၪ့ လၩအီၭတိၫဘၧၫ ၁၉ၥၫ့ လဂီၩ၈နၩရံၫအခံၫ့နီၪ ဆၧဒိၭန့ထၪ့ Deacon အဆၧ ကဲၪ မံဆၩဆၧလုထၪ့အီၪဝ့ၫဒၪလၧ ဒိၩ့ပၥံၫ့ စံၫ့ပံတၧၫကၥံၫဒြဲၫ ၥရိၬလးဝၩ့ဖၧၩ့နီၪလီၫႉ ၦလၧအဒိၭ န့ထၪ့ Deacon အဆၧကဲၪလဖၪနီၪ Bro.Bartholomeus ချန်းလုံထွန်း (မေရီလန်းဆၧအီၪ ကီၪ့), Bro. Raymond စစံကျော်သူ(ချမ်းသာကုန်ဆၧအီၪကီၪ့), Bro.Sylvester စောဧဒင်ဦး (ဇောင်းတန်းဆၧအီၪကီၪ့) ဒဲ Bro.Christopher စနန်းဝင်း (ကနစိုးကုန်းဆၧအီၪကီၪ့) လဖၪ နီၪလီၫႉ ၦလၧအဖ့ၪလၫ့အဝ့ၫၥံၪ Deaconဆၧလၩဆၧဖၩ့နီၪဘိၭ မွဲဝ့ၫဒၪ ဒိၩ့ပၥံၫ့ၥၫ့ခိၪဒိၪ Bp.Henry Eikhlein နီၪလီၫႉ

ၦလၧကဒိၭန့ထၪ့Deaconအဆၧကဲၪ၄ဂၩယီၩ ကဘၪအုၩ့လၩ့အီၪလၩ့အၥၭအီၪ၂နံၫမံၩ့အ ဂဲးႇ အဆိၪထုၬကမံၩ့နီၪ အဝ့ၫၥံၪယီၩအၥၭထၧၫ့ဖျီၩ့ယၫလထၪ့ၡါဘၪဒဲ ကထဲၩ့အီၪဘဲၫၦဖျဲၥံၫ့ဆ့ၬ အၥိၭဂီၩ့ နံၫမံၩ့ကမံၩ့နီၪဘိၭ အဝ့ၫၥံၪယီၩကခိၭနၪအၥၫ့ခိၪဒိၪအဆၧၥီၪ့ဆၧၥၫ့လဖၪအဂဲး ကဘၪအုၩ့ လၩ့ကၠၭအၥၭနီၪလီၫႉ လကၭဘၪအဝ့ၫၥံၪကဲၪထၪ့Deaconယူၭစွါဘဲၫ ကဘၪမၩဆၧၩ့ ၥၫ့မုၥၫ့ခၫ လဖၪအဂဲး Fr.George အယ်ဒို လီၩလၩ့လါလၩ့ဝ့ၫဒၪလီၫႉ

လၧမံဆၩဆၧလုထၪ့ဖၧၩ့ ၥၫ့ခိၪဒိၪယီၩ လီၩလၩ့လါလၩ့ဝ့ၫဒၪ “ပကဘၪကူၭဆၧအီၪအၪလ့ၬ လါနၫ့ ၦလၧကကူၭဆၧနီၪအီၪၡၩခိၭဖိၪလီၫႉ မုဆၫကနံၩယီၩ ၦလၧကမိနုၬလၩ့ကဲၪၥၫ့မုၥၫ့ခၫလဖၪ လၩ့ၡၩဝ့ၫအၪမၬယူၭႉ ဆၧနီၪအကၠီၩ့ ယကိၭဖံၭၥိၭဘၪၥၭဘၪ့ဖိၪၥံၪလီၫႉ လုထၪ့အ့ၪပၧၩအဖိၪခွၫ လဖၪယီၩအကၠီၩ့ ယစံၭခိးစံၭတၩဘၪ Deacon လံဂၩယီၩ အမိအဖါအဘူၭအထံးလဖၪနီၪလီၫႉ လၧဒိၩ့ပၥံၫ့ဆၧအီၪကီၪ့ဖၧၩ့ယီၩ လၩ့အဲၪဝ့ၫဒၪအထူၫအရူၫအီၪဝ့ၫဒၪကမံၩ့လီၫႉ အနီၪမွဲလၧ ဘဲၫဆၧ အၪ့မၧၫ့ဖိၪၥံၪကန့အဂးဆၧဘၩဆိၪဖၪနီၪ အၪ့ကံၩ့ဘၩဆိၪဖၪကၠၭဝ့ၫနီၪလီၫႉ ပကဘၪအၪ့ကံၩ့ဘၩ ဆိၪဖၪအ့ၪ ဆၧအၪ့မၧၫ့ဖိၪၥံၪအဂးနီၪလီၫႉ ဧယၫဝတံၫခးဒီၪ့ဖၧၩ့ ကၫတိၫလံၬဆၧအီၪကီၪ့အီၪနီၪ မွဲလၧပဆိၬၥၫထနၫနီၪလီၫႉ ကနံၩယီၩ ၦလၧအကဲၪထၪ့ Deacon လံဂၩယီၩဆ့ မွဲကဘၪဆုးထဲၩ့ ဆိၬထၪ့ ၥၫထနၫယီၩလီၫႉ ဆၧနီၪအကၠီၩ့ ပကဆုးထဲၩ့အၪ့ကံၩ့ဘၩဆိၪဖၪအ့ၪ Deacon လံဂၩယီၩ အဂးလါဆံၭ” အဂဲးၥၫ့ခိၪဒိၪ Bp.Henry Eikhleinယီၩ လီၩလၩ့လါလၩ့ဝ့ၫဘဲၫနီၪလီၫႉ

