လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ အဆၧၥီၪ့ဆၧၥၫ့နီၪမွဲဝ့ၫဒၪ ဆၧဆၫဆါဒဲ ၦယိဆၧၩ့အကျၩ ဆၧလၩ့ဘူၭအဂဲး အကၠီၩ့နီၪလီၫႉ ဆၧလၧဆၧဆၫနီၪ အီၪအဖျီၪအမံၩ့မံၩ့နီၪလီၫႉ ပအီၪပဲၩထၬ ဆၧဆၫဆါၥံၪႇ ပယိဖၬခွံၬ ဆၧဆၫဆါၥံၪႇ လတီၩလဘၪ ၡၩဘၪထိးပျီၩဒဲ ၦလၧဘၪထိးဆိၪခွံၬ အခွးအယါနီၪ မွဲဝ့ၫဒၪ ဆၧဆၫအဖျီၪကမံၩ့နီၪလီၫႉ
အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ၦလၧဘၪထိးဆၧဆၫၥံၪအဂး ထံးလၩ့ထီၩ့လၩ့ ဆၧအီၪဆီၪ့အီၪချဲၫ့ ယိထဲၩ့ခွါထဲၩ့ လိၪဝ့ၫဒၪ အၪမၬဒ့ၭနီၪလီၫႉ လၩ့ဆၫ့ဒၪဆၧ အရ့ၩဎိၩထုၬ လိၪဝ့ၫဒၪကမံၩ့နီၪ ၦလၧ ဘၪယိ ဆၧဆၫဆါၥံၪနီၪလီၫႉ ၦယိဂ့ၩယိဘၪ ဆၧဆၫဆါၥံၪ လၧအဘူၭထုၬနီၪ မွဲဝ့ၫဒၪ ဘၠၩ့ဆၧအဖျီၩ့ကမံၩ့နီၪလီၫႉ လါနၫ့ႇ လၧခဲၫ့အရ့ၩဎိၩထုၬ လိၪဝ့ၫဒၪကမံၩ့နီၪ ဆၧအဲၪဆၧကွံၩ့ဒဲ ဆၧၥၭအီၪနီၪလီၫႉ ဆၧမၩအယီၩနီၪ ဆၧဆၫဆါၥံၪအဂး မိၡါခံးဂၩ့ႇ အနးၥၭဒဲ အၥၭခံဖၧၩ့ ဆၧဆၫအီၪ ထီးအလူၬနီၪ ကဘျၪထဲၩ့ဝ့ၫဒၪနီၪလီၫႉ
အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဎရံၬဖိၪၥံၪ အတၩလၫ့ အီၪထီးအလူၬဖၧၩ့နီၪ ဆၧအဖျီၩ့ယီၩ မွဲဝ့ၫဒၪ အရ့ၩဎိၩထုၬနီၪလီၫႉ လကၭဒ့ၭဘၪႇ အ့ၪပၥိၩ့ထၪ့ ဆၧအဖျီၩ့ယီၩနီၪ ဆၧဆၫဆါၥံၪ ကန့ထၪ့ဘၪႇ ကၥ့ၪယၫဘၪ ကဆါဎြံၬ အဆၧအဲၪဆၧကွံၩဒဲ ဆၧယိဂ့ၩယိဘၪနီၪလီၫႉ ဆၧနီၪအကၠီၩ့ႇ ပဆၧယၫ့ၥုၪ့ယၫ့ၥၭ ကဘၪအီၪလၧ ဆၧဆၫဆါၥံၪအဖၫ့ခိၪ ဘဲၫၥိၭ ကဆါဎြံၬ အဆၧယၫ့ၥုၪ့ယၫ့ၥၭ အီၪလၧ ပဖၫ့ခိၪနီၪအကၠီၩ့ ၥၫ့ဎွၩဖရၫ့စ့ၭ အဆၧၥီၫ့ဆၧၥၫ့အီၪ ဝ့ၫဒၪ ဘဲၫယီၩၥိၭအဂဲး ယရၩလၩ့န့အ့ၪဘၪနၥံၪလၧ ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭ ထီးအလူၬ မွဲနၥံၪလၧၫဎွ့ၩဝ့ၫဒၪလၧ ကဆါဎြံၬအဆၧအဲၪဆၧကွံၩ လါဆံၭႉ