လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မံၩ့ဎိၩၥၪဖျီၪ မုခွၫလၧအအီၪအနိၪ့ အဆၧရၩလၩ့ဖၧၩ့ မုကနံၩယီၩ ယအဲၪဒိၭ ရၩလၩ့န့အ့ၪဘၪနၥံၪနီၪ မွဲဝ့ၫဒၪ ၦဆံၫ့ဎံၪ Jane Francis De Chantal အဂဲးအကၠီၩ့နီၪလီၫႉ ၦဆံၫ့ဎံၪ Jane ယီၩ အီၪဖျဲၪလၧ နံၪ့ (၁၅ရ၂) နံၪ့ လၧ ခးပၠ့ၫၥ့ၭ နီၪလီၫႉ အဝ့ၫၥံၪ အဂံၪ့ဒီၪနီၪ အီၪလၧကၠဲၭလူကၠဲၭထၫ အၪမၬဒ့ၭ နီၪလီၫႉ အဝ့ၫအၥၭအီၪ (၂၁) နံၪ့နီၪ ထၪ့ၡါဂီၩ့ အဖိၪန့ထၪ့ (၆) ဂၩနီၪလီၫႉ အဝ့ၫယီၩ အီၪဘၪလၧ အဂံၪ့ဒီၪ့ မုၬမုၬလၩလၩ (၇) နံၪ့ ဂီၩ့ အၥၭအီၪ (၃၂) နံၪ့နီၪ အၦခွၫ ဘၪထိးမၩၥံၫၥၭနီၪလီၫႉ အၦခွၫၥံၫဂီၩ့ အဝ့ၫယီၩ ဘၪအီၪထးလၧ ဆၧၥုၪ့အုၭၥၭအုၭ ဆၧကၪဆၧဂဲၩ နီၪလီၫႉ
လယံၬလမီးဘၪ ၦဆံၫ့ဎံၪ Jane ယီၩ လ့ၩလၧ ၥၫ့ခၫအီၪဂီၩ့ မၩဂၧးထၪ့အၥၭနီၪလီၫႉ အခံၫ့ယံၬထၪ့ကကၠၪ အဝ့ၫ ကမိကဲၪ မံၭထၭမုၪနီၪအကၠီၩ့ လီၩဖျီၪထၪ့ဝ့ၫဒၪနီၪလီၫႉ လါနၫႇ အဝ့ၫကဆီၫ့မီၪ့လၩ့ၥၭ ထံၫထံၫဆါဆါကန့အဂး ၥၫ့ခၫဖ့ၪအ့ၪအဝ့ၫ အခံၫ့နီၪလီၫႉ ဘၪမနီၪလဲၪစွါဘဲၫႇ အဖိၪမုၪဖိၪခွၫ ကအီၪၥၭမၧၫ့အဂး အဝ့ၫအတၩလၫ့ အီၪဒ့ၭအကၠီၩ့နီၪလီၫႉ လၧခဲၫ့လၩ့မၬယံၬ (၃) နံၪ့နီၪ ၦလၧအၥၭၡါၥံၪႇ ၦလၧအီၪလဆီၫ့ဘၪၥံၪႇ ၦလၧအဒူၩလး လအီၪဘၪၥံၪအဂး ကၥုၪ့ထၪ့ အၪ့န့ဒီၩ့ နးမၫရံၫယၫ ခရၧၫ့နီၪအကၠီၩ့ ၥၫ့ခၫ လီၩၥ့ၪယၫအ့ၪ အဝ့ၫနီၪလီၫႉ ဆၧနီၪအကၠီၩ့ ၦဆံၫ့ဎံၪ Jane ယီၩ လ့ၩကဲၪထၪ့မံၭထၭမုၪလၧ ခရၧၫ့ဖၧၩ့နီၪလီၫႉ
ၦဆံၫ့ဎံၪ Jane ယီၩ ကဲၪထၪ့မံၭထၭမုၪဂီၩ့ ဘၪဒၪ ဆၧကၪဆၧဂဲၩ အၪမၬဒ့ၭနီၪလီၫႉ လါနၫ့ႇ ဆၧကၪဆၧဂဲၩဖၧၩ့ အဝ့ၫန့ထၪ့ဘၪ ဆၧကမံၩ့နီၪ ပအီၪၥၭမၧၫ့ဖၧၩ့ ဆၧကၪဆၧဂဲၩ အီၪအၪမၬဒ့ၭနီၪလီၫႉ လါနၫ့ဆၧအယီၩနီၪ ပကၥ့ၪယၫဘၪ ကဆါဎြံၬ အဆၧအဲၪဆၧကွံၩ အဂးဖ့ၪအ့ၪပၧၩ နီၪလီၫႉ အဝ့ၫအၥၭအီၪ (၆၉) နံၪ့နီၪ ၥံၫဖီၩ့ခွံၬဝ့ၫဒၪနီၪလီၫႉ နံၪ့ (၁၇၆၇) နံၪ့နီၪ ၥၫ့ဎွၩ ကလ့ၩမး (၁၃) ရွံထၪ့အဝ့ၫ ၦဆံၫ့ဎံၪနီၪလီၫႉ ၦဆံၫ့ဎံၪ Jane ယီၩ ယိဂ့ၩယိဘၪ ၦၡၪ့ဖိၪၥံၪဒဲ ၦလၧဘၪထိးဆၧဆၫၥံၪအဂး ယိဂ့ၩယိဘၪဝ့ၫလၧ ဆၧအဲၪဆၧကွံၩ မွဲဝ့ၫဒၪ ၦဆံၫ့ဎံၪ လဂၩနီၪအကၠီၩ့ ယရၩလၩ့န့အ့ၪဘၪနၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ အဲၪကွံၩဘၪ ထၧၫ့ဖုဝဲထံၩၥိၭ ထီးအလူၬႇ မွဲနၥံၪလၧၫ့ဎွ့ၩဝ့ၫၪလၧ ကဆါယွၩ အဆၧအဲၪဆၧကွံၩလါဆံၭႉ