မွန်ဆီညော်အန်ဒရီးယားဖာရန်းတေဆ့ စံၭဝ့ၫဒၪ “လၧထံၫခးဘိၪ့လၫ့ဘဲၩလၫ့အဖၧၩ့ ၥၭဝံၩ့ဝၩ့ဘၪလဂ့ၩႉ ကဆါယွၩနီၪ နါဂၧၫ့ပဆၧအၪ့ကံၩ့လဖၪနီၪလီၫႉ ပမူၩဒၩအကၧၩ့ဒိၪကမံၩ့နီၪ မွဲလၧ ပကဘၪဂဲၫဆိၬန့ကဆါဎြံၬလၧဂၪ့ခိၪချိၫ့ဖၧၩ့ယီၩလီၫအဂဲး” အဝ့ၫယီၩစံၭဝ့ၫဒၪနီၪလီၫႉ

“မုနၩလၧအခံၭထုၬနီၪအီၪဝ့ၫလါနၫ့ မုနၩလၧ လဖၩ့လၫ့ထဲၩ့ဘၪ မွဲလအီၪဘၪလီၫႉ ကဂီၩယီၩ ပမၩလၩမၩဖၩ့ဘၪဆၧထံၪလၩ့ဒီၪလၩ့ယီၩ လၧဆၧမုၬဆၧၡူၪဖၧၩ့အကၠီၩ့ ယစံၭထၪ့အၪ့အူၭဘၪ ကဆါယွၩလီၫႉ မွဲလၧယွၩအခိးအတၩအကၠီၩ့ မုကနံၩယီၩကဲၪထၪ့လီၫႉ လၧယထၧၫ့ဖုဝဲခွၫ ၃ဂၩ ယီၩကၠၧၫ့ကၠၧၫ့ ယစံၭခိးစံၭတၩဘၪ ယစံၭထၪ့အၪအူၭဘၪ ကဆါယွၩနီၪလီၫႉ စၭထၪ့လၧ ပဖိၪၥၪဆံၭ အခံၫ့ ထီးမုဆၫကနံၩယီၩ လၧပမိပဖါအအီၪႇ လၧဆၧအီၪကီၪ့အအီၪႇ လၧဆၧအီၪကီၪ့ဖိၪၥံၪ အအီၪႇ လၧယွၩအဆၧအၪ့မၧၫ့ဖိၪၥံၪအအီၪႇ ပဂဲၫထဲၩ့ဒိၭန့ထၬဘၪ အခိးအတၩ အီၪအၪမၬလ့ၬ နီၪလီၫႉ ဆၧနီၪအကၠီၩ့ မုကနံၩယီၩ ကြၨၭပစံၭခိးစံၭတၩဝ့ၫဒၪ ၦလဖၪထီးလူၬနီၪ ယစံၭခိးစံၭတၩဘၪ ဒိၪဒိၪအၪအၪလီၫအဂဲး” Deacon Raymond စစံကျော်သူ စံၭဝ့ၫဒၪဘဲၫနီၪလီၫႉ

ၦလၧအဂဲၫထၪ့ မၩလၩမၩဖၩ့ဘိၪ့မုနံၩယီၩ ကအီၪဝ့ၫဒၪဖိၭဘိၭ အဂၩ၄၀၀ဂီၩ့ မံဆၩဆၧလု ထၪ့နီၪဂီၩ့ခွံၬဝ့ၫဒၪလၧ ၁၁နၩရံၫအခံၫ့အဂဲး ပန့ဘၪဆၧပရၧၫ့ ဘဲၫယီၩအၥိၭနီၪလီၫႉ

နးအဲၪဖီၫဘွၩ